اباقتىعا اينالعان سۇم ءومىر
اۋەل باستان حاق تاعالا ادامزات بالاسىنا ومىرىمەن قوسا ءتۇرلى سىناقتاردى دا تارتۋ ەتكەن. ماڭدايىنا جازىلعان سىناققا بىرەۋ تۋرا قاراپ، باس يمەيدى ال ەندى بىرەۋلەر سول سىناقتىڭ ىرقىنا كونىپ كەتە بارادى.
ءومىر جولىندا كەزدەسكەن ءتۇرلى سىناققا باس يمەي، تاعدىردىڭ تالاي كەدەرگىسىن ارتقا تاستاپ، ءتۇرلى بەلەستەردى باعىندىرار جان بۇل جالعاندا سيرەپ بارا جاتقانداي. بەس كۇندىك فانيدە بارلىق جان ەلەپ- ەسكەرە بەرمەيتىن جايتتار جەتەرلىك. ەسكەرسەك تە، كوز جۇما قاراپ، زامان شىندىعىن بۇركەپ قالۋعا تىرىساتىنىمىز تاعى بار. بۇل حارەكەتتىڭ بارلىعى جەكە باستىڭ اماندىعى ءۇشىن جاسالاتىندىعى ايدان انىق. كەيدە وتىرىكتى شىندىقتان جاقىن كورىپ تۇرامىز. مىنە، سول سەبەپتەن دە بوياماسىز شىندىقتى جەتكىزگەن جان ءبىز ءۇشىن جاۋىمىزعا اينالادى.
سوزىمە دالەلدى تاريح بەتتەرىندەگى بەدەرلى وقيعالاردان ىزدەسەم. كەشەگى رەسەيدىڭ وزبىرلىق ساياساتىنا ۇشىراعان حالىققا تۋرا جولدىڭ جارشىسى بولعان ۇلت زيالىلارىنىڭ عۇمىرىن تىلگە تيەك ەتپەكپىن. ايلاكەر پاتشالىق ساياساتتىڭ ۇستەم تاپ وكىلدەرى ساياسي ساۋاتسىز، اڭقاۋ ەلدى ارزان ۇراندارمەن ارتىنا ەرتىپ، ال ونىڭ كوزى اشىق كوسەم كوشباستاۋشىلارىن «بۋرجۋازيالىق ۇلتشىل» دەپ جاريالادى.
ساياسي ساحنادا ورىن العان بۇل ساياسات ۇلت زيالىلارىنان عانا اياق تارتقان ەدى. مىنە، ءدال وسى ماقساتتا قازاق اراسىنداعى كوزى اشىق كوكىرەگى وياۋ ازاماتتاردى اسىپ-اتىپ، رۋحاني ازاپقا سالىپ جويىپ تىندى. دەگەنمەن، قازاقتىڭ ەل بولىپ ەڭسەسىن كوتەرۋىنىڭ تۇبىندە وسى ۇلتتىق ينتەلليگەنتسيا وكىلدەرى تۇر. وشكەنىمىز جاڭارىپ، وتكەنىمىز ۇلىقتالار شاقتا عانا ءبىز زيالى قاۋىمنىڭ ەڭبەگىن باعالاپ، تاريح بەتتەرىنەن لايىقتى ورىن الۋىنا جول اشتىق. بۇل تۇلعالار تاريحتا اتىم قالسىن دەگەن جوق، حالىق مۇددەسى ءۇشىن بارىن سالىپ، باسىن ءقاۋىپ- قاتەرگە تىكتى. ادىلەتسىزدىك ورىن العان سول قاراڭعى زاماندا ەلىم دەپ ەڭىرەپ جۇرگەن ازاماتتاردىڭ شوعىرى الاشوردا قايراتكەرلەرىنىڭ ىشىنەن 44 ادام جالعان ايىپتىڭ قۇربانىنا اينالدى. ەلىمدى ماۋجىراعان ۇيقىدان وياتامىن، ساناسىنا پاتريوتتىق سەزىمدى جەتكىزەمىن دەگەن ازاماتتار ءبىر ساتتە- اق «حالىق جاۋى» بولىپ شىعا كەلدى. اتالعان الاشورداشىلاردىڭ قاتارىن م. جۇمابايەۆ تا تولىقتىردى.
قارا جەردىڭ بەتىندە ءومىر ءسۇرىپ جاتقان كەز- كەلنەن حالىقتىڭ ءجۇرىپ وتكەن جولىنىڭ سۇرلەۋ- سوقپاعىنا زەر سالساڭىز، ونەردىڭ باسقا تۇرىمەن سالىستىرعاندا، ءسوز قۇدىرەتىنە ەرەكشە ءمان بەرىلىپ كەلگەنىن اڭعارامىز. ۇلى تۇلعا ءار كەزدە دە بيلىكپەن ءتىل تابىسا الماعان، سول ءۇشىن دە ءومىر باقي رەسمي بيلىككە وپپوزيتسيادا بولعان. ولار بيلىككە قارا باسىنىڭ قامى ءۇشىن ەمەس، حالقىنىڭ بولاشاعى ءۇشىن قارسى شىقتى. ءبىراق حالىق اقىننىڭ ءومىرىن ءبىر- اق ساتتە شەشەتىن توعىز گرامم قورعاسىن وعىنان اراشالاپ قالا المادى. ماعجان اقىن ءومىر جايلى مىنا ءبىر ولەڭ جولدارىندا:
جۇرەگىم، مەن زارلىمىن جارالىعا،
سۇم ءومىر اباقتى عوي سانالىعا
اقىندا ادامزاتتان دوس بولمايدى،
جالعىز-اق سىرىن ايتار قالامىنا، - دەپ كۇيىنە جىرلايدى.
اقىننىڭ ءومىردى اباقتىعا تەڭەۋى زاماننىڭ ازىپ-توزعانىنىڭ شىنايى بەلگىسى. ەلىم دەپ ەڭىرەگەن ورەن ەرلەردىڭ تاعىلىمدى تاعدىرلارى ءاردايىم حالىق جۇرەگىندە.