قازاقستاندا كەڭجولاقتى ينتەرنەتتىڭ دامۋى كانادالىقتاردى تاڭعالدىردى

نۇر-سۇلتان. قازاقپارات - ق ر سيفرلىق دامۋ، قورعانىس جانە اەروعارىش ونەركاسىبى ءمينيسترى اسقار جۇماعاليەۆ كانادانىڭ قازاقستانداعى ەلشىسى نيكوليا برۋسسومەن كەزدەستى، دەپ حابارلايدى «قازاقپارات» ح ا ا ءتىلشىسى مينيسترلىكتىڭ باسپا ءسوز قىزمەتىنە سىلتەمە جاساپ.

كەزدەسۋدە قازاقستاننىڭ يننوۆاتسيالىق ەكوجۇيەسىنىڭ قازىرگى جاي-كۇيى مەن دامۋى، كانادالىق IT كومپانيالارىنىڭ Astana Hub حالىقارالىق تەحنوپاركىمەن ءوزارا ىقپالداستىعىنىڭ الەۋەتى، وتاندىق ستارتاپ جوبالارىن دامىتۋعا ۆەنچۋرلىق ينۆەستيسيالاردى تارتۋ بويىنشا ىنتىماقتاستىق ورناتۋ ماسەلەلەرى تالقىلاندى.

كانادا دەلەگاتسياسىنىڭ مۇشەلەرىن قابىلداعان اسقار جۇماعاليەۆ بۇگىندە ەلىمىزدە ءار ازاماتتىق ءومىر ءسۇرۋ ساپاسىن جاقسارتۋ مەن ەكونوميكانى دامىتۋعا سيفرلىق تەحنولوگيالار ارقىلى قول جەتكىزۋگە باعىتتالعان «سيفرلىق قازاقستان» مەملەكەتتىك باعدارلاماسىنا باسا نازار اۋدارىلىپ وتىرعانىن تىلگە تيەك ەتتى.

«وسى تۇرعىدان العاندا، ءبىزدىڭ ەلدىڭ IT سالاسىنداعى يننوۆاتسيالاردى دامىتۋ بويىنشا الەمدىك كوشباسشى ەلدەردىڭ ءبىرى سانالاتىن كانادامەن ىنتىماقتاس بولۋى ەكى جاققا دا ءتيىمدى بولارى ءشۇباسىز. بۇدان تىس، «Astana Hub» بازاسىندا ىسكە اسىرىلۋى مۇمكىن بىرلەسكەن جوبالار ستارتاپتاردى دامىتۋعا ءارى ولاردى ىشكى جانە سىرتقى نارىقتارعا شىعارۋعا جاعداي جاسايدى»، - دەدى مينيستر.

كانادا ۇكىمەتىنىڭ يننوۆاتسيالىق تەحنولوگيالار جونىندەگى باس كەڭەسشىسى پيتەر ۆان دەر گراحت قازاقستانداعى سيفرلاندىرۋ ۇدەرىسىنىڭ جەتىستىكتەرىن جانە يننوۆاتسيالىق ەكوجۇيەنىڭ دامۋىن جوعارى باعالادى. «قوناقتاردى، اسىرەسە، ەلىمىزدە كەڭجولاقتى ينتەرنەتتى ەنگىزۋ قارقىنى تاڭعالدىردى. كانادا ۇكىمەتى كەڭەسشىسىنىڭ پىكىرىنشە، قازاقستان بۇل جاعىنان الەمنىڭ كوپتەگەن ەلدەرىنەن كوش ىلگەرى كەلەدى»، - دەپ مالىمدەيدى مينيسترلىكتىڭ باسپا ءسوز قىزمەتى.

كەزدەسۋ سوڭىندا تاراپتار ءوزارا ديالوگ قۇرۋعا اشىق ءارى جيناقتالعان تاجىريبەلەرى مەن تەحنولوگيالارىن بولىسۋگە ءازىر ەكەنىن ءبىلدىردى.

اۆتور: سارا قابي قىزى