قازاقستاندا ەڭ جايلى ستۋدەنتتىك جاتاقحانالاردىڭ رەيتينگى جاسالادى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا بەلگىلى بولدى، دەپ حابارلايدى قازاقپارات ءتىلشىسى.
جاستار جىلى شەڭبەرىندە «قازاقستان ستۋدەنتتەرىنىڭ اليانسى» رەسپۋبليكالىق ستۋدەنتتىك قوزعالىسى اقپارات جانە قوعامدىق دامۋ مينيسترلىگىنىڭ جانە ازاماتتىق باستامالاردى قولداۋ ورتالىعىنىڭ قولداۋىمەن «ستۋدەنتتەر ءۇيى 2.0» جوباسىن ىسكە قوسىپ وتىر. بۇل اكسيا 2005 -جىلدان بەرى وتكىزىلىپ كەلە جاتقانىن ايتا كەتۋ كەرەك. ال مەملەكەتتىڭ قولداۋىمەن اكتسيا بيىل جاڭا رەسپۋبليكالىق اۋقىمعا يە بولماق. جوبا ستۋدەنتتەردىڭ ءومىر ساپاسىن تولىققاندى جەتىلدىرۋگە باعىتتالعان. ونىڭ باستى ماقساتى - جاتاقحانالاردا تۇراتىن ستۋدەنتتەردىڭ قوعامداعى بەلسەندىلىگىن ارتتىرۋ، ازاماتتىق ءرولى مەن جاۋاپكەرشىلىگىن دامىتۋ، قوعام يگىلىگىنە ستۋدەنتتەردىڭ تۇلعالىق جانە ينتەللەكتۋالدىق، پوتەنتسيالدىق مۇمكىندىكتەرىن دامىتۋعا جاعداي جاساۋ.
«تۇڭعىش پرەزيدەنت - ەلباسى نۇرسۇلتان نازاربايەۆ «بەس الەۋمەتتىك باستاما» اياسىندا جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ جونىندە ءتيىستى تاپسىرما بەرگەن بولاتىن. ستاتيستيكالىق مالىمەتتەرگە سۇيەنسەك، ەلىمىزدەگى 124 جوعارى وقۋ ورنىندا 542 مىڭ ستۋدەنت ءبىلىم الۋدا. ول ستۋدەنتتەرگە ارنالعان 251 جاتاقحانادا 82 مىڭ ستۋدەنت تۇرىپ جاتىر. سونداي- اق، ەلىمىزدە 769 كوللەدجدە 229 مىڭ ستۋدەنت ءبىلىم الىپ، ونىڭ 46 مىڭنان استامى 439 جاتاقحانادا تۇرادى. قازىرگى تاڭدا ەلىمىزدىڭ ستۋدەنتتەر جاتاقحاناسى ماسەلەسى ءالى كۇنگە دەيىن ماڭىزدى بولىپ تۇرعانى بەلگىلى» ، - دەدى اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتى ءتوراعاسىنىڭ ورىنباسارى شاحماردان بايمانوۆ.
ول ءوز سوزىندە ەلباسىنىڭ تاپسىرماسىمەن 2022 -جىلعا دەيىن 75 مىڭ ورنى بار جاتاقحانالاردى سالۋ تاپسىرىلعانىن اتاپ ءوتتى.
«اكسيانىڭ باستى ماقساتى - جاتاقحانالاردىڭ مەملەكەتتىك ستاندارتقا، سانيتارلىق نورمالارعا ساي بولۋىن قاداعالاۋ، ساپاسىن ارتتىرۋ، ستۋدەنتتەرگە قويىلاتىن تۇرمىستىق تەحنيكالاردىڭ ىستەن شىقپاۋىن باقىلاۋ، جاڭا وقۋ جىلىنا ازىرلىگىن باقىلاۋ. قىركۇيەكتە ۇلكەن رەيتينگ جاسالادى. جايلى جانە ناشار جاتاقحانالار ساراپتالادى. الەۋمەتتىك جەلىدە دە وسى جوبانىڭ ۇلكەن قولداۋ تابارىنا سەنەمىن. سەبەبى، ستۋدەنتتەر وسى اكتسياعا تىكەلەي قاتىسادى. قازاقستان ستۋدەنتتەرىنىڭ اليانسى دا ارنايى مونيتورينگتىك توپ قۇرىپ، جەرگىلىكتى جەردەگى كوللەدج، ج و و ستۋدەنتتەرىنىڭ جاتاقحاناداعى جاعدايىن تەكسەرەدى. بىرلەسكەن جوبا بولعاننان كەيىن وسى اكسيا ارقىلى ستۋدەنتتەرگە جايدى جاعداي جاساۋدى كوزدەيمىز» ، - دەدى شاحماردان بايمانوۆ.