تالعات ەرعاليەۆ پرەزيدەنتتىككە ۇمىتكەر رەتىندە ۇسىنىلدى

نۇر-سۇلتان. قازاقپارات - قازاقستاننىڭ قۇرىلىسشىلار وداعى ق ر پرەزيدەنتتىگىنە تالعات ەرعاليەۆتى ۇسىندى، دەپ حابارلايدى قازاقپارات ق ر ورتالىق سايلاۋ كوميسسياسىنا سىلتەمە جاساپ.

«2019 -جىلعى 27 -ساۋىردە قازاقستان رەسپۋبليكاسى ورتالىق سايلاۋ كوميسسياسىنا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 55-بابىنا سايكەس «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگى» قازاقستان رەسپۋبليكاسىنىڭ پرەزيدەنتتىگىنە كانديدات رەتىندە تالعات فايزۋللا ۇلى ەرعاليەۆتىڭ قۇجاتتارىن ۇسىندى»، - دەلىنگەن ق ر و س ك رەسمي سايتىندا.

بىرلەستىك ورتالىق سايلاۋ كوميسسياسىنا تومەندەگى قۇجاتتاردى تاپسىرعان:

1. «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگى» جوعارى ورگانىنىڭ قازاقستان رەسپۋبليكاسىنىڭ پرەزيدەنتتىككە كانديداتتى ۇسىنۋ جونىندەگى وتىرىسىنىڭ حاتتاماسىنان ءۇزىندى؛

2. تالعات فايزۋللا ۇلى ەرعاليەۆتىڭ قازاقستان رەسپۋبليكاسىنىڭ پرەزيدەنتتىگىنە كانديدات بولىپ داۋىسقا تۇسۋگە كەلىسىم بەرگەنى تۋرالى ءوتىنىشى؛

3. ءومىرباياندىق دەرەكتەرى؛

4. قازاقستان رەسپۋبليكاسى ورتالىق سايلاۋ كوميسسياسىنىڭ شوتىنا سايلاۋ جارناسىن ەنگىزگەنىن كۋالاندىراتىن قۇجات؛

5. جەكە باسىن كۋالاندىراتىن قۇجاتتىڭ كوشىرمەسى؛

6. جوعارعى وقۋ ورنىنداعى ءبىلىمى تۋرالى ديپلومدارىنىڭ كوشىرمەلەرى؛

7. مەملەكەتتىك قىزمەتتە جۇمىس تاجىريبەسىنىڭ بار ەكەنىن راستايتىن قۇجاتتار.

ايتا كەتەيىك، تالعات ەرعاليەۆ 1966 -جىلى سەلينوگراد وبلىسىندا تۋعان. اگروتەحنيكالىق ۋنيۆەرسيتەتتى بىتىرگەن، ينجەنەر- مەحانيك. وقىتۋشى بولىپ جۇمىس ىستەگەن جانە كاسىپكەرلىك قىزمەتپەن اينالىسقان.

1991-1992 ج ج. -  قازاق مەملەكەتتىك اگروتەحنيكالىق ۋنيۆەرسيتەتىنىڭ وقىتۋشىسى، ينجەنەرلىك- پەداگوگيكالىق فاكۋلتەتى دەكانىنىڭ ورىنباسارى.

1993-1999 ج ج. -  ساۋدا كومپانياسىنىڭ ديرەكتورى.

1999-2002 ج ج. -  قاراشاعاناق كەن ورنىندا «اكسايينۆەستستروي» كومپانياسىنىڭ باسشىسى.

2004 -جىلى «سترويكلاسس» ق ك ج ش س-ىن قۇرعان، جوبا-مەنەدجەرى.

2010 -جىلدان بەرى «اق جول» قازاقستان دەموكراتيالىق پارتياسى ورتالىق كەڭەسىنىڭ وڭىرلىك ساياسات بويىنشا حاتشىسى.

2012-2016 -جىلدارى بەسىنشى شاقىرىلعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، «اق جول» قازاقستان دەموكراتيالىق پارتياسىنىڭ مۇشەسى بولدى.

2017 -جىلدان باستاپ - «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگىنىڭ ءتوراعاسى.

ۇيلەنگەن، ءۇش بالاسى بار.