ەلوردادا سپورت ۋنيۆەرسيتەتى اشىلۋى مۇمكىن

نۇر- سۇلتان. قازاقپارات - ەلوردادا حالىقارالىق دەڭگەيدەگى سپورت ۋنيۆەرسيتەتى اشىلۋى مۇمكىن. بۇل تۋرالى بۇگىن ورتالىق كوممۋنيكاتسيالار قىزمەتىندە «قازاقستان بارىسى» تۋرنيرىنە ارنالعان باسپا ءسوز ءماسليحاتىندا بەلگىلى بولدى، دەپ حابارلايدى قازاقپارات ءتىلشىسى.

 «باپكەرلەردى دايىنداۋ ماسەلەسى وزەكتى. شىنىندا دا، ءبىزدىڭ ەلىمىزدە تەك ۇلتتىق سپورت تۇرلەرىنەن عانا ەمەس، وليمپيادالىق سپورت تۇرلەرىنەن جاقسى دەڭگەيدە دايىندايتىن ۋنيۆەرسيتەتتەر مەن كوللەدجدەر از. قازاقستاندا ءاربىر وڭىردە وبلىستىق مەكتەپ- ينتەرناتتار بار. سولاردى قازىرگى تاڭدا كوللەدجگە اينالدىرىپ جاتىرمىز. سول كوللەدجدەردىڭ ىشىندە ۇلتتىق سپورت تۇرلەرىنىڭ بولىمشەسىن اشىپ، سول جەردەن جاقسى دارىندى بالالاردى دايىنداۋ كەرەك. سول سەكىلدى ۋنيۆەرسيتەت ماسەلەسى دە قولعا الىنىپ جاتىر. مادەنيەت جانە سپورت مينيسترلىگىمەن بىرلەسىپ، نۇر- سۇلتاندا حالىقارالىق دەڭگەيدەگى جاقسى سپورت ۋنيۆەرسيتەتىن اشۋ جوسپاردا بار. سول ۋنيۆەرسيتەتتە وليمپيادالىق سپورت تۇرلەرىنەن باسقا ۇلتتىق سپورت تۇرلەرىن دە قولداپ، جاقسى باپكەرلەردى دايىنداۋ كەرەك»، - دەدى ق ر ۇلتتىق وليمپيادا كوميتەتى سپورت ديرەكتسياسىنىڭ ديرەكتورى ەلسيار قاناعاتوۆ.

 ەسكە سالا كەتسەك، «قازاقستان بارىسى» تۋرنيرى بيىل 8 - ماۋسىمدا ەلورداداعى «بارىس- ارەنادا» وتەدى. ق ر قازاق كۇرەسى فەدەراتسياسىنىڭ پرەزيدەنتى ارمان شورايەۆتىڭ ايتۋىنشا، وسىمەن توعىزىنشى رەت وتەتىن باسەكەگە ەلىمىزدىڭ 14 وبلىسىنان، نۇر- سۇلتان، الماتى، شىمكەنت قالالارىنان جانە كۇشتىك قۇرىلىمدار اراسىنداعى تۋرنيردە ىرىكتەۋدەن وتكەن 36 ۇزدىك بالۋان قاتىسادى. رەسمي سالماق ولشەۋ ءراسىمى 6 - ماۋسىم، ساعات 19.00-گە بەلگىلەنگەن.

باستالۋى - 8 - ماۋسىم، ساعات 13.00-دە.

اۆتور: ايان بەكەن ۇلى