جەزقازعان تۇرعىنى سولتۇستىك قازاقستانداعى ارحيۆتەن اتىلعان اتاسى تۋرالى دەرەكتەردى تاپتى
س ق و پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، ۆەدومستۆونىڭ ارنايى مەملەكەتتىك ارحيۆىندە كەز كەلگەن ادام وتباسى تاريحىن قالپىنا كەلتىرە الادى. جەزقازعان قالاسىنىڭ تۇرعىنى شولپان يساتايەۆانىڭ اتاسى 1938 -جىلى «حالىق جاۋى» اتانىپ، كەيىن اتىلعان ەكەن. سولتۇستىكقازاقستاندىق عابباس يساتايەۆ تاعدىرىنىڭ انىق-قانىعىنا جەتپەكشى بولعان نەمەرەسى 9 جىل بويى ارحيۆتەردى قوپارعان.
شولپان يساتايەۆانىڭ اكەسى ءابىش عابباس ۇلى 17 جاسىندا مايدانعا اتتانىپ بارا جاتىپ سوعىستان ورالمايتىنىن ايتقان، سەبەبى وعان «حالىق جاۋىنىڭ بالاسى» اتاعىمەن ءومىر ءسۇرۋ قيىن بولعان. ءۇش رەت اۋىر جاراقات السا دا، ءولىم اۋزىنان امان قالدى. نەمەرەسىنىڭ ايتۋىنشا، اكەسىنە تاعىلعان ادىلەتسىز ايىپتىڭ كەسىرىنەن ءابىشتىڭ ۇرىستاعى ەرلىگى، جۇمىستاعى جەتىستىكتەرى ءتيىستى باعالانبادى.
شولپان ءابىش قىزى اتاسىنىڭ ەسىمىن اقتاپ الماقشى. جەزقازعان قالاسىندا اتاسىنىڭ تاعدىرى تۋرالى ەشقانداي مالىمەت تابا الماعاندىقتان، س ق و پوليتسياسىنا جۇگىنىپ، قاجەتتى اقپاراتقا قول جەتكىزدى.
شولپان ءابىش قىزى العاش رەت اتاسىنىڭ جازۋىن كوردى. 1938 -جىلى 3 -اقپاندا قوزعالىپ، توعىز كۇننەن كەيىن جابىلعان قىلمىستىق ءىس ماتەريالىندا عابباس يساتايەۆ جازعان بىرنەشە بەت بار. اۋىل مۇعالىمى، پارتيانىڭ مۇشەسى بولعان ونىڭ تاعدىرىنا شىققان تەگى كەرى اسەر ەتتى، ول - بايلاردىڭ ۇرپاعى ەدى.
«اتامدى ءۇش اداممەن بىرگە اتىپتى، - دەدى شولپان يساتايەۆا. - ەندىگى ارمانىم - اتىلعان جەرىن تاۋىپ، دۇعا وقۋ. سوندا جانىم تىنىشتالادى...».
«انىقتامالاردىڭ جانە قۇجاتتاردىڭ كوشىرمەلەرىن بەرۋ - ارحيۆ كورسەتەتىن قىزمەت، - دەيدى س ق و پ د اقپاراتتىق- اناليتيكالىق ورتالىعىنىڭ باستىعى سامال قۇسايىنوۆا. - تەك تۋىس ەكەنىن راستايتىن قۇجاتتاردى ۇسىنۋ قاجەت. سونداي-اق، «ازاماتتارعا ارنالعان ۇكىمەت» مەملەكەتتىك كورپوراتسياسى، ياعني حالىققا قىزمەت كورسەتۋ ورتالىعى ارقىلى ەلەكتروندى تۇردە جۇگىنۋ مۇمكىندىگى دە قاراستىرىلعان».