بەتتى قالاي اعارتۋعا بولدى؟
ەشقاشان جىلتىرامايتىن، توتىققان تەرىلەرگە بەتتى تازالاپ جۋعاننان كەيىن كۇرىشتىڭ سۋىنا بال قوسىپ ماسكا جاساپ، ونى داكەمەن 30 مينۋت تارتسا، بەتكە دىمقىلدىق پەن اجار سىيلايدى.
قازىر قىز- كەلىنشەكتەر سالونعا بارىپ، بەتىندەگى، مۇرنىنىڭ ۇستىندەگى تۇكتى الدىرتىپ تاستاپ جاتادى. وسى دۇرىس پا؟
تۇكتى الدىرماعان ءجون. ويتكەنى، تۇك بەتتىڭ قورعانىس قابىلەتىن ساقتايتىن پەردە ءرولىن اتقارادى. تۇگىن الىپ تاستاعان تەرى سۋىققا دا، ىستىققا دا، ءارتۇرلى سىرتقى فاكتورلارعا ءتوزىمسىز كەلەدى.
كوپ ادامنىڭ مۇرنىنىڭ ۇستىنە، مۇرىن اينالاسىنا قارا نۇكتەلەر شىعادى. ول نەلىكتەن؟
ول تەرىنىڭ ماي قۇرامى كوپ بولعاننان بولادى. تەرى تازا جۋىلماسا دا، تەرى پورلارى كەڭەيىپ كەتسە دە، مۇرىن اينالاسىنا قارا نۇكتە شىعادى.
كوكتەم كەزىندە بەتىنە اقتاڭداق شىعاتىندار بولادى. اقتاڭداقتىڭ ەمى بار ما؟
كوكتەمدە تابيعاتتىڭ تۇلەيتىنى سياقتى ادامنىڭ تەرىسى دە تۇلەيدى. اقتاڭداققا مەن جاڭا ايتقان ماسكا بال، جۇمىرتقانىڭ سارىسى، بانان ۇشەۋىن ارالاستىرىپ جاقسا پايدالى.
قازىر بويجەتكەندەردىڭ كوبى بەتىن اي سايىن سالونعا بارىپ تازارتىپ جاتادى. ال ەندى بىرەۋلەر بەتىمدى تازالاتسام، حيميالىق زاتتارمەن ءبۇلدىرىپ، زيان كەلتىرىپ الامىن با دەپ قورقادى. سالونعا بارىپ بەتتى تازالاتقان قانشالىقتى ورىندى؟
بەتتى تازالاسا بەت تەرىسى بۇلىنەدى دەگەنگە دارىگەر- كوسمەتولوگ رەتىندە كەلىسپەيمىن. سالونعا كەلىپ بەتىن ءومىرى تازالاتىپ كورمەگەن قىز بەن بەتىن ۇنەمى تازالاتىپ تۇراتىن بويجەتكەننىڭ بەتىندە ەداۋىر ايىرماشىلىق بولادى. بۇگىندە مەديتسينا دا، كوسمەتولوگيا دا دامىدى. حيميالىق زاتتارمەن بەتىمدى كۇيدىرەدى دەيتىن قورقىنىش جوق. قازىر سالونداردىڭ ءبارى بەتتى شوپتەردەن جاسالعان كوسمەتيكا ارقىلى تازالايدى. ول بەتتىڭ قان اينالىمىن جاقسارتادى.
ەكىنشىدەن، ميكروسكوپپەن عانا كورۋگە بولاتىن تەرى تىنىندەگى قاجەتسىز زاتتاردى الادى. ودان بەت جالتىراپ، سەرگەك كۇيگە ەنەدى. كەيدە قىزداردىڭ قورقاتىنىنداي- اق بار. كەيبىر سالونداردا بەتتەگى داق پەن بەزەۋدى پيلينگپەن كۇيدىرىپ، ادامنىڭ ءبىر قابات تەرىسىن سىلىپ تۇسىرەدى. بۇل - زيان. ءبىر قابات تەرىنى ەرىتىندىمەن كۇيدىرۋ - ول سوناۋ 1992 -جىلعى ءادىس. كۇيدىرگەننەن كەيىن ادامنىڭ بەتى تازا، ادەمى بولىپ جۇرەدى.
ال ءبىر ايدان كەيىن داق پەن بەزەۋ قايتا شىعىپ، ءتىپتى كوبەيىپ كەتەدى. ويتكەنى، ادامنىڭ تەرىسى ءۇش قابات قالىڭدىقتا. ءبىر قاباتىن سىلىپ تاستاعان تەرى ءوزىنىڭ قورعانىس قابىلەتىنەن ايىرىلادى. ءارى بەزەۋ مەن داقتى الدىرىپ تاستايمىن دەۋ بوس اۋرەشىلىك. ول ءۇشىن ىشكى ورگانداردى ەمدەپ، دۇرىس تاماقتانۋدى جولعا قويا ءبىلۋ كەرەك.