پرەزيدەنت: قىزىلوردالىقتاردىڭ جالاقىسىن ءوسىرۋ - ۇكىمەت پەن وبلىس اكىمىنىڭ باستى مىندەتى

قىزىلوردا. قازاقپارات - قىزىلوردا وبلىسى تۇرعىندارىنىڭ جالاقىسىن ءوسىرۋ - ۇكىمەت پەن وبلىس اكىمىنىڭ باستى مىندەتى.

بۇل تۋرالى پرەزيدەنت قاسىم-جومارت توقايەۆ قىزىلوردا وبلىسىنىڭ جۇرتشىلىعىمەن كەزدەسۋ بارىسىندا ايتتى، دەپ حابارلايدى قازاقپارات اقوردانىڭ Twitter- دەگى اككاۋنتىنا سىلتەمە جاساپ.

«سىر بويى - ەلدىڭ ءال-اۋقاتىن ەسەلەپ، حالقىمىزدىڭ باق-بەرەكەسىن ارتتىرعان ءوڭىر! قىزىلوردا - حالىقتىڭ تاعدىرلى شەشىمدەرى قابىلدانعان قالا»، - دەدى مەملەكەت باسشىسى.

پرەزيدەنتتىڭ ايتۋىنشا، رەسپۋبليكالىق دەڭگەيمەن سالىستىرعاندا قىزىلوردا حالقىنىڭ تۇراقتى تابىسى ءالى دە تومەن.

«ماسەلەنى ءبىر كۇندە نەمەسە ءبىر ايدا شەشۋ مۇمكىن ەمەس. مەن مۇنى تۇسىنەمىن. ءبىراق، جاعدايدى وزگەرتۋ كەرەك. ايماقتاعى ازاماتتاردىڭ جالاقىسىن ءوسىرۋ - ۇكىمەت پەن وبلىس اكىمىنىڭ باستى مىندەتى»، - دەدى ق. توقايەۆ.

سونداي-اق اتاپ وتىلگەندەي، قوعامدى مازالايتىن كەلەسى ماسەلە - ازاماتتارىمىزدىڭ ەڭبەك قۇقىعى. مەملەكەت باسشىسىنىڭ ايتۋىنشا، اسىرەسە، شەتەلدىك كومپانيالاردا جۇمىس ىستەپ جاتقان قازاقستاندىقتاردىڭ مۇددەلەرىن قورعاۋ ماڭىزدى.

بۇدان بولەك، ق. توقايەۆ ەلباسىنىڭ باستاماسىمەن ىسكە قوسىلعان بارلىق الەۋمەتتىك باعدارلامالار تولىق جۇزەگە اسىرىلاتىنىن جانە ولاردىڭ اۋقىمى كەڭەيە تۇسەتىنىن اتاپ ءوتتى.

«الەۋمەتتىك ساياساتتى ودان ءارى ءتيىمدى جۇزەگە اسىرۋعا قوسىمشا 2 تريلليون تەڭگە بولەمىز. كوپبالالى جانە تۇرمىسى تومەن وتباسىلارعا 40 مىڭ جالدامالى پاتەر سالىنادى»، - دەدى ول.

پرەزيدەنتتىڭ سوزىنشە، بيىل «اۋىل - ەل بەسىگى» باعدارلاماسى اياسىندا ءبىلىم، دەنساۋلىق ساقتاۋ، مادەنيەت، جول قۇرىلىسى سالالارىندا قۇنى 1,7 ميلليارد تەڭگە بولاتىن 60 جوبا جوسپارلانعان. «وبلىس اكىمىنە ولاردى ءوز ۋاقىتىندا ءارى ءتيىمدى جۇزەگە اسىرۋدى تاپسىرامىن»، - دەدى ق. توقايەۆ.