بيىلعى سايلاۋ ساياسي تاپتىڭ جاڭارۋ ترەندىنە دالەل بولادى - ەرلان قارين

نۇر-سۇلتان. قازاقپارات - پرەزيدەنتتىككە كانديداتتاردىڭ باسىم بولىگىنىڭ سايلاۋعا العاش رەت قاتىسۋى ساياسي تاپتىڭ جاڭارۋ ترەندىنە دالەل بولادى.

بۇل تۋرالى ق ر پرەزيدەنتىنىڭ كەڭەسشىسى ەرلان قارين Telegram-داعى پاراقشاسىندا جازدى، دەپ حابارلايدى قازاقپارات ءتىلشىسى.

«سونىمەن، بۇگىن سوڭعى كانديدات تىركەلدى. تىركەۋ كەزەڭى رەسمي ءالى دە اياقتالماعانىنا قاراماستان ۇسىنىلعانداردىڭ بارلىعى دا قول قويۋ پاراقتارىن جيناپ، تىركەلىپ ۇلگەردى. ال بۇل پرەزيدەنتتىك لاۋازىمعا ۇمىتكەرلەردىڭ شورت-پاراقشاسى مەرزىمىنەن بۇرىن انىقتالدى دەگەندى بىلدىرەدى»، - دەپ جازدى ول.

سونىمەن قاتار ەرلان قارين 2019 -جىلعى سايلاۋدىڭ ەرەكشەلىگى بۇل عانا ەمەستىگىنە نازار اۋدارتادى.

«كانديداتتاردىڭ ەڭ كوپ سانى تىركەلدى - 7. ءبىر ۇمىتكەر ەمتيحان تاپسىرا المادى، تاعى ءبىرى وزدىگىنەن باس تارتتى. وسىلايشا، تىركەۋ كەزەڭىنەن كانديداتتىق وتىنىمدەردىڭ 80 پايىزعا جۋىعى ءوتتى. ءىس جۇزىندە بارلىق كانديداتتار (بىرەۋىنەن باسقاسى) پرەزيدەنتتىك سايلاۋعا العاش رەت قاتىسىپ وتىر. بۇل ساياسي تاپتىڭ جاڭارۋ ترەندىنە دالەل بولا الادى. سايلاۋ ناۋقانىنىڭ بەلسەندى كەزەڭىندە ساياسي كۇشتەردىڭ بارلىق نەگىزگى پاليتراسى - سولشىل، وڭشىلدار، ورتالىقشىل، سونىمەن قاتار العاش رەت ۇلتتىق- پاتريوتتىق بلوك كانديداتى سايلاۋعا قاتىسادى»، - دەدى ساياساتتانۋشى.

ونىڭ پايىمىنشا، وسىلايشا اشىق ءارى باسەكەگە تولى سايلاۋ وتەتىندىگى ناقتىلانىپ وتىر. كانديداتتار سانىنىڭ كوپ بولۋى سايلاۋ پروتسەسىنىڭ بەلسەندى كەزەڭىنە ەلىمىزدەگى نەگىزگى ساياسي كۇشتەردىڭ، ونىڭ ىشىندە وپپوزيتسيانىڭ دا قاتىساتىنىن بىلدىرەدى.

«كانديداتتاردىڭ باسىم بولىگى سايلاۋ ناۋقانىنا العاش رەت قاتىسىپ وتىر، جاڭا تۇلعالار پايدا بولدى. سوعان وراي سايلاۋشىلاردا سايلاۋ ءۇشىن ءارتۇرى بالاما بولادى»، - دەدى ە. قارين.

ايتا كەتەيىك، 2019 -جىلدىڭ 9 -ماۋسىمىندا وتەتىن كەزەكتەن تىس پرەزيدەنتتىك سايلاۋعا 7 كانديدات تىركەلدى. الدىمەن قازىرگى ءىس باسىنداعى پرەزيدەنت قاسىم-جومارت توقايەۆ كانديدات رەتىندەگى كۋالىگىن الدى.

ودان كەيىن «ۇلى دالا قىراندارى» رەسپۋبليكالىق قوعامدىق مادەني- الەۋمەتتىك بىرلەستىگى پرەزيدەنتتىككە كانديدات رەتىندە ۇسىنعان ءسادى-بەك تۇگەل دە بارلىق سىننان سۇرىنبەي ءوتىپ، پرەزيدەنتتىككە كانديدات اتاندى.

ەلىمىزدىڭ كاسىپوداقتار فەدەراتسياسى اتىنان شىققان ۇمىتكەر امانگەلدى تاسپيحوۆ تا الماتى مەن شىمكەنتتەن باسقا ەلىمىزدىڭ 15 وڭىرىنەن 119577 راستالعان قول جيناي الىپ، كانديدات رەتىندە تىركەلدى.

كانديدات كۋالىگىن العان «اقجولدىق» ءدانيا ەسپايەۆا ەل تاريحىندا العاشقى ايەل كانديدات رەتىندە قالاتىندىعى انىق.

ال بۇگىن جامبىل احمەتبەكوۆ، تولەۋتاي راحىمبەكوۆ جانە ءامىرجان قوسانوۆ پرەزيدەنتتىك سايلاۋدا كانديدات رەتىندە تىركەلگەنى بەلگىلى بولدى.