قاسىم- جومارت توقايەۆ: مەملەكەت قاۋىپسىزدىگىن قورعاۋ - وتان كۇزەتىندەگى ءار ازاماتتىڭ پارىزى

نۇر- سۇلتان. قازاقپارات - بۇگىن اقوردادا ق ر پرەزيدەنتى قاسىم- جومارت توقايەۆ وتان قورعاۋشىلار كۇنىنە وراي ءمىنسىز اسكەري قىزمەتىمەن، ەرەن ەڭبەگىمەن دارالانعان ازاماتتاردى ماراپاتتاپ جاتىر، دەپ حابارلايدى قازاقپارات ءتىلشىسى.

 «قۇرمەتتى ساردارلار مەن ساربازدار! بارشاڭىزدى وتان قورعاۋشىلار كۇنىمەن جانە ۇلى جەڭىس مەيرامىمەن شىن جۇرەكتەن قۇتتىقتايمىن. ءبىز بابالارىمىزدىڭ ەرلىگىن قاستەرلەپ، ەلدىك جولىن جالعاعان ۇرپاقپىز. مەملەكەتىمىزدىڭ قاۋىپسىزدىگىن قورعاۋ - وتان كۇزەتىندەگى ءاربىر ازاماتتىڭ قاسيەتتى پارىزى. ەلباسىمىزدىڭ قاجىرلى ەڭبەگىنىڭ ارقاسىندا ءبىز بۇگىندە قازاقستاننىڭ شەكاراسىن بۇتىندەپ، ىرگەسىن بەكىتتىك. ءبىزدىڭ الدىمىزدا تۇرعان ماڭىزدى مىندەت - وسى بەيبىتشىلىك پەن تۇراقتىلىقتى ساقتاپ قالۋ»، - دەدى ق ر پرەزيدەنتى.

 مەملەكەت باسشىسى تاۋەلسىزدىكتىڭ العاشقى جىلدارىندا ەلىمىزدە جوعارى ساناتتى، بىلىكتى ساردارلار وتە از بولعانىن اتاپ ءوتتى. تۇڭعىش پرەزيدەنتىمىز ءار ساربازدى جىگەرلەندىرە وتىرىپ، ايبىندى اسكەر قۇرعانىن ەسكە سالدى.

 «بۇگىندە ءبىزدىڭ كۇشتىك قۇرىلىمدارىمىز زاماناۋي تەحنيكا مەن تەحنولوگيانى مەڭگەرگەن. ولار كەز كەلگەن قاۋىپ- قاتەرگە قارسى سوققى بەرە الاتىن ايبىندى ءارى موبيلدى كۇشكە اينالدى. جاقىندا عانا وتكەن «ايبالتا-2019» وقۋ- جاتتىعۋ سونىڭ ايقىن دالەلى. جاۋىنگەرلەردىڭ اسكەري وقۋ- جاتتىعۋلارىن ءوزىم ارنايى بارىپ كوردىم. ەر جىگىت جۇرەگىن ەلگە بەرەدى، نامىسىن ەشكىمگە بەرمەيدى. مىنە، بۇگىن ورتامىزدا ەلىمىز بەن جەرىمىزدى ادالدىقپەن ايانباي قورعاعان قاھارماندار تۇر. ولاردىڭ اراسىندا ادام ءومىرىن ورتتەن، سۋدان اراشالاپ قالعان بەيبىت كۇننىڭ باتىرلارى بار. سىزدەردىڭ بەيبىت كۇندەگى ەرلىكتەرىڭىز بەن يگى ىستەرىڭىز وسكەلەڭ ۇرپاققا ۇلگى بولۋى ءتيىس. سوندىقتان بۇگىن ءبىز ءمىنسىز اسكەري قىزمەتىمەن، ەرەن ەڭبەگىمەن دارالانعان ازاماتتاردى ماراپاتتاۋ ءۇشىن جينالىپ وتىرمىز»، - دەدى قاسىم- جومارت توقايەۆ سالتاناتتى شارا بارىسىندا.

اۆتور: مارلان جيەمباي