قاسىم-جومارت توقايەۆ: بيلىك حالىقپەن بىرگە بولۋى كەرەك

ورال. قازاقپارات - ق ر پرەزيدەنتى قاسىم-جومارت توقايەۆ ب ق و- عا جۇمىس ساپارى بارىسىندا ورالداعى وقۋشىلار سارايىندا ءوڭىر جۇرتشىلىعىمەن كەزدەستى، دەپ حابارلايدى قازاقپارات ءتىلشىسى.

مەملەكەت باسشىسى سويلەگەن سوزىندە باتىس قازاقستان وبلىسىنىڭ قارقىندى دامىپ كەلە جاتقانىن، وندىرىستىك الەۋەتى زور ەكەندىگىن اتاپ ءوتىپ، ءوڭىر باسشىلىعىنا ناقتى تاپسىرمالار بەردى.

باتىس قازاقستان - مۇناي گاز وندىرەتىن جەتەكشى ءوڭىر. رەسپۋبليكاداعى مۇنايدىڭ 14، گازدىڭ 34 پايىزى وسىندا وندىرىلەدى. رەسپۋبليكا ونەركاسىپ وندىرىسىندەگى وبلىس ۇلەسى - 8 پايىز. سونداي-اق ەكسپورتتىق الەۋەتتى ارتتىرۋدا دا مۇمكىندىكتەر بار. سوندىقتان وڭدەۋ سالاسىن دامىتۋ، جوعارى تەحنولوگيالىق كاسىپورىندار اشۋ، ينۆەستيا تارتۋدا جۇيەلى جۇمىستاردى جولعا قويۋ اسا ماڭىزدى.

باتىس قازاقستان ينۆەستيتسيالىق تارتىمدى ايماققا اينالۋى قاجەت. سول سەبەپتى ينۆەستيتسيا تارتۋ كەرەك. بۇل رەتتە ۇكىمەت وبلىسقا جان- جاقتى قولداۋ كورسەتەتىن بولادى.

- وسىعان وراي وبلىس باسشىسىنا يندۋستريالىق ايماق قۇرىلىسىن جەدەلدەتۋدى تاپسىرامىن، - دەدى پرەزيدەنت - وزگە دە ناقتى جوبالاردى جۇزەگە اسىرۋ كەرەك.

ەكىنشىدەن، اگروونەركاسىپ كەشەندى سەرپىندى دامىتۋ كەرەك. وعان مۇمكىندىك بار. وبلىس ەت ونىمدەرىن ەكسپورتتاۋدا حالىقارالىق نارىققا شىعۋدا. ەۋرازيالىق ەكونوميكالىق وداق ەلدەرى مەن يرانعا قوي ەتىنىڭ ەكسپورتى 3,5 ەسەگە، سيىر ەتى 21 پايىزعا ارتتى. دەگەنمەن تۇيتكىلدى ماسەلەلەر بار. وبلىس اۋىل شارۋاشىلىعىنداعى ەڭبەك ونىمدىلىگى جونىنەن 15-ورىندا تۇر. ءوڭىر ەكونوميكاسىنداعى اۋىل شارۋاشىلىعىنىڭ ۇلەسى سوڭعى جىلدارى تومەندەپ كەلەدى. ول كوبىنەسە قۋاڭشىلىقپەن بايلانىستى. دەگەنمەن اۋىل شارۋاشىلىعى كورسەتكىشتەرىن جاقسارتۋعا مۇمكىندىكتەر بار. اسىرەسە، وبلىس ەتتى مال شارۋاشىلىعىن دامىتۋدا الەۋەتتى.

«سوندىقتان اكىمگە مينيسترلىكپەن بىرگە اگروونەركاسىپ سالاسىن دامىتۋ باعىتىندا ىقپالدى شارالاردى جۇزەگە اسىرۋدى تاپسىرامىن. اۋىل شارۋاشىلىعى جەرلەرىن پايدالانۋدىڭ اشىق تا ءتيىمدى تەتىكتەرى بولۋى قاجەت. ءونىم وتكىزۋ نارىعىن كەڭەيتىپ، اۋىل شارۋاشىلىعى تاۋارىن وندىرۋشىلەرگە قولداۋ كورسەتۋ كەرەك. اۋىل شارۋاشىلىعىن جاڭا تەحنولوگيالارعا نەگىزدەۋ ماڭىزدى. مۇنىڭ ءبارى - الداعى بەس جىلدا اتقارىلۋى ءتيىس مىندەتتەر»، دەدى قاسىم-جومارت توقايەۆ.

ءۇشىنشى مىندەت - ءوڭىر ەكونوميكاسىنىڭ درايۆەرى - تابىستى كاسىپكەرلىك اۋقىمىن كەڭەيتۋ. ازىرگە وبلىس اۋداندارىندا بيزنەس بىردەي دامىپ وتىرعان جوق. شاعىن جانە ورتا بيزنەستىڭ 90 پايىزىنان استامى، سوندا قامتىلعان تۇرعىنداردىڭ 80 پايىزى ورال قالاسى مەن ءبورلى اۋدانىندا شوعىرلانعان. نەلىكتەن وزگە اۋدانداردىڭ اكىمدەرى شاعىن بيزنەستىڭ دامۋىن ىنتالاندىرمايدى.

مەملەكەت باسشىسى سونداي- اق تۇرعىن ءۇي قۇرىلىسى، قارجىنى ءتيىمدى پايدالانۋ، ازاماتتىق قوعامدى دامىتۋ، سىبايلاس جەمقورلىقپەن كۇرەس جانە باسقا سالالارداعى وتكىر ماسەلەلەرگە توقتالىپ، الدا تۇرعان ماقسات-مىندەتتەردى اتاپ كورسەتتى.

«ءبىز جاڭا جۇمىس تارتىبىنە كوشۋىمىز كەرەك. ەڭ باستىسى، بيلىك حالىقپەن بىرگە بولۋى ءتيىس. ازاماتتاردىڭ مۇڭ-مۇقتاجىنا دەر كەزىندە قۇلاق اسىپ، مەملەكەتىمىزدى دامىتۋداعى ماڭىزدى مىندەتتەردى بىرگە جۇزەگە اسىرا ءبىلۋىمىز قاجەت»، دەدى پرەزيدەنت.