نۇرسۇلتان نازاربايەۆ بەلارۋس پرەزيدەنتىنە ەلباسى وردەنىن تابىس ەتتى
كەزدەسۋ بارىسىندا ەلباسى قۇرمەتتى قوناققا «قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ» وردەنىن تابىس ەتتى.
نۇرسۇلتان نازاربايەۆ الەكساندر لۋكاشەنكونىڭ ينتەگراتسيالىق ۇدەرىستەردى دامىتۋ جانە ەۋرازيالىق ەكونوميكالىق وداقتى قۇرۋ ىسىنە سىڭىرگەن ەڭبەگىن ەرەكشە اتاپ ءوتتى.
«بيىل ەۋرازيالىق ەكونوميكالىق وداقتىڭ وسى جەردە قۇرىلعانىنا 5 جىل جانە ءوزىم ۇسىنعان ەۋرازيالىق ينتەگراتسيا يدەياسىنىڭ جاريا ەتىلگەنىنە 25 جىل تولىپ وتىر. ءسىز قولداۋ كورسەتپەگەندە بۇل ۇيىم قۇرىلماس ەدى»، - دەدى نۇرسۇلتان نازاربايەۆ.
ەلباسى بەلارۋس حالقىنا جانە ونىڭ كوشباسشىسى ا. لۋكاشەنكوعا ءاردايىم قولداۋ كورسەتۋگە دايىن ەكەنىن ايتتى.
«سىزگە كەز كەلگەن ماسەلە بويىنشا قولداۋ كورسەتۋگە ءاردايىم دايىنمىن. ءسىز بەلارۋس رەسپۋبليكاسىن جوعارى دەڭگەيدە دامىتىپ كەلەسىز. ءسىزدى قازاقستاننىڭ كورىكتى جەرلەرىن تاماشالاۋعا شاقىرامىن»، - دەدى قازاقستاننىڭ تۇڭعىش پرەزيدەنتى.
الەكساندر لۋكاشەنكو قوناقجايلىق كورسەتىپ، ماراپات تاپسىرعانى ءۇشىن نۇرسۇلتان نازاربايەۆقا ريزاشىلىق ءبىلدىردى.
«بەلارۋس حالقىنا قۇرمەت كورسەتكەنىڭىز ءۇشىن راحمەت. بۇل ماعان عانا كورسەتىلگەن قۇرمەت ەمەس. بۇل - مەنىڭ حالقىما دەگەن ىستىق ىقىلاسىڭىز بەن قۇرمەتىڭىز. قازاقستاننىڭ پرەزيدەنتى - لايىقتى ازامات. ءسىز دانا شەشىم قابىلدادىڭىز. قازاقستاندىقتار باسقا حالىقتار سياقتى تۇراقتىلىقتى باعالايتىنىنا سەنىمدىمىن. ەڭ باستىسى - ەڭبەك. ەڭبەك ەتسەڭ، ناتيجە دە بولادى»، - دەدى بەلارۋس رەسپۋبليكاسىنىڭ پرەزيدەنتى.