ەلىمىزدە اۋە بيلەتتەرى قىمباتتادى
بۇعان سەبەپ بولعان مەرەكە كۇندەرى. دەمالىستا دىتتەگەن جەرىنە ۇشاقپەن جەتۋ ءۇشىن قازاقستاندىقتاردىڭ قالتاسى ءبىرشاما سوماعا قاعىلاتىن بولدى.
باعانى ساراپتاۋ ءۇشىن ءبىز سولتۇستىك، وڭتۇستىك، باتىس جانە شىعىس وڭىرلەردى قاراستىردىق. اۋە كومپانيالاردىڭ سايتتارىنداعى مامىردىڭ 9 ى مەن 12 ءسى ارالىعىنا ارنالعان بيلەت باعاسىن سالىستىردىق. سونىمەن، دەمالىستا ەلوردادان قوستانايعا تىكەلەي اۋە رەيسىمەن بارىپ-كەلۋ - 80 مىڭ تەڭگە. شىمكەنتكە ءسال ارزان. 70 مىڭ تەڭگەدەن اسادى. ال نۇر-سۇلتان-اتىراۋ باعىتىندا ۇشاتىن تۇرعىندارعا بارىپ كەلۋ قۇنى - 96 مىڭ تەڭگە.
ءبىراق ەڭ قىمبات باعا نۇر-سۇلتان-وسكەمەن باعىتىندا تىركەلدى. شىعىسقا بارىپ كەلۋ ءۇشىن قالتاڭىزدا كەم دەگەندە 120 مىڭ تەڭگە بولۋى كەرەك.
سونداي-اق، تۇرعىندار ءجيى پايدالاناتىن نۇر-سۇلتان-الماتى باعىتىنداعى رەيستەرگە ەڭ ارزان اۋە بيلەتتەرى - 50 مىڭ تەڭگە. مەرەكە كۇندەرى بولعاندىقتان بيلەتتەر شامامەن ەكى ەسە قىمباتتاعان.
مىسالى، مامىردىڭ 13 ءسى مەن 16 سى ارالىعىندا الماتىعا، دەمالىس كۇندەرىنە قاراعاندا، ەكى ەسە ارزان باعاعا بارۋعا بولادى. بيلەت قۇنى - 28 مىڭ تەڭگە. ال وسكەمەنگە ۇشاقپەن بارىپ- كەلۋ - 36 مىڭ تەڭگە، اتىراۋعا - 56 مىڭ تەڭگە. ال شىرايلى شىمكەنتكە اۋە جولدارى ارقىلى 35 مىڭ تەڭگەگە بارىپ كەلۋگە بولادى. ۇشاق بيلەتتەرىنىڭ قۇنىن قالتاسى كوتەرمەيتىن تۇرعىندار دىتتەگەن جەرىنە پويىزبەن جەتەدى. بايقاعانىمىزداي، تەمىرجول بيلەتتەرىنىڭ باعاسى ازىرشە وزگەرمەگەن.