قاسىم- جومارت توقايەۆ ازاماتتاردىڭ قانشا قولداۋ قولىن جينادى
بۇل تۋرالى بۇگىن ق ر ورتالىق سايلاۋ كوميسسياسىنىڭ وتىرىسىندا كوميسسيا حاتشىسى ءسابيلا مۇستافينا ايتتى، دەپ حابارلايدى قازاقپارات ءتىلشىسى.
«ورتالىق سايلاۋ كوميسسياسىنا كانديداتتى تىركەۋ ءۇشىن مىناداي قۇجاتتار: پرەزيدەنتتىككە كانديدات قاسىم- جومارت كەمەل ۇلى توقايەۆتىڭ كىرىستەرى مەن مۇلكى جونىندە دەكلاراتسيا تاپسىرعانى تۋرالى مەملەكەتتىك كىرىستەر ورگانىنىڭ انىقتاماسى؛ پرەزيدەنتتىككە كانديدات قاسىم- جومارت كەمەل ۇلى توقايەۆتىڭ ونى تىركەۋگە كەدەرگى كەلتىرەتىن اۋرۋلاردىڭ جوقتىعى تۋرالى مەديتسينالىق قورىتىندى؛ وبلىستاردىڭ، رەسپۋبليكالىق ماڭىزى بار قالالاردىڭ جانە قازاقستان رەسپۋبليكاسى استاناسىنىڭ اۋماقتىق سايلاۋ كوميسسيالارىنىڭ پرەزيدەنتتىككە كانديدات قاسىم- جومارت كەمەل ۇلى توقايەۆتىڭ قولداۋىنا ازاماتتاردىڭ جينالعان قولدارىن تەكسەرۋ ناتيجەلەرى تۋرالى حاتتامالارى - ۇسىنىلدى»، - دەدى ول.
ونىڭ اتاپ وتۋىنشە، وسى حاتتامالارعا سايكەس پرەزيدەنتتىككە ۇمىتكەر قاسىم- جومارت كەمەل ۇلى توقايەۆتىڭ قولداۋىنا قازاقستاننىڭ بارلىق 17 وڭىرىنەن 315910 ازاماتتىڭ قولى جينالدى. ولاردىڭ 313653- ءى دۇرىس دەپ تانىلدى.
«بۇل رەتتە ورتالىق سايلاۋ كوميسسياسىنىڭ 2019 -جىلعى 15- ساۋىردەگى № 13/237 قاۋلىسىمەن بەلگىلەنگەن قازاقستان رەسپۋبليكاسى پرەزيدەنتتىگىنە كانديداتتى قولداۋ ءۇشىن دۇرىس قولداردىڭ قاجەتتى سانى كەمىندە 118140 قولدى قۇرايدى. قاسىم- جومارت كەمەل ۇلى توقايەۆتى پرەزيدەنتتىككە كانديدات رەتىندە تىركەۋگە قاجەتتى بارلىق قۇجاتتار ورتالىق سايلاۋ كوميسسياسىنا ۇسىنىلدى جانە ولارعا قويىلاتىن تالاپتارعا تولىق سايكەس كەلەدى»، - دەدى ول.
بۇعان دەيىن ورتالىق سايلاۋ كومسسياسى پرەزيدەنت سايلاۋىنا كانديدات رەتىندە قاسىم- جومارت توقايەۆتى تىركەگەندىگىن حابارلاعان ەدىك.
اۆتور: مارلان جيەمباي