قاسىم- جومارت توقايەۆ مالىمدەمە جاسادى: «جۋسان» وپەراتسياسىنىڭ جالعاسادى
«مەنىڭ تاپسىرمام بويىنشا 7 - جانە 9 - مامىر كۇندەرى سيريادان 231 قازاقستان ازاماتى ەلگە جەتكىزىلدى، ونىڭ 156 سى - بالالار، دەنى مەكتەپ جاسىنا دەيىنگىلەر، سونىڭ ىشىندە 18 ى جەتىم بالالار. بۇل اۋقىمدى گۋمانيتارلىق اكسيا - تۇڭعىش پرەزيدەنت - ەلباسى نۇرسۇلتان نازاربايەۆتىڭ تاپسىرماسىمەن بيىل قاڭتار ايىندا جۇرگىزىلگەن «جۋسان» وپەراتسياسىنىڭ جالعاسى» ، - دەلىنگەن ق ر پرەزيدەنتىنىڭ باسپا ءسوز حاتشىسى بەرىك ءۋالي فەيسبۋكتەگى پاراقشاسىندا جاريا ەتكەن مەملەكەت باسشىسىنىڭ مالىمدەمەسىندە.
ق. توقايەۆتىڭ اتاپ وتۋىنشە، مەملەكەتتىك ورگاندار مەن ۇكىمەتتىك ەمەس ۇيىمدار ەلگە قايتارىلعان ازاماتتارمەن وڭالتۋ شارالارىن جۇرگىزدى. ولارعا مەديتسينالىق، پسيحولوگيالىق جانە الەۋمەتتىك كومەك كورسەتىلدى.
«قازىردىڭ وزىندە اتالعان جۇمىستىڭ وڭ ناتيجە بەرىپ وتىرعانىن ايتۋعا بولادى. بيىل قاڭتار ايىندا ەلگە ورالعان ايەلدەر بۇرىنعى راديكالدىق ومىرىنەن باس تارتتى، جۇمىسقا ورنالاستى، تۋىستارىمەن قايتا بايلانىس ورناتتى. بالالارى مەكتەپكە، بالاباقشاعا باردى. قاقتىعىس ايماقتارىنا شىققان قازاقستان ازاماتتارى مۇنداي ويسىز قادامعا تەرروريستەردىڭ تەرىس، شىن مانىندە، جالعان ۇگىت- ناسيحاتىنىڭ ىقپالىمەن باردى. بۇگىندە ولار جاڭا ءومىر باستاۋ ءۇشىن ءوز ەركىمەن قازاقستانعا ورالىپ جاتىر. ولاردىڭ جاساعان قاتەلىگى ءۇشىن بالالارى وزگە ەلدە قينالىپ، زارداپ شەكپەۋى ءتيىس» ، - دەدى مەملەكەت باسشىسى.
سونىمەن قاتار پرەزيدەنت قازاقستان تەرروريزممەن كۇرەس جۇرگىزۋ، سونداي- اق قيىن جاعدايدا قالعان ازاماتتارىنا قول ۇشىن سوزۋ مىندەتتەمەلەرىنەن باس تارتپايتىنىن، گۋمانيتارلىق اكتسيا جالعاسا بەرەتىنىن اتاپ وتكەن.
«ءبىز ءوز ازاماتتارىمىزدىڭ تاعدىرىنا ەشقاشان بەي- جاي قارامايمىز. اتالعان گۋمانيتارلىق وپەراتسياعا قاتىسقان سىرتقى ىستەر مينيسترلىگىنىڭ، ۇلتتىق قاۋىپسىزدىك كوميتەتىنىڭ جانە باسقا دا مەملەكەتتىك ورگانداردىڭ قىزمەتكەرلەرىنە جانە شەتەلدىك سەرىكتەستەرگە العىسىمدى بىلدىرەمىن» ، - دەدى ق. توقايەۆ.