قازاقستاندا جابايى بۇركىت سانى ارتتى

الماتى. قازاقپارات - الماتىدا جابايى تابيعاتتاعى بۇركىتتەردى ەسەپكە الۋ جونىندەگى ارنايى ەكسپەديتسيانىڭ قاتىسۋشىلارىمەن كەزدەسۋ ءوتتى، دەپ حابارلايدى قازاقپارات ءتىلشىسى.

«ۇلەسىڭدى قوس. تابيعاتتى امان ساقتاپ قال» اتتى جوبانىڭ اياسىندا «سۇڭقار» ءتالىمباعى 10 ساۋىردەن 20 -ساۋىرگە دەيىن ەكسپەديتسياعا شىقتى.

ماماندار الماتى وبلىسىنداعى ارقارلى جانە مالايسارى، ۇلكەن جانە كىشى بوگىت، ءسۇيعوتى تاۋلارى، تورايعىر جانە شارىن جوعارعى جاعىن شارلاپ، جابايى بۇركىتتەردىڭ ارەالىن زەرتتەدى.

«جوبانى 2012 -جىلدان باستادىق. بۇركىت - تەك قانا قۇس ەمەس، ول مەملەكەتتىك جالاۋىمىزدا بەينەلەنگەن قازاقستاننىڭ ۇلتتىق سيمۆولى. بۇركىت قازاقستاننىڭ قىزىل كىتابىنا ەنگەن قۇس بولعاندىقتان، ونىڭ جويىلىپ بارا جاتقاندىعى ءبىزدى الاڭداتادى»، - دەدى «ەفەس قازاقستان» ش س ا ق كورپوراتيۆتىك قاتىناستار دەپارتامەنتىنىڭ ديرەكتورى شىڭعىس قاسكەيەۆ.

شىڭعىس قاسكەيەۆ سوڭعى 7 جىلدا بۇركىتتەردىڭ سانى ارتقانىن ايتتى. ەكسپەديتسيا قورىتىندىسىنا سايكەس، زەرتتەلگەن اۋماقتا مەكەندەيتىن بۇركىتتەردىڭ سانى 36 عا جەتتى. ماماندار 14 تاس تۇلەك پەن 11 بۇركىت جۇبىن تىركەگەن.

«ءبىزدىڭ ەسەپتەۋىمىزشە، الماتى وبلىسىندا 11 ۇيالاس جۇپ پەن 11 ۇلكەن، ياعني 22 بۇركىت بار. سونداي-اق، 3-5 جاس ارالىعىنداعى بۇركىتتەردى كەزدەستىردىك. ءبىراق، ولار بۇل جاستا كوبەيە المايدى. بۇركىتتەر 5-6 جاستان باستاپ كوبەيەدى. جالپى ولار 50-60 جىل ءومىر سۇرەدى»، - دەدى ورنيتولوگ، توپ جەتەكشىسى سەرگەي شمىگاليەۆ.

سەرگەي شمىگاليەۆتىڭ ايتۋىنشا، ءبىرىنشى كەزەڭدە - جوڭعار الاتاۋى تاۋ سىلەمدەرى ، ەكىنشى كەزەڭدە ىلە الاتاۋ اۋماعىن جانە التى جىل بويى بۇركىتتەر ەركىندىككە جىبەرىلگەن الماتى وبلىسىنىڭ جەرلەرى قارالعان. ەكسپەديتسيا 20 كۇننىڭ ىشىندە 2000 شاقىرىم جۇرگەن.

جابايى تابيعاتتا بۇركىتتەر كەمىرگىش، تاسباقا، سارىشۇناق، قويان جانە باسقا دا قۇستارمەن قورەكتەنەدى.

ونىمەن قوسا، «سۇڭقار» ءتالىمباعىندا 25 بۇركىت بالاپانى ءوسىرىلىپ، تابيعات اياسىنا جىبەرىلدى. بۇدان بولەك، ونىڭ اراسىندا يتەلگى قۇستارى دا بار. بۇل ۋاقىت ىشىندە ولاردىڭ 50 ميلليون تەڭگە قاراجاتى جاراتىلعان.

قازاقستان اۋماعىندا مەكەندەيتىن بۇركىتتەردىڭ سانىن ەسەپتەۋ سوڭعى مارتە جەتى جىل بۇرىن وتكىزىلگەن. 2012 -جىلداعى ەسەپكە الۋدىڭ ناتيجەسى جانە ورنيتولوگتاردىڭ ءبىرقاتار باعالاۋى بويىنشا بۇركىتتەردىڭ پوپۋلياتسياسى ازايعان، ۇلكەن جانە كىشى بوگەت ايماعىندا (الماتى وبلىسى) بار-جوعى 4-5 جۇپ قانا قالعان.

«سۇڭقار» ءتالىمباعىنىڭ ديرەكتورى اشوت انزوروۆ بۇركىتتەردى قورعاۋ جۇمىستارىن توقتاتپايتىندارىن ايتتى. كەلەسى ەكسپەديتسيا 5-6 جىلدان كەيىن تاعى قايتالانادى.