توعىزقۇمالاقتان الەم چەمپيوناتىنىڭ العاشقى چەمپيوندارى انىقتالدى

نۇر-سۇلتان. قازاقپارات - تۇركيادا توعىزقۇمالاق پەن مانگالادان ءوتىپ جاتقان الەم چەمپيوناتىندا كلاسسيكا جانە بليتس تۇرىنەن جەڭىمپازدار مەن جۇلدەگەرلەر انىقتالدى، دەپ حابارلايدى قازاقپارات ءتىلشىسى.

بۇل تۋرالى قازاقپارات تىلشىسىنە توعىزقۇمالاقتان قازاقستان ۇلتتىق قۇراماسىنىڭ باس جاتتىقتىرۋشىسى اينۇر جاقاپبايەۆا ايتىپ بەردى.

«توعىزقۇمالاقتان V الەم چەمپيوناتى كلاسسيكا جانە بليتس تۇرىنەن جارىستار اياقتالدى. جەڭىمپازدار مەن جۇلدەگەرلەردى دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ، ۆيتسە-پرەزيدەنت دجان رەشيتتسسكي، مانگالا فەدەراتسياسى پرەزيدەنتى راۋف وزگەن، باس دەمەۋشى ماقسات رامانقۇلوۆ، جامبىل وبلىسىنىڭ توعىزقۇمالاق فەدەراتسياسى پرەزيدەنتى باتىربەك كۇلەكەيەۆ ماراپاتتادى. الەمدىك دودا وتە تارتىستى ءوتتى»، - دەدى اينۇر جاقاپبايەۆا.

باس جاتتىقتىرۋشى اتاپ وتكەندەي جەكەلەي سىندا (كلاسسيكا) ەرلەر اراسىندا قازاقستاندىق عالىمجان تەمىربايەۆ چەمپيون اتانسا، ەكىنشى ورىنعا تاعى ءبىر جەرلەسىمىز سايات جانداربەك قول جەتكىزدى. ال ءۇشىنشى ورىنعا موڭعوليالىق اردابۇلان شىنداۋلەت يە بولدى.

ال قىزدار اراسىنداعى جەكەلەي سىندا وسىعان دەيىنگى الەمنىڭ 8 دۇركىن چەمپيونى اتانعان قازاقستان ۇلتتىق قۇراماسىنىڭ مۇشەسى اسەل داليەۆا توعىز دۇركىن چەمپيوندىق اتاققا قول جەتكىزسە، ەكىنشى ورىن تاعى ءبىر جەرلەسىمىز سالتانات ساپاربەكوۆاعا بۇيىردى. ءۇشىنشى ورىندا قىرعىزستاننان كەلگەن ويىنشى ايزادا باقتىبەكوۆا.

سونىمەن قاتار بليتستەن ەرلەر اراسىنداعى جەكەلەي باسەكەدە باس جۇلدە قىرعىزستاندىق مارليس دۋۋلاتبەكوۆكە بۇيىرسا، ەكىنشى، ءۇشىنشى ورىنداردى وتانداستارىمىز حاكىمجان ەلەۋسىنوۆ پەن عالىمجان تەمىربايەۆ جانە موڭعوليالىق ەرمانات كۇلىبەك يەلەندى.

تۋرا وسى سىندا قىزدار اراسىندا قازاقستاندىق گۇلجانات الدابەرگەنوۆا چەمپيون اتانسا، قىرعىزستاندىق ايتۋرعان ماقساتبەك قىزى كۇمىس جۇلدەنى يەلەندى. ءۇشىنشى ورىندارعا التىناي شامبەتوۆا (قىرعىزستان) مەن ارۋجان ابدىحانوۆا (قازاقستان) قول جەتكىزدى.

ايتا كەتەيىك، چەمپيونات جالعاسۋدا، بۇگىن راپيد تۇرىنەر جارىستار وتكىزىلەدى.

اۆتور: كۇنسۇلتان وتارباي