نۇرسۇلتان نازاربايەۆ پەن جەكي چان نە جايىندا سويلەستى

نۇر- سۇلتان. قازاقپارات - ق ر پرەزيدەنتىنىڭ تەلەراديو كەشەنى ەلباسى نۇرسۇلتان نازاربايەۆتىڭ تانىمال اكتەر جەكي چانمەن كەزدەسۋ تۋرالى ۆيدەو ماتەريالدى جاريا ەتتى، دەپ حابارلايدى قازاقپارات.

 «ءبىزدىڭ قىتاي حالىق رەسپۋبليكاسىمەن بارلىق باعىتتاردا ۇلكەن بايلانىستارىمىز بار. وسى جىلداردىڭ ىشىندە ءبىر- بىرىمىزگە جاقىن بولا تۇستىك. ءتوراعا شي جينپيڭ 6 جىل بويى جۇمىس ىستەپ كەلەدى جانە مەن ونىمەن 20 رەت كەزدەستىم. بىزدە بارلىق ماسەلە شەشىلگەن جانە «ءبىر بەلدەۋ، ءبىر جول» باستاماسىن قازاقستان ەڭ ءبىرىنشى بولىپ قولداپ، بارلىق قاجەتتى جاعدايدى جاسادى»، - دەدى نۇرسۇلتان نازاربايەۆ.

ەلباسى قازاقستان مەن قىتايدىڭ كينەماتوگرافيستەرى بىرلەسىپ، جۇمىس ىستەپ، ونەر ۇجىمدارى اراسىندا تىعىز بايلانىس ورناعاندىعىن اتاپ ءوتتى. قىتايدىڭ جوعارى وقۋ ورىندارىندا قازاق جاستارى ءبىلىم الىپ جاتقاندىعىن ايتتى.

«بىرلەسكەن كاسىپورىندار قۇرىلدى جانە اۆتوموبيل، تەمىر جول، اۆياتسيالىق قاتىناستاردىڭ بارلىعى بار. كونسەرتتىك توپتار، كوركەمونەر ۇجىمدارى ارالاسىپ تۇرادى. ەندى وزىڭىزبەن بىرلەسكەن كينو تۇسىرمەكپىز. وتە ماڭىزدى»، - دەپ اتاپ ءوتتى ق ر تۇڭعىش پرەزيدەنتى.

ءوز كەزەگىندە دجەكي چان 2017 -جىلى قازاقستان ەلورداسىندا وتكەن ەكسپو-2017 حالىقارالىق كورمەسى اياسىندا وتكەن شارالارعا قاتىسقانىن ايتتى.

 «ەلگە ورالعاننان كەيىن قانداي باعىتتا ىنتىماقتاستىقتى جولعا قويا الاتىندىعىمىزدى ۇزاق ويلاندىم. ال بيىل بىرلەسكەن فيلم تۇسىرۋگە باستاماشىلىق جاسادىم. مۇددەلى ورگانداردىڭ تاراپىنان قولداۋ الاتىندىعىمىزعا ۇمىتتەنەمىز. بۇل ءبىزدىڭ مادەنيەت سالاسىنداعى ىنتىماقتاستىعىمىزدىڭ العاشقى قادامى بولماق»، - دەدى تانىمال اكتەر.

بۇعان دەيىن ەلباسى نۇرسۇلتان نازاربايەۆ قىتايدا بەلگىلى اكتەر جەكي چانمەن كەزدەسكەنىن حابارلاعان ەدىك.

اۆتور: مارلان جيەمباي