جانار ايجانوۆا جاستاردىڭ اجىراسۋىنا ەنەلەردىڭ ساۋاتسىزدىعى كىنالى ەكەنىن ايتتى
ۇنەمى قاتال ەنەنىڭ وبرازىن سومدايتىن جانار ايجانوۆا جاستاردىڭ اجىراسۋىنا سەبەپ بولاتىن دا وسى ساۋاتسىز ەنەلەر ەكەنىن ايتىپ اقتارىلدى. بالاڭنىڭ باقىتتى بولعانىن قالاساڭ، ءوزىڭدى تاربيەلە دەيدى ءانشى.
«اجىراسىپ كەلىپ جاتادى. كوبىنە ەنەلەردىڭ ساۋاتسىزدىعىنان بولادى. كەيدە اتا-انالار كىرىسىپ، ەندى بىردە بالاسىن قاتتى ەركەلەتىپ جىبەرگەنى سەبەپ بولۋى مۇمكىن. سوندىقتان، باسقا ۇيگە كەلگەندە ۇيرەنىپ كەتۋ قيىن. اتا-ەنەلەرگە ءار نارسەسىن جىپكە تىزە بەرمەي، تاربيەلەپ الۋ كەرەك»، - دەيدى جانار ايجانوۆا.
كەلىن مەن كۇيەۋگە ءوزىڭنىڭ بالاڭمەن بىردەي قاراپ ۇيرەنگەن ءجون دەپ اتا-انالارعا كەڭەس بەرەدى جانار ايجانوۆا. ول كىسىنىڭ پىكىرىنشە ۇلكەندەردىڭ تاراپىنان سابىرلىق، قامقورلىق بايقالسا، اتا- انا باعىت-باعدار بەرسە اجىراسۋدىڭ الدىن الۋعا بولادى.
«كەلىن بولىپ كەلگەن كەزدە ول ساعان دايىن بولىپ كەلە قالمايدى. ول ءوزىنىڭ ءومىرى كورمەگەن دۇنيەسى. ونىڭ ءبارىن جىپكە ءتىزىپ، تۇرتە بەرسەڭ ءتىلى شىعادى، سودان كەيىن ۇرىس باستالادى. باعىت- باعدار بەرىپ، كوپ نارسەسىن ۇندەمەي، اقىرىنداپ، ۋاقىت وتكەننەن كەيىن ايتۋعا بولادى»، - دەپ اعىنان جارىلدى ونەر يەسى.