كوپ بالالى انالار ساپاربايەۆقا جاردەماقى الۋداعى قيىندىقتاردى ايتتى
ءمينيستردىڭ جەكە قابىلداۋىنا كەلگەن انالار ۇكىمەت جانىنان قۇرىلعان جۇمىس توبىنا جيىرمادان استام تالاپ-تىلەك جازىلعان ءوتىنىش حات تاپسىردى. ولاردىڭ اراسىندا مۇگەدەك بالا باعىپ وتىرعان شاڭىراقتارعا بەرىلەتىن الەۋمەتتىك كومەكتى كوبەيتۋ، ولاردىڭ ەم الۋىنا جەڭىلدىك جاساۋ، 100 ايلىق ەسەپتىك كورسەتكىش كولەمىندە (شامامەن 250 مىڭ تەڭگە) جاردەماقى تولەۋ، وقۋ گرانتىن ءبولۋ، زەينەتكە شىعۋ جاسىن قايتا قاراۋ، باسپانا ماسەلەسىن شەشۋ ءۇشىن جەكە مەملەكەتتىك باعدارلاما جاساۋ تۋرالى ۇسىنىستار بار.
ءمينيستردىڭ قابىلداۋىندا بولعان ايەلدەردىڭ ءبىرى، جالعىزباستى انا قاناعات شۇمەنوۆانىڭ سوزىنشە، ساپاربايەۆ سۇراقتارعا ناقتى جاۋاپ بەرمەگەن جانە كوپ بالالى وتباسىنداعى قاريالاردىڭ زەينەتاقىسى دا ورتاق تابىس بولىپ ەسەپتەلەتىنىن ايتقان.
- «زەينەتاقىنى نەگە وتباسىنىڭ ورتاق تابىسىنا قوساسىزدار، زەينەتكەر ءوز اقشاسىن وزىنە جۇمساۋى ءتيىس قوي» دەپ سۇراپ ەدىم، مينيستر «زەينەتكەر دە سول ۇيدە تۇرادى عوي» دەپ جاۋاپ بەردى. جوعارعى وقۋ ورىندارىنا گرانت ءبولۋ ماسەلەسىن دە ايتىپ ەدىم، وعان دا ناقتى جاۋاپ الا المادىم. «ءۇش ايدان بەرى ءالى ءجوندى شەشىم شىعارمادىڭىزدار» دەپ ەدىم، «ماسەلەنى شەشىپ جاتىرمىز، انىقتاپ جاتىرمىز» دەپ، جالپىلاما ۋادە بەرىپ شىعارىپ سالدى. ەشتەڭە انىق ايتىلمادى. مينيستر ءوز پىكىرىندە، مەن ءوزى پىكىرىمدە قالدىم، - دەيدى قاناعات شۇمەنوۆا.
24- ءساۋىر كەشكىسىن اقوردا سايتى قازاقستان پرەزيدەنتى قاسىم-جومارت توقايەۆ مينيستر بەردىبەك ساپاربايەۆتى قابىلداعانىن حابارلادى. ساپاربايەۆ پرەزيدەنتكە «كوپ بالالى وتباسىلارعا كورسەتىلىپ جاتقان كومەك پەن جاڭا جۇمىس ورىندارىن اشۋ» جايىن بايانداعان. توقايەۆ مينيسترگە جۇمىسسىزدىق دەڭگەيىن 4,5 پايىزدان اسىرماۋدى تاپسىرعان.
كوپ بالالى انالارعا بەرىلەتىن الەۋمەتتىك جاردەماقىنى كوبەيتۋ تۋرالى تالاپ اقپان ايىندا نۇر-سۇلتاندا (سول كەزدەگى - استانا) ءبىر وتباسىنىڭ بەس بالاسى ورتتەن قازا تاپقان سوڭ ءجيى ايتىلا باستادى. ال 27-اقپاندا وتكەن «نۇر وتان» پارتياسىنىڭ سەزىندە سول كەزدەگى پرەزيدەنت نۇرسۇلتان نازاربايەۆ ءار بالاعا 21 مىڭ تەڭگە تولەنسىن دەپ، كەيىن ۇكىمەتكە كومەك ساۋىردەن باستاپ بەرىلسىن دەگەن. بۇل تاپسىرما نەگىزىندە پارلامەنت ازىرلەگەن زاڭعا قازىرگى پرەزيدەنت قاسىم-جومارت توقايەۆ ءساۋىردىڭ باسىندا قول قويعان.
زەينەتاقىنىڭ وتباسىنداعى ورتاق تابىسقا قوسا ەسەپتەلەتىنىن بۇعان دەيىن ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى سۆەتلانا جاقىپوۆا دا ايتقان. ول «تابىستى ەسەپتەۋ كەزىندە «نەكە جانە وتباسى تۋرالى» زاڭعا دا سۇيەنەمىز، زاڭدا اتا-اجەلەر دە جاقىن ادامدار قاتارىنا كىرەدى» دەگەن.