ق ر پرەزيدەنتى الاكول ايماعىن دامىتۋ بويىنشا كەشەندى شارالاردى قولعا الۋدى تاپسىردى

نۇر-سۇلتان. قازاقپارات - شىعىس قازاقستان وبلىسىنداعى جولداردىڭ جاعدايى تىكەلەي مەملەكەت باسشىسىنىڭ باقىلاۋىندا بولادى.

بۇل تۋرالى بۇگىن ق ر پرەزيدەنتىنىڭ باسپا ءسوز حاتشىسى بەرىك ءۋالي facebook-تەگى پاراقشاسىندا جازدى.

«مەملەكەت باسشىسى شىعىس قازاقستان جانە الماتى وبلىستارىنا ساپارى بارىسىندا جەرگىلىكتى اۆتوجولداردىڭ ساپاسىنىڭ سىن كوتەرمەيتىنىن جانە الاكولدەگى تۋريستىك سەرۆيستى جاقسارتۋ تۋرالى ايتقان ەدى. وسىعان وراي، ۇكىمەتكە جانە ەكى ءوڭىردىڭ اكىمدەرىنە قىسقا مەرزىمدە كەشەندى شارالار ۇيىمداستىرۋعا تاپسىرما بەرگەن بولاتىن. قۇزىرلى مەكەمەلەر پرەزيدەنتتىڭ وسى سىندارىنان قورىتىندى شىعارادى دەپ ويلايمىز. بۇل مەملەكەت باسشىسىنىڭ تىكەلەي باقىلاۋىندا»، - دەپ جازدى بەرىك ءۋالي.

«وتكەن جىلى قازاقستاندىقتار ءوزىمىزدىڭ الاكولدە دەمالۋدى ءجون كورگەن ەدى. الايدا ولار سەرۆيستىك قىزمەت كورسەتۋ سالاسىندا ايتارلىقتاي پروبلەمالار بار ەكەندىگىن كوردى. ناقتىراق ايتقاندا مۇندا قىدىرىپ كەلۋشىلەردىڭ جەرگىلىكتى جولداردىڭ ساپاسىنا كوڭىلى تولمادى. وسى رەتتە الماتى جانە شىعىس قازاقستان وبلىسى اكىمدەرىنىڭ باستى مىندەتتەرى جولدى جوندەۋ جانە ونىمەن بايلانىستى سالالاردىڭ جۇمىسىن رەتكە كەلتىرۋ بولىپ تابىلادى»، - دەدى ق ر پرەزيدەنتى.

سونداي-اق مەملەكەت باسشىسى وبلىستىڭ تۋريستەردىڭ ەڭ كوپ قاتىنايتىن جەرلەرىنىڭ بىرىنە اينالعاندىعىن اتاپ ءوتتى. بۇل رەتتە قر پرەزيدەنتى ءوزىنىڭ شيپالى سۋىمەن تانىمال الاكول كولىنىڭ ورنى ەرەكشە ەكەندىگىن اتاپ ءوتتى.

«تەك وتكەن جىلدىڭ وزىندە عانا وڭىرگە كەلۋشى تۋريستەر سانى 20 پايىزعا ارتىپ، 2 ميلليون ادامدى قۇرادى. بۇل وتە جاقسى كورسەتكىش. الايدا مۇندا كولىك، ءتىپتى قوناق ءۇي ينفراقۇرىلىمى دا ايتارلىقتاي جەتىلدىرۋدى قاجەت ەتەدى. اسىرەسە تۋريستەر جۇرەتىن جولداردىڭ جاعدايىنا ەرەكشە كوڭىل ءبولۋ قاجەت. بۇل ماسەلەلەردى مەن شىعىس قازاقستان وبلىسىنا جاساعان ساپارىمدا دا ايتتىم. وسى ورايدا مەن ۇكىمەتكە اكىمدىكپەن بىرلەسە وتىرىپ، كۋرورت ايماعىنىڭ ينفراقۇرىلىمىن دامىتۋ بويىنشا كەشەندى شارالاردى قولعا الۋدى تاپسىرامىن»، - دەدى قاسىم-جومارت توقايەۆ.