جانسەيىت تۇيمەبايەۆ: تراگەديانىڭ اۋقىمدىلىعى تالاي زەرتتەۋگە نەگىز بولادى

نۇر- سۇلتان. قازاقپارات - قازاقستان حالقى اسسامبلەياسى ءتوراعاسىنىڭ ءبىرىنشى ورىنباسارى جانسەيىت تۇيمەبايەۆ ساياسي قۋعىن- سۇرگىن مەن اشارشىلىق قۇرباندارىنىڭ تاريحىن زەرتتەۋ جالعاسا بەرەتىنىن جەتكىزدى، دەپ حابارلايدى قازاقپارات ءتىلشىسى.

«قازاقستاندا تاۋەلسىزدىك العالى بەرى تاريحتى تۇگەندەۋ، ۇمىتپاۋ باعىتىندا ءبىرشاما ءىس تىندىرىلىپ كەلەدى. 2004 -جىلى «مادەني مۇرا» باعدارلاماسى قولعا الىنىپ، ونىڭ شەڭبەرىندە قازاقستان اۋماعىندا تاريحي- مادەني ەسكەرتكىشتەر قالپىنا كەلتىرىلگەن بولاتىن. 2015 -جىلى ءبىز «حالىق تاريح تولقىنىندا» باعدارلاماسىن قابىلدادىق. سونىڭ ارقاسىندا الەمدىك جەتەكشى ارحيۆتەردىڭ قۇجاتتارىن زەرتتەۋ مۇمكىندىگى تۋدى. بۇل تراگەديانىڭ اۋقىمدى بولعانى سونشالىق، الدا ءالى تالاي زەرتتەۋ جۇمىستارى كۇتىپ تۇر»، - دەدى جانسەيىت تۇيمەبايەۆ ساياسي قۋعىن- سۇرگىن مەن اشارشىلىق قۇرباندارىن ەسكە الۋ كۇنىنە ارنالعان ق ح ا- نىڭ «تاريحتان تاعىلىم - وتكەنگە تاعزىم» حالىقارالىق 10  - فورۋمىندا.

ونىڭ ايتۋىنشا، قازىرگى تاڭدا «رۋحاني جاڭعىرۋ» باعدارلاماسىنىڭ ەكىنشى كەزەڭى - «ۇلى دالانىڭ جەتى قىرى» ماقالاسىنداعى باستامالار ىسكە اسىرىلۋدا.

«ەلباسىنىڭ «ۇلى دالانىڭ جەتى قىرى» ماقالاسىنىڭ بازاسى بويىنشا ءبىز قوعامدىق سانانى جاڭعىرتۋدا ۇلكەن جۇمىستاردى قولعا الدىق. بولاشاق ءۇشىن وتكەندى تانۋ - تاۋەلسىز قازاقستان حالقىنىڭ تاريحي ساناسىن قالىپتاستىرۋدىڭ نەگىزى ەكەنى انىق»، - دەدى ول.

ايتا كەتسەك، اتالمىش فورۋمدا اقپارات جانە قوعامدىق دامۋ ءمينيسترى داۋرەن ابايەۆ ءسوز سويلەپ، ستاليندىك رەپرەسسيانىڭ قۇرباندارى بويىنشا ورتاق ازا - قازاقستاندىقتاردى بىرىكتىرەتىن فاكتورعا اينالۋى ءتيىس» ەكەنىن ءمالىم ەتكەن بولاتىن.

اۆتور: ايان بەكەن ۇلى