لوندوننان - نۇر-سۇلتانعا: قازاقستاندىق ساياحاتشىلار ەكى ايلىق ۆەلوشەرۋگە اتتاندى
ۆەلوشەرۋ قازاقستان حالقى بىرلىگى كۇنىنە جانە بيىلعى جاستار جىلىنا ارنالعان، دەپ حابارلايدى قازاقپارات قازاق گەوگرافيالىق قوعامىنا سىلتەمە جاساپ.
قاتىسۋشىلار ءوز ساپارىن ۇلى بريتانيا استاناسىنان باستادى. ولار جەتى مەملەكەتتىڭ جەرىنەن ءوتىپ، ۆەلوشەرۋدى 6 شىلدە - ەلوردا كۇنىندە نۇر-سۇلتاندا اياقتايدى.
ۆەلوەكسپەديتسياعا قاتىساتىن التى ادام - ميحايل ليم، داۋلەت وماروۆ، مارينا ۆاريبرۋس، ءدىلمۇرات راحماتۋلايەۆ، ازامات اتانتاي مەن بالجان بالتاشەۆا ۇزاق جانە كۇردەلى ساپارعا اتتانىپ، باتىلدىق تانىتتى.
ميحايل تاەكۆوندومەن جانە جۇگىرۋمەن شۇعىلدانعان. ترياتلونمەن تەك 2017 -جىلى عانا اينالىسا باستادى. مارينا ۆەلوسپورتقا ءۇش جىل بۇرىن قىزىعا باستاعان، ال داۋلەت ۆەلوشەرۋگە قىزىقتى وقيعالاردى ۇناتقاندىقتان قاتىسىپ وتىر. ءدىلمۇرات ءۇشىن سپورتپەن شۇعىلدانۋ - جۇمىستان تىس ۋاقىتتا سەرگىپ الاتىن حوببي، ال ازامات بولسا ۆەلوجارىستارعا ءوزى ءۇشىن قاتىسادى. بالجان ءجىپ ونەرىمەن اينالىسىپ (جىپتەن سۋرەت سالادى)، ال بوس ۋاقىتىندا تاۋعا شىعىپ تۇرادى.
ولاردىڭ ەشقايسىسى كاسىبي سپورتشى ەمەس. بارلىعى - ءوز-ءوزىن سىناعىسى كەلگەن سپورت اۋەسقويلارى.
لوندوننان شىققان ساياحاتشىلار كەنت گرافتىعىندا ورنالاسقان چاتەم قالاسىنا بەت الدى. وسى جاعالاۋداعى قالاشىققا بارا جاتقان جولدا العاشقى ۋاقيعا بولدى: قاتىسۋشىلاردىڭ ءبىرى - مارينانىڭ بەلەسەبەتىنىڭ دوڭگەلەگىنىڭ جەلى شىعىپ كەتىپتى. بۇل ماسەلە تەز شەشىلدى - قاتىسۋشىلار دوڭگەلەكتىڭ جارىلعان جەرىن جاماپ، ساپارىن جالعاستىردى.
ءوزىنىڭ سەزىمىن مارينا بىلاي دەپ ءتۇسىندىردى:
«العاشقى كۇنى ءتىپتى جاقسى ءجۇردىم. ءبارىمىز جارىق كەزدە كەلىپ كىردىك. مەن جازىق بولادى دەپ ويلاعان ەدىم. سويتسە، بۇل جەردە دوڭەستەر كوپ ەكەن. ۆەلوجولدارى تاماشا. جول بويى «كىدىرىپ» قالىپ وتىرساق تا، بارلىعى بىزگە ىزەتتىلىكپەن قارايدى».
كەلەسى باراتىن جەر - دۋۆر قالاسى. ۇلى بريتانيانىڭ وڭتۇستىك-شىعىسىندا ورنالاسقان ءىرى قالا جانە كەمەجاي. قاتىسۋشىلار شابىتتانىپ، ۇلكەن اسەر الۋعا دايىندالىپ، ۆەلوشەرۋدە جاقسى كەلە جاتىر.
«Beibitshilik jane birlik. Peace and Unity» جوباسىنىڭ ماقساتى - قازاقستاندى شەت ەلدەگى كوپشىلىككە تانىتۋ. سونىمەن بىرگە، سالاۋاتتى ءومىر سالتىن ناسيحاتتاۋ جانە سپورتقا جاستاردى باۋلۋ.