ەلەكتروموبيل يەلەرىنە تەگىن اۆتوتۇراق ۇسىنىلۋى مۇمكىن

نۇر- سۇلتان. قازاقپارات - نورۆەگيانىڭ ەلەكتروموبيل يەلەرىنە تەگىن تۇراق ۇسىنۋ جوباسى قازاقستاندا دا جۇزەگە اسۋى مۇمكىن.

بۇل تۋرالى Jasyl Jol ەلەكتروموبيلدەر شەرۋىنىڭ يدەيا اۆتورى ادىلبەك باسەكەيەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ايتتى، دەپ حابارلايدى قازاقپارات ءتىلشىسى.

حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعىنىڭ اپپارات باسشىسى ادىلبەك باسەكەيەۆتىڭ ايتۋىنشا، ەلدەگى ەلەكتروموبيلدەردىڭ جالپى كولىك قاتىناسىنداعى ۇلەسى 1 پايىزعا دا جەتپەيتىن كورىنەدى. ال JAK ماركاسىمەن وتاندىق ەلەكتروموبيل قۇراستىراتىن «سارى ارقا اۆتوپروم» ج ش س- ءنىڭ ونىمىنە دەگەن سۇرانىس سوڭعى ءبىر جىلدا قايتا ءتۇسىپ كەتكەن.

«بۇل ولقىلىقتاردىڭ ورنىن تولتىرۋ ءۇشىن نورۆەگيانىڭ تاجىريبەسىن قولدانۋعا بولادى. ول ەلدە كولىكتەردىڭ 80 پايىزى ەلەكترمەن جۇرەدى. سوعان قاراماستان، ەلەكتروموبيل تىزگىندەگەن جۇرگىزۋشىلەرگە بارلىق تۇراقتار تەگىن قىزمەت كورسەتەدى. ءتىپتى كەي قالالاردا ەلەكتروموبيلدەرگە عانا ارنالعان جولاقتار قاراستىرىلعان. مۇنداي جوبانى بىزدەگى جاسىل ەكونوميكانى قولداۋشى ۇيىمدار پارلامەنتكە ۇسىنىپ جاتىر. ازىرگە وڭدى شەشىم شىقپاعانىمەن، تىڭعىلىقتى جۇمىس ءجۇرىپ جاتىر»، - دەيدى ول.

ال اتالمىش ورتالىق باسشىسىنىڭ ورىنباسارى گاۋحار بايسەيەۆا ەلەكتروموبيلدى قۋاتتاۋ بەكەتتەرىن ورناتۋ بويىنشا «قازمۇنايگاز» باسشىلىعىمەن ناقتى كەلىسىمدەر جاسالعانىن ايتادى.

«ازىرگە جانارماي قۇيۋ ستانسالارىن مۇنداي ىسكە مىندەتتەۋ مۇمكىن ەمەس. ءبارى سۇرانىسقا بايلانىستى. بيزنەس تەك سۇرانىسقا عانا باعىنادى. الايدا، «گەليوس» جانارماي قۇيۋ جەلىسى ءبىزدىڭ باستامامىزعا قىزىعۋشىلىق تانىتىپ وتىر»، - دەيدى ول.