بۇگىن - ورازا ايت مەرەكەسى

نۇر-سۇلتان. قازاقپارات - بۇگىن جەر بەتىندەگى بارلىق مۇسىلمان قاۋىمى ءۇشىن ەڭ قاسيەتتى سانالاتىن ەكى ۇلىق مەرەكەنىڭ ءبىرى - ورازا ايت مەيرامى.

بۇل كۇنى اللانىڭ رازىلىعى ءۇشىن ءبىر اي بويى اۋىز بەكىتىپ، مۇسىلماندىقتىڭ بەس پارىزىنىڭ ءبىرى سانالاتىن ورازانىڭ شارتتارىن ورىنداعان جاندار اۋىزدارىن اشادى. مۇسىلماندار ورازامەن قوشتاسىپ، اللا تاعالاعا قاسيەتتى رامازان ايىنا اماندىقتا- ساۋلىقتا جەتكىزگەنىنە شەكسىز العىس ايتىپ، كەلەسى رامازان ايىنا دا ەسەندىكتە جەتۋلەرىن تىلەپ، ءمىناجات ەتەدى.

قازاقستان مۇسىلماندارى ءدىني باسقارماسىنىڭ مالىمەتىنشە، نۇر-سۇلتان جانە شىمكەنت قالالارىندا، سونداي-اق ماڭعىستاۋ، تۇركىستان، اتىراۋ، اقتوبە، اقمولا، سولتۇستىك قازاقستان، پاۆلودار، شىعىس قازاقستان وبلىستارىندا ورازا ايت نامازى وقىلاتىن ۋاقىت ساعات 07:00 گە بەلگىلەنگەن. ال الماتى مەن  قىزىلوردا قالاسىندا ساعات 06:00 دە، الماتى، جامبىل، باتىس قازاقستان، الماتى قالاسى، قاراعاندى وبلىستارىندا ساعات 06:30، قوستاناي وبلىسىندا ساعات 07:30 دا وقىلادى.

ايتتىڭ ءمان-ماعىناسىنا كەلسەك، ايت - قۋانىش پەن شاتتىققا تولى كۇن دەگەن نەمەسە مەرەكە»، «مەيرام» دەگەن ۇعىمدى بىلدىرەدى ەكەن. اللاھ تاعالا ايت سايىن ادام بالاسىنا ءار ءتۇرلى جاقسىلىقتار بەرەدى. ايت مەيرامى الدىمەن ايت نامازىن وقۋمەن باستالادى. سۇيىكتى پايعامبارىمىز مۇحاممەد (س. ع. س. ) ءوز وسيەتىندە: «ايت كۇنى ءبىرىنشى ورىندايتىنىمىز - ناماز وقۋ»، - دەگەن. بۇل ناماز يسلامنىڭ ۇرانى بولعاندىقتان، پايعامبارىمىز مۇحاممەد (س. ع. س. ) ومىرىندە ونى ءبىر رەت تە قالدىرماي وقىعان. ايتتا مۇسىلمانداردىڭ ءبىر- بىرىمەن تاتۋلىقتارىن ارتتىرۋى - مەرەكەنىڭ نەگىزگى ءسانى. وسى ماقساتتا پايعامبارىمىز (س. ع. س. ) : ء«بىر- بىرىڭە سىيلىق بەرىپ، تاتۋلاسىڭدار... ءبىر-بىرىڭە بەرگەن سىيلىقتارىڭ - ارالارىڭداعى وشپەندىلىكتى جويادى»، - دەپ وسيەت ەتكەن.

ورازا ايت مەرەكەسى ءشاۋۋال ايىنىڭ ءبىرىنشى كۇنى باستالىپ، ءۇش كۇنگە سوزىلادى. ول كۇنى ەرتەرەك تۇرىپ، عۇسىل الىپ، مەشىتكە - ايت نامازىنا حوش ءيىستى بولىپ بارۋ - پايعامبارىمىزدىڭ (س. ع. س.) سۇيسىنە جاسايتىن امالىنان ەدى. سوندىقتان دا، بۇل امال مۇستاحاب سانالادى. وسى ايتقا بايلانىستى تاعى ءبىر سۇننەت امالى جايىندا حاديستە: «پايعامبارىمىز (س. ع. س. ) ايت كۇنى مەشىتكە بارعان جولىمەن قايتپاي، باسقا جولمەن قايتاتىن ەدى»، - دەلىنگەن. بۇل دا ءاربىر مۇسىلمان ءۇشىن سۇننەت.

ورازا ايت كۇندەرى ءاربىر مۇسىلماننىڭ شاڭىراعىندا شەلپەك، باۋىرساق ءپىسىرىلىپ، ءار ۇيدە ادەتتەگىدەن ءسانى دە، سالتاناتى دا ەرەكشە مەرەكەلىك داستارقان جايىلىپ، قوناقتار شاقىرىلادى. سونىمەن قاتار، جاعدايى تومەن ادامدارعا جاردەم كورسەتىلىپ، ولار دا مەيرامنان تىس قالدىرىلمايدى. بۇل كۇندەرى تۋعان- تۋىستار ءبىر جەرگە جينالىپ نەمەسە زيرات باسىنا بارىپ ومىردەن وزعان جاقىندارىنىڭ ءارۋاعىنا باعىشتاپ قۇران وقيدى.

قاسيەتتى رامازان ايىنان كەيىن كەلەتىن وسى ۇلىق مەرەكەنى الەمدەگى جالپى بۇكىل مۇسىلماندار ايرىقشا قۋانىشپەن، زور ىقىلاسپەن اتاپ وتەدى. ارادا قانشاما عاسىر وتسە دە، بۇل ۇلىق مەيرامنىڭ ءمان- ماڭىزى كەمىمەي، كەرىسىنشە جىل وتكەن سايىن ارتىپ كەلەدى. بۇل مەيرامنىڭ ادەتتەگىلەردەن نەگىزگى ەرەكشەلىكتەرى - ادامداردى باۋىرمالدىلىققا، كىشىپەيىلدىلىككە، كەشىرىمدىلىككە، سۇيىسپەنشىلىككە شاقىرادى. مۇسىلماندار قۇدىرەتى كۇشتى اللا تاعالانىڭ ادام بالاسىنا بەرگەن نىعمەتتەرىنە تاۋبە ايتىپ، شۇكىرشىلىك جاساۋعا ۇندەيدى.

قاسيەتتى رامازان ايىنان كەيىن كەلگەن ۇلىق مەرەكە - ورازا ايت بارشامىز ءۇشىن قۇتتى بولسىن! تۋعان وتانىمىز - قازاقستانىمىز بەيبىتشىلىك پەن تاتۋلىقتىڭ قۇشاعىندا ءوسىپ- وركەندەپ، انا ءتىلىمىزدىڭ مارتەبەسى ارتا بەرسىن، يسلام ءدىنى قاناتىن كەڭگە جايا بەرسىن! قازاقستانداعى ءاربىر شاڭىراقتىڭ قۇت- بەرەكەسى مولايا ءتۇسسىن!