ق ر پرەزيدەنتى استانا مەدرەسەسىنىڭ شاكىرتتەرىمەن كەزدەستى

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ ەلورداداعى استانا مەدرەسەسىنە بارىپ، ءدىني ءبىلىم ورداسىنىڭ شاكىرتتەرىمەن كەزدەستى، دەپ حابارلايدى قازاقپارات.

ق ر پرەزيدەنتىنىڭ باسپا ءسوز حاتشىسى بەرىك ءۋالي فەيسبۋكتەگى پاراقشاسىندا جاريا ەتكەن ۆيدەو ماتەريالدا قاسىم-جومارت توقايەۆ مەدىرەسە شاكىرتتەرىمەن كەزدەسىپ، ولاردى ورازا ايت مەرەكەسىمەن قۇتتىقتادى.

«وسىنداي مەدرەسەلەر بىزگە وتە قاجەت. قازاقستاندا وسىنداي مەدرەسەلەر بولۋى كەرەك. ورازا ايت قابىل بولسىن! بارشاڭىزعا امانشىلىق تىلەيمىن! ءبىزدىڭ مەملەكەتىمىزگە، حالقىمىزعا قىزمەت ەتىڭىزدەر! كەلەسى رامازانعا ءبارىمىز حالىق، جاماعات بولىپ، بالالارىمىز امان، حالقىمىزدىڭ ءتورت قۇبىلاسى تۇگەل جەتۋگە ءناسىپ ەتسىن!»، - دەدى قازاقستان پرەزيدەنتى.

ەسكە سالا كەتەيىك، مەملەكەت باسشىسى قاسىم-جومارت توقايەۆ قازاقستاندىقتاردى ورازا ايت مەرەكەسىمەن قۇتتىقتاعان بولاتىن.