قازاقتىڭ تۇڭعىش مەحانيزاتور قىزىنا ەسكەرتكىش ورناتىلدى

قوستاناي. قازاقپارات - قوستانايدا داڭقتى مەحانيزاتور، سوتسياليستىك ەڭبەك ەرى كامشات دونەنبايەۆاعا ارنالعان ەسكەرتكىش ورناتىلدى، دەپ حابارلايدى قازاقپارات.

اتاقتى تراكتورشىنىڭ ەسكەرتكىشى ءوزىنىڭ ەسىمى بەرىلگەن ك. دونەنبايەۆا كوشەسىندەگى جاڭادان سالىنعان جاستار سارايىنىڭ جانىنان بوي كوتەردى. اشىلۋ سالتاناتىنا قاتىسقان وبلىس اكىمى ارحيمەد مۇحامبەتوۆ كامشات دونەنبايەۆانىڭ ەسىمى ءاردايىم جادىمىزدا بولىپ، وعان كورسەتىلەر قۇرمەت تاۋسىلمايتىنىن جەتكىزدى.

«قازاقتىڭ ماڭدايىنا بىتكەن ءبىرتۋار قىزى كامشات دونەنبايەۆا ءبىر ءداۋىردىڭ اڭىزىنا اينالدى. ول نەبارى 32 جاسىندا «سوتسياليستىك ەڭبەك ەرى» اتاعىن الدى. كامشات اپامىز تراكتورىن تىزگىندەپ قانا قويماي، وشاعىن وشىرگەن جوق. 4 بالانى تاربيەلەپ ءوسىردى. ءومىرىنىڭ سوڭىنا دەيىن باسىنان اق ورامالىن تاستاعان جوق. قانداي جيىندا بولسىن، ەلىمىزدىڭ اماندىعىن تىلەپ وتىراتىن. وكىنىشكە قاراي، حالىقتىڭ اياۋلى قىزىنان ايىرىلىپ قالدىق. دەگەنمەن، كامشات اپامىزدىڭ ەسىمىن قۇرمەتتەۋگە ارنالعان شارالار جالعاسا بەرەدى»، - دەدى وبلىس باسشىسى.

سونىمەن قاتار، قازاقستاننىڭ ەڭبەك ەرى سايران بۇقانوۆ داڭقتى مەحانيزاتوردى ءبىر وبلىستىڭ ەمەس، كۇللى قازاقستاننىڭ ماقتانىشى دەپ باعالادى.

«سوناۋ 1984 -جىلى ءشوپ شاۋىپ كەلۋ ءۇشىن 500 شاقىرىمداعى تۇمەن وبلىسىنا باراتىن بولدىق. وزىمىزدە قۋاڭشىلىق باسقان. مالدى قۇتقارۋ كەرەك. كامات اپامىز «كيروۆەتس» ءمىندى. ءبىزدىڭ: ء«سىز نە ءۇشىن باراسىز. ەلدە قالىڭىز»، - دەگەنىمىزدى تىڭدامادى. تراكتورىنا وتىرىپ الىپ، شالعايعا تارتىپ وتىردى. رەسەيدە ءبىر اي ءشوپ باسىندا جۇمىس ىستەدى. كەيىن، 90- جىلداردىڭ سوڭىندا وعان اۋىلدىق كەڭەس ءتوراعاسى، ينجەنەر جۇمىسىن ۇسىندى، ءبىراق ول باس تارتتى. اپامىز ءارۋاقىتتا قاراپايىمدىلىعىن ساقتادى. ءوز اتىن تاريحقا التىن ارىپتەرمەن جازدى. ول ءبىزدىڭ جاستارىمىز ءۇشىن ۇلگى. ونىڭ زامانداستارىن تاڭعالدىرعان ەڭبەكقورلىعى بۇگىنگى ۇرپاققا جەتۋى ءتيىس»، - دەدى س. بۇقانوۆ.

ەسكەرتكىشتى وبلىس اكىمى ارحيمەد مۇحامبەتوۆ پەن وبلىستىق ارداگەرلەر كەڭەسىنىڭ ءتوراعاسى كەنجەبەك ۋكين اشتى.

 

ايتا كەتەيىك، كامشات دونەنبايەۆا 1943 -جىلى قوستاناي وبلىسى ۇزىنكول اۋدانى لەنين سوۆحوزىندا تۋعان. ەڭبەك جولىن ۇزىنكول ەليەۆاتورىندا باستادى. 1961 -جىلدان قوستاناي وبلىسى بوروۆسكيي اۋدانى «حاركوۆسكيي» سوۆحوزىندا مەحانيزاتور بولىپ ەڭبەك ەتكەن. وسى وبلىستىڭ مەڭدىقارا اۋدانىنداعى «كامەنسك- ۋرالسكي» كەڭشارىندا مەحانيزاتورلار دايىندايتىن كۋرستى، كەيىن قوستاناي اۋىل شارۋاشىلىق تەحنيكۋمىن سىرتتاي وقىدى.

«ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ مۇشەسى، وبلىستىق ايەلدەر ءىسى جونىندەگى جانە وتباسى- دەموگرافيالىق كوميسسيانىڭ قۇرامىندا بىرنەشە قىزمەتتەردى اتقاردى. 1980-1985 -جىلدارى ك س ر و جوعارىعى كەڭەسىنىڭ ۇلتتار كەڭەسى ءتوراعاسىنىڭ ورىنباسارى بولدى. 1976 -جىلى ك س ر و مەملەكەتتىك سىيلىعىنىڭ لاۋرەاتى. ەكى رەت لەنين وردەنىمەن، قۇرمەت بەلگىسى وردەنىمەن ماراپاتتالعان. 1990-1993 -جىلدارى وسى كەڭشاردا قاۋىپسىزدىك تەحنيكاسىنىڭ ينجەنەرى، 1993 -جىلدان شارۋا قوجالىعىن باسقاردى. قوستاناي وبلىسىنىڭ جانە قوستاناي قالاسىنىڭ قۇرمەتتى ازاماتى.