جاھاندىق جىلىنۋ الەۋمەتتىك تەڭسىزدىكتى ارتتىرادى
«سوڭعى ەلۋ جىلدا كليماتتىڭ وزگەرۋى مەملەكەتتەر اراسىنداعى تەڭسىزدىكتى ارتتىرا ءتۇستى. عالىمدار سوڭعى زەرتتەۋ ناتيجەسىندە انىقتاعانداي، كليماتتىڭ وزگەرۋى سالدارىنان كەدەي مەملەكەتتەردە دامۋ جىلدامدىعى باسەڭدەپ، كەيبىر باي مەملەكەتتەر ودان سايىن بايىپ كەتتى»، دەپ جازادى باسىلىم.
اۆتوردىڭ ايتۋىنشا، مۇنداي زەرتتەۋدى كاليفورنياداعى ستەنفورد ۋنيۆەرسيتەتىنىڭ ماماندارى جۇرگىزگەن جانە ولار انىقتاعانداي، بۇگىنگى تاڭدا ەڭ باي جانە ەڭ كەدەي مەملەكەت اراسىنداعى ايىرماشىلىق جاھاندىق جىلىنۋ سالدارىنان 25 پايىزعا ارتقان.
«جاھاندىق جىلىنۋدان ەڭ الدىمەن افريكا ەلدەرى زارداپ شەكتى. ال حالىقارالىق ۆاليۋتا قورىنىڭ ايتۋىنشا، بيىل ءۇندىستان الەم بويىنشا ەكونوميكاسى ۇلكەن بەسىنشى مەملەكەتكە اينالادى. دەگەنمەن، ءۇندىستاندا جاھاندىق جىلىنۋ كەسىرىنەن 2010 -جىلى مەملەكەتتەگى ءى ج ءو 31 پايىزعا ازايعان. ال الەمدەگى ەكونوميكاسى توعىزىنشى ورىندا تۇرعان برازيليادا بۇل كورسەتكىش 25 پايىزدى قۇرايدى»، دەپ جازادى باسىلىم.
عالىمداردىڭ ايتۋىنشا، كەيبىر باي مەملەكەتتەردە جان باسىنا شاققانداعى ءى ج ءو- ءنىڭ ارتۋىنا دا جاھاندىق جىلىنۋ اسەر ەتكەن.
«زەرتتەۋ بارىسىندا 165 مەملەكەتتىڭ 1961-2010 -جىلدار ارالىعىنداعى اۋا تەمپەراتۋراسى مەن ەكونوميكالىق وزگەرىستەرى ەسكەرىلدى. عالىمدار اۋا تەمپەراتۋراسى تۇراقتى مەملەكەتتەردە ەكونوميكا ءوسىپ، ىستىق جەرلەردە باسەڭدەپ وتىرعانىن انىقتادى. بۇل زەرتتەۋ جاھاندىق جىلىنۋدىڭ كوپتەگەن سالالارعا اسەر ەتەتىنىن تاعى ءبىر دالەلدەدى. ساياساتكەرلەر كليماتتىڭ وزگەرۋىنە باسا ءمان بەرىپ، قايتا جاڭعىرتىلاتىن ەنەرگيا كوزدەرىنە باسىمدىق بەرۋدى العا قويۋلارى كەرەك»، دەپ جازادى باسىلىم.
اۆتور: ايكۇمىس بولاتبەك