سايلاۋداعى ۇگىت-ناسيحاتتا ءبىز الەۋمەتتىك جەلىلەرگە باسىمدىق بەرەمىز - ماۋلەن اشىمبايەۆ
ونىڭ ايتۋىنشا، سايلاۋالدى ۇگىت-ناسيحات كەزىندە جاڭا اقپاراتتىق تەحنولوگيالاردى قولدانۋ قاجەت. سەبەبى بيىلعى سايلاۋدا الەۋمەتتىك جەلىلەردىڭ ءرولى ارتىپ وتىر.
«ءيا، وسى جولعى سايلاۋ كەزىندە العاش رەت قوعامدىق پىكىردى قالىپتاستىرۋ مەن حالىقتىڭ ويىنا اسەر ەتۋ جاعىنان الەۋمەتتىك جەلىلەر ۇلكەن ءرول اتقاراتىن بولادى. وسىعان بايلانىستى رەسپۋبليكالىق قوعامدىق شتابتىڭ جۇمىسى كەزىندە ءبىز الەۋمەتتىك جەلىلەرگە باسا نازار اۋدارامىز. وسىنى بولەك ءبىر باعىت رەتىندە شىعارىپ وتىرمىز. اتالعان جۇمىسقا پارتيا قىزمەتكەرلەرى مەن ماماندار اتسالىسادى. الەۋمەتتىك جەلىلەرگە باسىمدىق بەرەتىن بولامىز. بۇرىنعى سايلاۋلاردا الەۋمەتتىك جەلىلەر ونداي ءرول ويناماعان. ال وسى جولى جاعداي مۇلدەم باسقاشا. سوندىقتان بۇل سايلاۋدىڭ ۇلكەن ءبىر ەرەكشەلىگى دەسەك بولادى»، - دەدى م. اشىمبايەۆ جۋرناليستەرگە بەرگەن سۇحباتىندا.
شتاب باسشىسىنىڭ سوزىنە قاراعاندا، الەۋمەتتىك جەلىلەر ارقىلى ۇگىت-ناسيحات شارالارى زاڭ بويىنشا جۇرگىزىلەدى. وعان ەشكىمدى مىندەتتەمەيدى. ماسەلەن، بۇگىندە شتابتىڭ جانىنان جاستار قاناتى قۇرىلدى. وعان كىرەتىن جاستاردىڭ ىشىندە الەۋمەتتىك جەلىلەردە بەلسەندى ءارى وقىرمانى كوپ ادامدار بار. ولاردىڭ بارلىعى ق ر پرەزيدەنتتىگىنە كانديدات قاسىم-جومارت توقايەۆتىڭ سەنىمدى وكىلى رەتىندە وزدەرىنىڭ جەكە پاراقشالارىندا سايلاۋالدى ۇگىت- ناسيحاتتى جۇرگىزە الادى. «كانديداتتىڭ سەنىمدى وكىلدەرى ۇگىت- ناسيحات ءۇشىن اقشا المايدى. ال قوسىمشا ءبىر پلاتفورمالار نەمەسە پابليكتەر تارتىلسا، زاڭ بويىنشا اقى تولەۋ كەرەك»، - دەپ اتاپ كورسەتتى م. اشىمبايەۆ.
ايتا كەتەيىك، ەلوردادا قر پرەزيدەنتتىگىنە كانديدات قاسىم-جومارت توقايەۆتىڭ رەسپۋبليكالىق قوعامدىق شتابى قۇرىلدى. بۇدان بولەك، ۇگىت- ناسيحات شارالارى كەزىندە قالالىق، وبلىستىق جانە اۋداندىق شتابتار جۇمىس ىستەيتىن بولادى. بۇگىن "Nur Otan" پارتياسى ءتوراعاسىنىڭ ورىنباسارى ماۋلەن اشىمبايەۆ رەسپۋبليكالىق شتابقا كىمدەردىڭ كىرگەنىن ايتىپ بەردى.