قازاقستاندىقتار «مەنىڭ تۋىم» اكسياسىنا بەلسەندى اتسالىسۋدا

نۇر-سۇلتان. قازاقپارات - الەۋمەتتىك جەلىلەردە #مەنىڭتۋىم #مويفلاگ حەشتەگىمەن باستالعان اۋقىمدى اكسيا ءوز جالعاسىن تاۋىپ كەلەدى.

قازىرگە دەيىن 700 گە تارتا ادام قازاقستان رەسپۋبليكاسىنىڭ مەملەكەتتىك رامىزدەرىمەن سەلفي ءتۇسىرىپ الەمجەلىگە سالىپ ۇلگەرگەن، دەپ حابارلايدى قازاقپارات ءتىلشىسى.

الەۋمەتتىك جەلىلەردەگى جازبالارىندا وسىلايشا وتانداستارىمىز ەلىنە دەگەن سۇيىسپەنشىلىكتەرىن جەتكىزۋگە تىرىسىپ جاتىر. اكسياعا قاتىسۋشىلاردىڭ كوبى - قازاقستاندىق جانە شەتەلدىك جوعارعى وقۋ ورىندارىنىڭ ستۋدەنتتەرى. قاتىسۋشىلاردىڭ كەيبىرى ءبىزدىڭ تۋىمىز - وتانىمىزدىڭ ءبىر بولشەگى ەكەنىن، كوك تۋدىڭ جەلبىرەگەنى - جانىنا قۋات بەرەتىنىن جازىپ، جازبالارىن بولىسۋدە.

ال مەكتەپ وقۋشىلارى سوڭعى قوڭىراۋدا تۇسكەن فوتوسۋرەتتەرىن جارىسا جاريالاپ جاتىر. فوتوسۋرەتتەردە تۇلەكتەر قازاقسان رەسپۋبليكاسىنىڭ مەملەكەتتىك تۋىن كوپتەپ تۇسىرۋگە تىرىسقان. اكسياعا قاتىسۋشى ەرەسەكتەردىڭ كوبى تۋدىڭ اياسىندا تۇسكەن فوتوسۋرەتتەرىن بولىسكەن.

جازبادا اقىنداردىڭ وتتى ولەڭدەرىن جاريالاۋدى ۇمىتپاپتى.

اكتسيا فوتوسۋرەتتەرمەن شەكتەلىپ قالماپتى. باستاما اياسىندا كەيبىر قولدانۋشىلار ۆيدەوروليكتەر جاريالاپ، ءوز وتانىنا دەگەن سۇيىسپەنشىلىكتەرىن ايتۋدا.

 

#مەنىڭتۋىم #مويفلاگ حەشتەگىمەن العاشقى جازبالار الەۋمەتتىك جەلىدە ءبىر اي بۇرىن پايدا بولعان ەدى. سودان بەرى ءارتۇرلى سالاداعى مىڭداعان قازاقستاندىق ازامات اكسياعا بەلسەندى تۇردە اتسالىسۋدا.

ايتا كەتسەك، تاۋەلسىز قازاقستاننىڭ مەملەكەتتىك رامىزدەرى وسىدان 27 جىل بۇرىن، 4 -ماۋسىم كۇنى بەكىتىلگەن بولاتىن. سودان بەرى اتالمىش داتانى بارشا قازاقستاندىقتار ايتۋلى مەرەكە رەتىندە اتاپ ءوتىپ كەلەدى.