قازىرگى جاستاردىڭ ومىرلىك ۇستانىمى قانداي؟
تەحنولوگياعا ايىرىقشا ماڭىز بەرىلىپ وتىرعان بۇگىنگى زاماننىڭ جاستارىنىڭ ومىرلىك ۇستانىمى قانداي بولۋى كەرەك؟ ادام ءوزى ءومىر ءسۇرىپ وتىرعان قوعامنىڭ تالاپتارىنا تاۋەلدى. ولاي بولسا، زىمىران زاماننىڭ جاستارىنىڭ كوزقاراسى الدىڭعى ۇرپاقتىڭ ويىمەن قانشالىقتى قابىسادى؟ كەڭەستىك يدەولوگيا بيلەگەن ءداۋىر جاستارىنىڭ ۇستانىمىمەن سالىستىرىپ، ۇقساستىق ىزدەۋ ارتىق دەپ ويلايمىن.
بۇگىنگى جاستار جاڭالىقتى يگەرۋگە وتە بەيىم. ولار جاڭا نارسەنى سىناپ كورۋدەن قورىقپايدى، وزىنە نە كەرەگىن بىلەدى. اقپاراتتى تەز قابىلداپ، تەز قورىتىدى. الايدا، ءبىر ماڭىزدى ماسەلە بار. ول - وزىمشىلدىك. ءتۇرلى عىلىمدى يگەرىپ، ءتىل ۇيرەنىپ، ءوزىنىڭ بولاشاعىن باياندى ەتۋگە تىرىسىپ جۇرگەندە، بۇگىنگى جاستار ءوزىنىڭ اينالاسىنداعى جاقىن ادامداردى ۇمىت قالدىراتىن سەكىلدى.
ءبىز كەيدە بويىمىزدا جاناشىرلىق سەزىم ازايىپ، ءوزىمشىل ادامعا اينالىپ بارا جاتقانىمىزدى مويىنداعىمىز كەلمەيدى. مۇنىڭ وزەگى قايدا جاتىر؟ جاس ءوسپىرىم مەن جەتكىنشەك بالانىڭ تازا جۇرەگى مەن تۇنىق ساناسىن ءار ءتۇرلى قۇرالدار ارقىلى وزگەرتۋ تىم وڭاي. كوگىلدىر ەكراننىڭ قۇدىرەتى نەگە تۇرادى؟ جاس ادام الاتىن «ازىقتىڭ» ءبارى پايدالى دەپ ايتۋ قيىن. ماتەريالدىق بايلىق پەن بيلىكتىڭ ارباۋىنا ءتۇسىپ، شىرمالىپ قالۋ مۇمكىندىگى مول.
«بۇكىل ازاماتتىڭ كەلەشەگى - جاس جەتكىنشەكتەردىڭ قانداي يدەال نەگىزىندە تاربيەلەنىپ، قالاي وسۋىنە، كەمەلدەنۋىنە بايلانىستى» دەگەن ع. مۇسىرەپوۆ ءسوزى ءدال بۇگىنگى كۇن ءۇشىن، ءبىز ءۇشىن ايتىلعان سەكىلدى. ءبىزدىڭ، جاستاردىڭ يدەالى نە؟ مەنىڭ ويىمشا، ادامزات بالاسى ءۇشىن يدەال ورتاق. ول - ادامدىقتان اينىماۋ.
قاي زاماندا دا ادامزات ءبىلىم الۋدان جالىققان ەمەس. الايدا، مىقتى ءبىلىم تەك اقىلدى عانا ەمەس، جۇرەكتى دە شىنىقتىرىپ وتىرعانى ءجون. وزىق تەحنولوگيا ادامنىڭ قارا جۇمىسىن جەڭىلدەتىپ، ەڭبەك ونىمدىلىگىن ارتتىرادى. الايدا، ەشبىر تەحنيكا ادام جانىنىڭ قۋاتىن الماستىرا المايدى.
مەن كەيدە وزىمە سۇراق قويامىن. قۇبىلمالى زامان مەنى دە يگەرىپ الىپ بارا جاتقان جوق پا؟ ءبىلىمدى بولۋ- مەنىڭ دە نەگىزگى ماقساتىم. ءبىلىم مەن ادامدىقتى قاتار الىپ جۇرە الار ما ەكەنمىن؟ سوڭعى كەزدە اينالامداعى ادامدارعا، ولاردىڭ قۋانىشى مەن قايعىسىنا ءجيى ءمان بەرەتىن بولدىم. ءوز- وزىمە قاراپايىم ازامات رەتىندە ەلىم ءۇشىن قولىمنان كەلگەن ۇلەسىمدى اياماسپىن دەپ ءسوز بەردىم.
bugin.kz