اسقار مامين ۇلگى بولارلىق وڭىرلەردى اتادى
«قازىرگى ۋاقىتتا ەكونوميكا ءوسىمى وڭ قارقىنمەن دامۋدا. قۇرىلىس - 8,4، ساۋدا- ساتتىق - 7,3، كولىك سالاسى - 4,8، ماشينا جاساۋ - 19,8، ونىڭ ىشىندە اۆتوموبيل ونەركاسىبى - 45,8، مەتالل كەنىن ءوندىرۋ - 14، مۇناي وڭدەۋ - 9,1 جانە جەڭىل ونەركاسىپ 27,4 پايىزعا ءوسىپ، ەكونوميكانىڭ نەگىزگى قوزعاۋشى كۇشى بولدى. وسى كورسەتكىشتەردى ودان ءارى جاقسارتۋىمىز قاجەت»، - دەدى ۇكىمەت باسشىسى.
وسى رەتتە، پرەمەر- مينيستر ەكونوميكانىڭ نەگىزگى بازالىق كورسەتكىشتەرى بويىنشا جاقسى ناتيجەلەرگە قول جەتكىزگەن وڭىرلەردىڭ جۇمىسىن ەرەكشە اتاپ ءوتتى.
«شىعىس قازاقستان وبلىسى ينۆەستيتسيالار بويىنشا - 58,3، ونەركاسىپ بويىنشا - 13,3 پايىزعا، قوستاناي وبلىسى ينۆەستيتسيالار بويىنشا - 36، قۇرىلىس بويىنشا - 21,3 پايىزعا، تۇركىستان وبلىسى ينۆەستيتسيالار بويىنشا - 32,9، قۇرلىس بويىنشا - 40,2، تۇرعىن ءۇيدى پايدالانۋعا بەرۋ بويىنشا 30 پايىزدان استامعا ءوسىم كورسەتتى. پاۆلودار وبلىسى ينۆەستيتسيالار بويىنشا - 32,1، قۇرىلىس بويىنشا - 23,9 پايىزعا، اتىراۋ وبلىسى ينۆەستيتسيالار بويىنشا - 12,3، قۇرىلىس بويىنشا - 43، تۇرعىن ءۇيدى پايدالانۋعا بەرۋ بويىنشا - 19 پايىزعا ءوسىپ وتىر. بۇل باسقا وڭىرلەرگە ۇلگى بولارلىق ءىس»، - دەدى ول.
اسقار مامين ماڭعىستاۋ، اقمولا وبلىستارى مەن ەلوردادا قۇرىلىس، ينۆەستيتسيا جانە ونەركاسىپ كورسەتكىشتەرىنىڭ تۇراقتى تەرىس ديناميكاسى بايقالىپ وتىرعانىن ايتتى.
«سونىمەن قاتار شىمكەنت قالاسىندا مۇناي وڭدەۋ زاۋىتىن قايتا جاڭعىرتۋدى ەسەپكە الماعاندا ينۆەستيتسيا مەن قۇرىلىس بويىنشا كورسەتكىشتەر وسۋدە. ءبىراق، اكىمدىك بۇل باعىتتار بويىنشا بەلسەندى جۇمىس جۇرگىزۋى قاجەت ەكەندىگىن اتاپ وتەمىن. بۇل رەتتە، جوسپارلانعان كورسەتكىشتەردىڭ تومەندەۋىنە جول بەرگەن وڭىرلەردىڭ اكىمدىكتەرىنە جوسپارلانعان دەڭگەيگە شىعۋ بويىنشا شۇعىل شارالاردى قابىلداۋدى، ال وڭ كورسەتكىشى بار وڭىرلەرگە جۇمىس قارقىنىن ارتتىرۋدى تاپسىرامىز»، - دەدى ۇكىمەت باسشىسى.
اۆتور: مارلان جيەمباي