تەمىرلان كولباي «باتىس قازاقستان وبلىسىنىڭ بارىسى» اتاندى
قازاق كۇرەسى دوداسىنا بارلىعى 14 بالۋان قاتىسىپ، باق سىنادى.
جارىستىڭ باس تورەشىسى ارتۋر شەرعاليەۆتىڭ ايتۋىنشا، ولاردىڭ 12 ءسى وبلىس اۋداندارىنان ىرىكتەلىپ كەلسە، ەكەۋى ورال قالاسىنىڭ نامىسىن قورعادى.
ءبورلى اۋدانىنىڭ وكىلى، وتكەن جىلى دا وبلىستىق كەزەڭدە وزىپ شىققان، سونىمەن قاتار سامبو مەن دزيۋدودان حالىقارالىق دودالاردا جۇلدە الىپ جۇرگەن تەمىرلان كولباي (سالماعى 115 كەلى، باپكەرى - قاسىم قاجەنوۆ) ءوزىنىڭ بابىندا ەكەنىن كورسەتتى.
تەمىرلان اۋەلى وتكەن جىلى وزىمەن فينالدا بەلدەسكەن سىرىمدىق اسقار نۇرمۇحانوۆتى تازا جەڭدى. سودان كەيىن جارتىلاي فينالدا وزىمەن بىرگە 2017-جىلى «قازاقستان بارىسى» رەسپۋبليكالىق تۋرنيرىنە قاتىسقان قازتالوۆتىق ەرنازار حامزيندى تازا ءتۇسىردى.
فينالدا ت. كولباي مەن «قازاقستان بارىسى» رەسپۋبليكالىق ءتۋرنيرىنىڭ تاعى ءبىر قاتىسۋشىسى، ورالدىق ولجاس سۇلەيمەنوۆ (101 كەلى، باپكەرى - قايرات بەرسەبايەۆ) بەلدەستى. الدىمەن بالۋاندار اڭدىسىپ جۇرگەنىمەن، تەمىرلان ولجاستان ايلاسىن اسىرىپ، جاۋىرىنىن جەر يىسكەتتى. وسىلايشا ول چەمپيوندىق اتاق پەن بەلبەۋدى جەڭىپ الدى. ەندى ت. كولباي مەن و. سۇلەيمەنوۆ شىلدە ايىندا وتەتىن «قازاقستان بارىسىنا» بارادى.
بۇل جارىستاعى جاڭا ەسىم دەپ شىڭعىرلاۋلىق، سالماعى اۋىر ءارى جاس، 1999-جىلعى داۋرەن زاكارەيەۆتى (135 كەلى، باپكەرى - قايسار قۇسايىنوۆ) ايتۋعا بولادى. ول جارتىلاي فينالعا دەيىن سۇرىنبەي جەتتى. فينال جولداماسى ءۇشىن تارتىستى باسەكەدە ولجاس سۇلەيمەنوۆكە جول بەردى. سودان كەيىن قولا جۇلدە ءۇشىن بەلدەسۋدە وزىنەن سالماعى 45 كەلىگە كەم، 25 جاسار قازتالوۆتىق ەرنازار حامزيننەن (90 كەلى، باپكەرى - جەڭىس ستامعازيەۆ) دە تازا جەڭىلىپ قالدى.
قازاق كۇرەسىنەن سالماق تا ءوز ءرولىن اتقارادى. وسى ورايدا ۇزبەي جاتتىعىپ، بابى كەلىسسە، د. زاكارەيەۆ الداعى ۋاقىتتا توپ جارۋى مۇمكىن.
سونىمەن، وبلىستىق جارىستا ت. كولباي - ءبىرىنشى (500 مىڭ تەڭگە)، و. سۇلەيمەنوۆ - ەكىنشى (200 مىڭ تەڭگە)، ە. حامزين ءۇشىنشى (100 مىڭ تەڭگە) ورىنعا يە بولدى.
ەسكە سالا كەتەيىك، وتكەن جىلى «قازاقستان بارىسى» تۋرنيرىنە ب ق و- دان جولدامانى ت. كولباي مەن ا. نۇرمۇحانوۆ العان بولاتىن.