قازاق پەن قىرعىزدى ادەبي- مادەني بايلانىس جاقىنداتا تۇسەدى - جانسەيىت تۇيمەبايەۆ
بۇل تۋرالى قازاقستان حالقى اسسامبلەياسىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
قىرعىز ەلىنىڭ استاناسى - بىشكەك قالاسىنداعى «ەنە- ساي» مەملەكەتتىك رەزيدەنتسياسىندا وتكەن شاراعا جوعارى لاۋازىمدى تۇلعالار، مەملەكەتتىك ورگان باسشىلارى، رەسپۋبليكانىڭ تۇكپىر- تۇكپىرىنەن جانە شەت مەملەكەتتەن دەلەگاتتار شاقىرىلعان.
سالتاناتتى ءىس- شارانى قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ ءسوز سويلەپ اشتى. ەل پرەزيدەنتىنىڭ سوزىنەن كەيىن كورشىلەس رەسەي، قازاقستان، وزبەكستان مەملەكەتتەرىنىڭ وكىلدەرى ءسوز الدى.
قازاقستان حالقى اسسامبلەياسى ءتوراعاسىنىڭ ورىنباسارى جانسەيىت تۇيمەبايەۆ ءوز سوزىندە كوپ ۇلتتى قىرعىزستاننىڭ ىشكى جانە سىرتقى ساياساتىن ازاماتتارىنىڭ ءال- اۋقاتىن جاقسارتۋعا باعىتتاپ وتىرعانىنا توقتالدى. سونداي- اق، قىرعىزستان حالقى اسسامبلەياسىنىڭ ەتنوسارالىق ءوزارا ءىس- قيمىل جاساۋدىڭ ءتيىمدى ينستيتۋتىنا جانە بىرلىكتىڭ مىزعىماس تۇعىرىنا اينالعانىن اتاپ كورسەتتى.
جانسەيىت تۇيمەبايەۆ ەكى ەل تاريحى مەن ادەبيەتىنەن قازاق- قىرعىز اراسىن جاقىنداتاتىن مىسالدار كەلتىرە وتىرىپ، ءتۇپ- تامىرى تەرەڭ مادەني بايلانىستار قوس ەلدى بىرىكتىرە تۇسەتىنىنە توقتالدى.
«كونە تۇركى داۋىرىنەن باستاۋ الاتىن قىرعىز ادەبيەتى قاي كەزدە دە قازاق ادەبيەتىمەن تىعىز بايلانىستا دامىدى. ادەبيەتتىڭ كەيبىر ۇلگىلەرىنىڭ ەكى ەلدە ءبىر مەزگىلدە دامۋىنىڭ مىسالدارى وتە كوپ. ءبىزدىڭ اسان قايعى، كەت بۇعا، الدار كوسە، تولىباي سىنشى سياقتى تۇلعالارىمىز دا ورتاق. حالىق اقىنى االى توقومبايەۆ ءوزىنىڭ ادەبي ەڭبەگىنىڭ العاشقى كۇندەرىنەن باستاپ ابايدى ۇستاز تۇتىپ، ۇلى اقىننىڭ ولەڭدەرىن تۇگەلگە جۋىق قىرعىز تىلىنە اۋداردى» ، - دەپ اتاپ ءوتتى جانسەيىت قانسەيىت ۇلى.
قىرعىز اۋىز ادەبيەتىنىڭ جارقىن ۇلگىسى «ماناس» جىرىنىڭ حاتقا ءتۇسىپ، ساقتالۋىنا ۇلەس قوسقان شوقان ءۋاليحانوۆ پەن مۇحتار اۋەزوۆتىڭ ەڭبەكتەرى دە ەسكە الىندى. زاڭعار جازۋشى شىڭعىس ايتماتوۆتىڭ قازاق اقىن- جازۋشىلارى قالتاي مۇحامەدجانوۆ، مۇحتار شاحانوۆ، ولجاس سۇلەيمەنوۆ، زەينوللا قابدولوۆ، شەرحان مۇرتازامەن دوستىق قارىم- قاتىناسىن كەيىنگى بۋىنعا ۇلگى ەتتى.
سونىمەن قاتار، قوس مەملەكەتتىڭ اسسامبلەيالارى اراسىنداعى دوستىق، سەرىكتەستىك قاتىناستىڭ قالىپتاسقانى، قازاقستاندا تۇراتىن قىرعىز ەتنوسىنا كورسەتىلىپ وتىرعان قولداۋ تۋرالى كەڭىنەن اڭگىمەلەدى. مىسالى، قازاقستاندا 9 ەتنومادەني بىرلەستىك تىركەلگەنى، جەكسەنبىلىك ەكى مەكتەپ جۇمىس ىستەيتىنى، ولارعا قاجەتتى وقۋ قۇرالدارىنىڭ مەملەكەتتىك بيۋدجەت ەسەبىنەن شىعارىلاتىنى، قازاقستاندا ەڭبەك ەتىپ جاتقان قىرعىزدان شىققان بەلگىلى ازاماتتار تۋرالى اقپاراتتى زال قوشەمەتپەن قابىلدادى.