مولدوۆان قىزى: جاھاندانۋ زامانىندا قازاقى تاربيە ۇمىتىلماسا دەپ تىلەيمىن
«مەن قوستاناي وبلىسىنىڭ امانگەلدى اۋدانى تاستى اۋىلىنىڭ تۋماسىمىن. ۇلتىم مولداۆان. اتى- ءجونىم - اللا چەچەتكينا. ءوزىم قازاقتىڭ سالت- ءداستۇرى مەن مادەنيەتىنەن سۋسىنداپ وسكەن بالامىن. نەگىزى، قازاق ءتىلىن ءبىلۋ ءۇشىن، مەن سياقتى، كورشى كۇمىس اجەنىڭ مىجىماسىن جەپ ءوسۋ كەرەك. ال سىزدەر، مىجىمانىڭ قانداي اس ەكەنىن بىلەسىزدەر مە؟ قولدىڭ سارى مايى قوسىلىپ، مىجىلعان ىستىق تابا ناننىڭ ءدامى ءالى كۇنگە تاڭدايىمنان كەتپەيدى. دەگەنمەن، ءوز اتا- اناما دا العىس ايتقىم كەلەدى. سول كىسىلەردىڭ اقىلىمەن مەن قازاق سىنىبىندا وقىدىم. ساقىپجامال دەگەن العاشقى ۇستازىمنىڭ ارقاسىندا قازاق ءتىلىنىڭ قاسيەتىن سەزىندىم. قازىرگى تاڭدا احمەت بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە جۋرناليستيكا ماماندىعى بويىنشا ماگيستراتۋرادا وقيمىن» ، - دەدى ول.
اللا چەچەتكينا ق ر تۇڭعىش پرەزيدەنتىنىڭ «قازاق پەن قازاق - قازاقشا سويلەسسىن!» دەگەن ءسوزى ومىرلىك ماقساتىنا اينالعانىن باسا ايتتى.
«سوندىقتان مەن، قازاقتىڭ نانىن جەپ، سۋىن ءىشىپ وسكەندىكتەن، ەڭ الدىمەن قازاق تىلىنە قۇرمەت كورسەتىلۋىن تالاپ ەتەمىن. مەملەكەتتىك تىلدە سويلەمەسەك، بىلۋگە تىرىسپاساق، ءبىزدىڭ تاۋەلسىزدىگىمىزگە، ەگەمەندىگىمىزگە قوسقان ۇلەسىمىز نەمەن ولشەنەدى؟ بارلىق قانداس باۋىرلارىمدى قازاق ءتىلىن بىلۋگە، سۇيۋگە، ومىرىنە رۋحاني ازىق ەتۋگە شاقىرامىن. جاھاندانۋ زامانىندا قازاقى تاربيە ۇمىتىلماسا دەگەن تىلەگىم بار. ءبىزدىڭ اۋىلدا قىز بالانىڭ كەشكى ۋاقىتتا كوشە كەزىپ جۇرگەنى ۇيات، ەرسى سانالاتىن. وزىمنەن كەيىن ءوسىپ كەلە جاتقان سىڭلىلەرىم دە وسى تاربيەدەن الشاقتاماسا ەكەن دەيمىن» ، - دەدى اللا چەچەتكينا.