بيىل وتەتىن پرەزيدەنت سايلاۋىنىڭ الدىڭعى سايلاۋدان ەرەكشەلىگى نەدە؟

نۇر-سۇلتان. قازاقپارات - ساياسات تانۋشى، ساراپشىلار جاۋاپ بەردى.

الماتىدا «پرەزيدەنت سايلاۋى-2019: الداعى ناۋقاننىڭ ەرەكشەلىكتەرى» كونفەرەنسياسى ءوتتى. جيىندا بەلگىلى ساياساتكەرلەر، ساياساتتانۋشىلار، ساراپشىلار قازاقستاندا وتەتىن الداعى پرەزيدەنت سايلاۋى تۋرالى پىكىر الماستى. بۇل تۋرالى Inform.kz حابارلايدى.

 بەلگىلى ساياساتتانۋشى ايدوس سارىم بيىل وتەتىن پرەزيدەنت سايلاۋىنىڭ الدىڭعى سايلاۋلاردان باستى ەرەكشەلىگى نەدە ەكەنىن ايتىپ بەردى.

«جۇرتشىلىقتىڭ ايتۋىنشا، سايلاۋ بيۋللەتەنىنە كەم دەگەندە 6-7 ادام كىرەدى. بيىلعى سايلاۋدا ساياسي سپەكتر، سانالۋان ساياسي يدەولوگيا وكىلدەرى وزدەرىن ۇسىنىپ وتىر. ۇلتتىق قوزعالىس وكىلدەرى، ءداستۇرلى ساياسي پارتيالار، وپپوزيتسيالىق دەموكراتيالىق كۇشتەردىڭ وكىلدەرى بار. تۇڭعىش رەت قازاقستان تاريحىندا ايەل ادام سايلاۋعا تۇسەيىن دەپ وتىر. قوعامنىڭ سايلاۋ تۋرالى پىكىرىن وزگەرتە الامىز. سايلاۋ كوميسسياسى، اكىمشىلىككە، اتقارۋشى ورگاندارعا 92-93 پايىز دەگەن سانداردىڭ ماگياسى قىسىم جاساپ جاتقان جوق. جۇرتتىڭ ءبارى سايلاۋعا قاتىسسىن دەگەن تالاپ جوق. بۇل كىشكەنە بولسا دا، سايلاۋدىڭ دۇرىس وتۋىنە ىقپال ەتەدى. كانديداتتاردىڭ بۇكىل قازاقستاندى ارالاۋعا ۋاقىتى بولمايدى. مەملەكەتتىك تەلەارنالار كوبىرەك دەبات ۇيىمداستىرىپ، تۆ، الەۋمەتتىك جەلى، يۋتۋبتا ءجيى-ءجيى پىكىرتالاستار وتكىزۋ كەرەك»، - دەدى ايدوس سارىم.

ونىڭ ايتۋىنشا، قازىر قازاقستانعا جاڭا بۋىن كەلدى.

«1990 -جىلداردىڭ باسىنداعى ەرەجەلەردى مويىنداي بەرمەيتىن جاس ۇرپاق كەلدى. ولاردىڭ سايلاۋ ينستيتۋتتارىنا دەگەن قۇرمەتى مەن سەنىمى نە بولماق؟ جاستاردىڭ قاتىسۋىمەن جاسالعان دۇنيەلەرگە نازار اۋدارىڭىزدار. بۇنى ءوزىن- ءوزى ىزدەۋ دەپ باعالاۋىمىز كەرەك. اقىلدى قوعام بولعىمىز كەلسە، جاستاردى تارتىپ، سايلاۋ مادەنيەتىن قالىپتاستىرىپ، جالپى ساياساتقا ارالاسۋىنا مۇمكىندىك بەرۋ كەرەك»، - دەدى ول.

قازاقستان ينتەرنەت قاۋىمداستىعىنىڭ ءتوراعاسى شاۆكات سابيروۆ ينتەرنەت جەلىسىندەگى باقىلاۋ جونىندە ءسوز قوزعادى.

«ءبىز 190 رەسۋرستى باقىلاپ وتىرمىز. ساۋىردە فەيسبۋك جەلىسىندە داريعا نازاربايەۆانىڭ ەسىمى كوپ اتالدى. فەيسبۋك جەلىسىنىڭ ساياسيلانۋ كورسەتكىشى وتە جوعارى. ۆكونتاكتە، تwitter، ودنوكلاسسنيكي جەلىلەرىندە كوبىنەسە حالىقارالىق جاڭالىقتار تانىمال بولدى. ۆكونتاكتە جەلىسىندە لوكالدى جاڭالىقتار كوپ قارالدى»، - دەدى شاۆكات سابيروۆ.

فيلوسوف ناتاليا سەيداحمەتوۆانىڭ ايتۋىنشا، بۇگىندە جاستاردىڭ ەلەكترورالدى مادەنيەتى تومەندەگەن.

«وسى جەردە بيسماركتىڭ ءسوزى ەسكە تۇسەدى. ساياساتقا ارالاسپاساڭ، ونىڭ ناتيجەسىنىڭ جەمىسىن جەيسىڭ. قازىر كوپ ادامدار مەنىڭ داۋسىم ەشتەڭەنى شەشپەيدى دەپ، ۇيىندە قالادى. الايدا ەل تاعدىرى ءار ادامنىڭ بەلسەندىلىگىنە بايلانىستى ەكەندىگىن ايتقىم كەلەدى. جاستاردىڭ سايلاۋ مادەنيەتىن ارتتىرۋ ءۇشىن ينتەرنەت كەڭىستىگىندە جالپىعا ورتاق رەسۋرس قالىپتاستىرۋ كەرەك»، - دەدى ناتاليا سەيداحمەتوۆا.