اقتوبەدە بالاسى اناسىنا باۋىرىن ءبولىپ بەردى

اقتوبە. قازاقپارات - اقتوبەدە باۋىر سەرروزىنا شالدىققان ناۋقاس ايەلگە بالاسى باۋىرىنىڭ ءبىر بولىگىن بەردى، دەپ حابارلايدى قازاقپارات ءتىلشىسى.

اقتوبە قالاسىنىڭ تۇرعىنى ءوزىن جايسىز سەزىنىپ، باسى اينالىپ، السىرەي باستاعان سوڭ دارىگەرگە قارالعان. اق حالاتتىلار بىردەن باۋىر سەرروزى دياگنوزىن قويدى. ءارى س گەپاتيتى انىقتالدى.

«العاشىندا گەپاتيتتى ەمدەۋ شاراسى ءجۇردى. ءبىراق جاعداي وڭالمادى. سوندىقتان باۋىردى اۋىستىرۋ جونىندە شەشىم قابىلداندى. اناسىنىڭ اۋىرىپ جاتقانىن كورگەن بالاسى بىردەن باۋىرىن بەرۋگە كەلىستى. وتا اقتوبە قالاسىندا جاسالدى. سەۋل ۇلتتىق ۋنيۆەرسيتەتىنىڭ پروفەسسورى كۆانگ ۆۋنگ لي باستاعان دارىگەرلەر 6 ساعاتتان استام ۋاقىت بويى وپەراتسيا جاسادى. ناۋقاستىڭ جاعدايى تۇراقتى اۋىر، جانساقتاۋ بولىمىنەن جالپى پالاتاعا اۋىستىرىلدى»، - دەپ حابارلادى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.

ايتا كەتەيىك، وتا سەۋل ۇلتتىق ۋنيۆەرسيتەتى، وبلىستىق دەنساۋلىق ساقتاۋ باسقارماسى جانە اقتوبە مەديتسينا ورتالىعى اراسىنداعى كەلىسىم اياسىندا جاسالدى. بۇل - باۋىر اۋىستىرۋدىڭ 14- وتاسى بولدى.

اۆتور: التىناي ساعىندىقوۆا