ەرتىس وڭىرىندە قارا ءتۇستى بالاپاندارى بار اققۋلار پايدا بولدى
«پاۆلودار قالاسىنان اۋدانعان كەتىپ بارا جاتقان ەدىم. ءبىر كەزدە سۋدىڭ جاعاسىندا جۇرگەن ەكى كيەلى قۇس پەن ۇيرەك- قازداردى كوزىم شالىپ قالدى. تابيعاتتىڭ اسەم كورىنىسى مەن قۇستاردى سۋرەتكە ءتۇسىرىپ الۋ كوپتەن بەرى ادەتكە اينالعان. سول ادەتىم بويىنشا كولىكتەن ءتۇسىپ جاقىنداپ ەدىم، قاناتتىلار سۋ ايدىنىندا قارا ءتۇستى 7-8 كوگىلدىرىمەن بىرگە ءجۇزىپ ءجۇر ەكەن. ءبىزدىڭ ولكەگە بۇل قۇستار سوڭعى جىلدارى ءجيى ۇشىپ كەلەتىن بولدى. دەگەنمەن، بالاپاندارىمەن بىرگە جۇرگەنى تاڭداندىردى» ، - دەيدى امانجول ەرەن ۇلى.
بيولوگيا عىلىمدارىنىڭ دوكتورى، پروفەسسور قايىرباي بازاربەكوۆ، قارا قۋلار اۆستراليادا مەكەندەيتىنىن، بۇل سول جاقتان كەلگەن قۇستار بولۋى مۇمكىن ەكەنىن ايتادى. «ولاردى اۆستراليالىق قارا قۋلار دەپ اتايدى» ، - دەيدى قايىرباي بازاربەكوۆ. پروفەسسوردىڭ ايتۋىنشا، اققۋلار كەيدە الماتى وڭىرىندە، كاسپيي تەڭىزىندە قىستايدى. ءارى قاراي اۆستراليا، افريكاعا ۇشىپ كەتەدى. قازىرگى تاڭدا كيەلى قۇستار ايماقتىڭ كوپتەگەن جەرلەرىندە كەزدەسەدى. وعان تىنىشتىق فاكتورى، ياعني قاۋىپ- قاتەردىڭ از بولۋى اسەر ەتەدى.
«مىسالى، جۋىردا اۋەجايدىڭ جانىندا جانە اقتوعاي اۋدانىنىڭ ماڭىندا 28 اققۋدى كورىپ قالدىق»، - دەيدى قايىرباي بازاربەكوۆ. «ولاردىڭ ىشىندە ۇلكەن جانە قوڭىر تۇستىلەرى دە كەزدەسەدى. ءبىرىنشى جىلى اققۋدىڭ كوگىلدىرلەرى سۇر ءتۇستى بولادى، تەك ءۇشىنشى جىلى عانا اعارادى. سوندىقتان بۇل بالاپانداردىڭ دا اعارىپ كەتپەسىنە كەپىلدىك جوق. ادەتتە، اققۋلار جاز مەزگىلىندە كەلەدى دە كۇزدىڭ قاراشا ايىندا ۇشىپ كەتەدى. وسىعان دەيىن وبلىستا قارا قۋدى كەزدەستىرگەن جوقپىن».
ەسكە سالا كەتەيىك، اققۋلى اۋدانىنىڭ ورتالىعىنداعى شاعىن كولشىكتەرگە بيىل مامىر ايىنىڭ ورتاسىندا جۇپ- جۇپپەن التى اققۋ ۇشىپ كەلگەن بولاتىن.