بايقوڭىردان رەسەيدەگى ەڭ قۋاتتى بايلانىس سپۋتنيگى ۇشىرىلادى
«يامال-601» تەلەكوممۋنيكاتسيالىق عارىش قۇرىلعىسى 30 مامىردا «بريز-م» ۇدەمەلى بوگىمەن جابدىقتالعان «پروتون-م» زىمىرانىنىڭ كومەگىمەن ۇشىرىلادى دەپ جوسپارلانىپ وتىر. «يامال-601» عارىش قۇرىلعىسىنىڭ باستاپقى سالماعى 5400 كەلىدەن اسادى.
حرۋنيچيەۆ اتىنداعى مەملەكەتتىك عارىش عىلىمي-وندىرىستىك ورتالىعىنىڭ باسپا ءسوز قىزمەتىنىڭ اقپاراتى بويىنشا، 2019-جىلدىڭ 27- ساۋىرىندە «يامال-601» عارىش قۇرىلعىسى بايقوڭىر عارىش ايلاعىنا «ۆولگا-دنەپر» اۋە كومپانياسىنىڭ ان-124 ترانسپورتتىق ۇشاعىمەن جەتكىزىلگەن ەدى.
«يامال-601» سپۋتنيگىن Thales Alenia Space ەۋروپالىق كومپانياسى رەسەيدىڭ «گازپروم عارىش جۇيەسى» كومپانياسىنىڭ (گ ع ج) تاپسىرىسىمەن جاساعان. ول قازىرگى «يامال-202» سپۋتنيگىنىڭ ورنىنا، وربيتادا 49 گرادۋس شىعىس بويلىققا جايعاسادى.
سپۋتنيك ەۋروپالىق وداق اۋماعىنا، رەسەيدىڭ ەۋروپالىق بولىگىنە، ورال مەن باتىس سىبىرگە بايلانىس قىزمەتىن ۇسىنادى. سونداي-اق، تاياۋ شىعىس، سولتۇستىك افريكا جانە وڭتۇستىك-شىعىس ازيا وڭىرلەرى «يامال-601» ساۋلە تاراتۋ ايماعىنا كىرەدى.