گرۋزيا پرەمەر-ءمينيسترى قازاقستانعا ساپارمەن كەلەدى - ق ر س ءى م

نۇر-سۇلتان. قازاقپارات - قازاقستانعا گرۋزيا پرەمەر-ءمينيسترى مامۋكا باحتادزە ساپارمەن كەلەدى. بۇل تۋرالى ەلوردادا وتكەن بريفينگتە ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.

«وسى اپتا ەلىمىزگە شەتەلدىك دەلەگاتسيالاردىڭ جوعارى دەڭگەيدە ءتۇرلى ساپارلارعا تولى بولادى دەپ كۇتىلۋدە. اتاپ ايتقاندا، 15-16-مامىر ارالىعىندا نۇر-سۇلتان قالاسىندا گرۋزيانىڭ پرەمەر-ءمينيسترى مامۋكا باحتادزە رەسمي ساپارمەن بولادى. ال 14-16- مامىر ارالىعىندا نۇر-سۇلتان مەن الماتى قالالارىنا قىتاي مەملەكەتتىك كەڭەسىنىڭ ۆيتسە-پرەمەرى حان چجەن جۇمىس ساپارىمەن كەلەدى»، - دەدى رەسمي وكىل.

ونىڭ سوزىنە قاراعاندا، مارتەبەلى مەيماندار ساپارلارى اياسىندا مەملەكەت باسشىلىعىمەن ءبىرقاتار ەكىجاقتى كەزدەسۋلەرى وتەدى دەپ كۇتىلۋدە. وعان قوسا، گرۋزيا پرەمەر-ءمينيسترى جانە قىتاي مەملەكەتتىك كەڭەسى ۆيتسە-پرەمەرىنىڭ نۇر-سۇلتان قالاسىنا ساپارلارىنىڭ باعدارلاماسىندا 12-استانا ەكونوميكالىق فورۋمىنىڭ رەسمي اشىلۋىنا قاتىسۋى كوزدەلىپ وتىر.