ەلوردادا بالالار مەن جاستاردىڭ مۋزىكالىق وركەسترى مەن انسامبلدەرىنىڭ شەرۋى وتەدى
2019 -جىلدىڭ 1 -ماۋسىمىندا ساعات 10.00 - دە ەلىمىزدىڭ باس الاڭى «قازاق ەلى» مونۋمەنتى ماڭىندا استانانىڭ جاس تۇرعىندارى - بالالار مەن جاستاردىڭ مۋزىكالىق وركەسترى مەن انسامبلدەرىنىڭ شەرۋى باستالادى.
مۇنداعى ماقسات - «ماڭگىلىك ەل» جالپىۇلتتىق يدەياسىن جۇزەگە اسىرۋ اياسىنداعى ەستەتيكالىق جانە پاتريوتتىق تاربيەنىڭ فاكتورى رەتىندە وقۋشىلار مەن ستۋدەنتتەردىڭ پارادتىق كوشە- فەستيۆال شەرۋىن قولداۋ جانە دامىتۋ. ۇيىمداستىرۋشىلاردىڭ ايتۋىنشا، پارادتىڭ باستى ەرەكشەلىگى - بالالارىمەن بىرگە كولوننالاردا العاش رەت اۋدان اكىمدەرى، ءبىلىم بەرۋ ۇيىمدارىنىڭ باسشىلارى، «اكەلەر كەڭەسى» اتا-انالار قاۋىمداستىعىنىڭ وكىلدەرى قاتىساتىن بولادى.
جىل سايىن حالىقارالىق بالالاردى قورعاۋ كۇنى قارساڭىندا سيمۆوليكالىق تۇردە وتكىزىلەتىن بۇل جوبا تانىمالدىلىققا يە بولىپ كەلەدى، ويتكەنى بۇل كۇنى بالالار بەيبىتشىلىك پەن دوستىقتىڭ، ءوزارا سىيلاستىقتىڭ ەلشىسى رەتىندە كۇيگە ەنىپ، ال مۋزىكا كۇشى ەلوردانىڭ بارلىق جاس تۇرعىندارىن بىرىكتىرەدى. بالالار مەن جاستاردىڭ مۋزىكالىق وركەسترلەرى مەن انسامبلدەرىنىڭ Ⅲ شەرۋى جارقىن مۋزىكالىق مەرەكەگە اينالادى. ءبىر اۋەندە سەگىز مىڭ بالا نۇر- سۇلتان قالاسى تۋرالى جاڭا ءاندى تانىستىراتىن بولادى.
وقۋشىلار مەن ولاردىڭ اتا-انالارى، مۇعالىمدەر مەن ەلوردا قوناقتارى الدىندا ءبىرىڭعاي مارشپەن وتەدى. شەرۋ بارىسىندا ەلوردانىڭ ءار اۋدانىنان قاتىساتىن بالالار مۋزىكانىڭ ءتۇرلى جانرلارىن ۇسىناتىن بولادى. سونىمەن، ءبىزدى اتا-بابالارىمىزدىڭ تاريحىنان حاباردار ەتە وتىرىپ، الماتى اۋدانىنىڭ بالالارى ەسترادالىق مۋزىكالاردى ورىندايدى، بايقوڭىر اۋدانى - مودەرن، دامۋ مەن جاڭاشىلدىقتىڭ قايناعان ەنەرگياسىن، سارىارقا اۋدانى- فولكلورلى مۋزىكانى ۇسىنادى، ەسىل اۋدانى- كلاسسيكانى، سونداي-اق اتاقتى كينو مەن مۋلتفيلمدەردەن ساۋندرەكتەردى ۇسىنادى.