سايلاۋالدى ۇگىت-ناسيحاتقا شەتەل ماماندارى تارتىلمايدى - توقايەۆتىڭ شتابى

نۇر-سۇلتان. قازاقپارات - ق ر پرەزيدەنتتىگىنە كانديدات قاسىم-جومارت توقايەۆتىڭ سەنىمدى وكىلى، رەسپۋبليكالىق قوعامدىق شتاب باسشىسى ماۋلەن اشىمبايەۆ سايلاۋالدى ۇگىت-ناسيحاتقا شەتەلدىك مامانداردىڭ تارتىلمايتىنىن مالىمدەدى، دەپ حابارلايدى قازاقپارات ءتىلشىسى.

«قازىرگى كەزدە قوعامدىق شتابقا شەتەلدەن ساياسي تەحنولوگيالار بويىنشا مامانداردى تارتۋعا قاتىستى سۇراقتار بولىپ جاتىر. وسى ماسەلە بويىنشا مەنىڭ ايتاتىنىم، ءبىزدىڭ رەسپۋبليكالىق قوعامدىق شتابىمىز شەتەلدەن ارنايى مامانداردى تارتقان جوق. قازاقستاننىڭ وزىندە ماماندار بار. الەۋمەت تانۋشىلار، ساياسي سالا ماماندارى، جۋرناليستەر - ءبارى ءبىلىمدى ماماندار. سوندىقتان ءبىز شتابتىڭ جۇمىسىنا وسىنداي ازاماتتاردى تارتىپ جاتىرمىز. ويتكەنى قازىرگى زاماندا ءاربىر ماسەلەنىڭ ءوزىنىڭ تەحنولوگيالارى مەن تەتىكتەرىن پايدالانۋ كەرەك. شەتەلدەن ەشكىمدى شاقىرعان جوقپىز. ءوزىمىزدىڭ ماماندارىمىزدى تارتىپ، ولارمەن بىرگە جۇمىس جاساپ جاتىرمىز»، - دەدى م. اشىمبايەۆ جۋرناليستەرگە بەرگەن سۇحباتىندا.

ونىڭ ايتۋىنشا، ق ر پرەزيدەنتتىگىنە كانديدات قاسىم-جومارت توقايەۆتىڭ سايلاۋالدى باعدارلاماسى دايىن. بۇگىندە اتالعان قۇجاتتىڭ كەيبىر تۇستارى پىسىقتالىپ جاتىر.

«ءبىز كانديداتىمىزدىڭ سايلاۋالدى باعدارلاماسى بويىنشا نەگىزگى تەزيستەردى 11 -مامىردا جاريالايمىز. وعان دەيىن ۇگىت-ناسيحات جۇمىستارىن جۇرگىزۋگە بولمايدى. سول سەبەپتى 11 -مامىردا ساعات 18:00-دەن باستاپ ۇگىت- ناسيحاتتى باستاپ، قاسىم-جومارت كەمەل ۇلى توقايەۆتىڭ سايلاۋالدى باعدارلاماسىن دا تانىستىراتىن بولامىز»، - دەپ اتاپ كورسەتتى م. اشىمبايەۆ.

ايتا كەتەيىك، ەلوردادا ق ر پرەزيدەنتتىگىنە كانديدات قاسىم-جومارت توقايەۆتىڭ رەسپۋبليكالىق قوعامدىق شتابى قۇرىلدى. بۇدان بولەك، ۇگىت-ناسيحات شارالارى كەزىندە قالالىق، وبلىستىق جانە اۋداندىق شتابتار جۇمىس ىستەيتىن بولادى. بۇگىن «Nur Otan» پارتياسى ءتوراعاسىنىڭ ورىنباسارى ماۋلەن اشىمبايەۆ رەسپۋبليكالىق شتابقا كىمدەردىڭ كىرگەنىن ايتىپ بەردى.

شتاب الەۋمەتتىك جەلىلەرگە ۇلكەن باسىمدىق بەرەتىن بولادى.