قازاقستان پرەزيدەنتى الەۋمەتتىك باعدارلامالاردى ساپالى اتقارۋدى تاپسىردى

 نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ كەشە ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسىنا ەلىمىزدەگى «ەڭبەك» مەملەكەتتىك باعدارلاماسىنىڭ جۇزەگە اسىرىلۋ بارىسى، از قامتىلعان كوپبالالى وتباسىلارعا كورسەتىلىپ جاتقان كومەكتەر بويىنشا جانە جاڭا جۇمىس ورىندارىن اشۋ ارقىلى جۇمىسسىزدىقپەن كۇرەس تۋرالى باياندالدى.

 مينيستر كاسىپ اشۋعا گرانتتار، شاعىن نەسيەلەر بەرىلەتىنىن، ماماندىعى جوق ازاماتتاردى قايتا وقىتىپ، جاستار پراكتيكاسى مەن قوعامدىق جۇمىستارعا تارتۋ ارقىلى جىلىنا ورتا ەسەپپەن 370 مىڭ جاڭا جۇمىس ورنىن اشۋ جوسپارلانعانى تۋرالى مالىمەت بەردى. ب. ساپاربايەۆتىڭ ايتۋىنشا، الداعى ءۇش جىلدا كەمىندە 1 ميلليون 100 مىڭ جۇمىس ورنىن اشۋ كوزدەلگەن. سونىمەن قاتار، ەلىمىزدە مۇمكىندىگى شەكتەۋلى ازاماتتاردى قورعاۋ جونىندەگى ۇلتتىق جوسپاردىڭ دايىندالىپ جاتقاندىعىن، ىشكى جانە سىرتقى كوشى- قون ساياساتىنىڭ جۇزەگە اسىرىلۋىن جەتكىزدى.

قاسىم- جومارت توقايەۆ حالىقتى الەۋمەتتىك قورعاۋعا باعىتتالعان مەملەكەتتىك باعدارلامانىڭ ساپالى جۇزەگە اسىرىلۋى ماڭىزدى ەكەنىنە توقتالىپ، اسىرەسە از قامتىلعان كوپبالالى وتباسىلاردىڭ الەۋمەتتىك جاعدايىن جاقسارتىپ، جۇمىسسىزدىق دەڭگەيىن % 4,5- تەن اسىرماۋ قاجەتتىگىن تاپسىردى. سونىمەن قاتار، ەلىمىزدەگى مۇمكىندىگى شەكتەۋلى ازاماتتاردى قولداۋدىڭ ماڭىزدىلىعىن ايتتى.

 مەملەكەت باسشىسى الەۋمەتتىك باعدارلامالاردىڭ ۋاقىتىلى جانە ساپالى اتقارىلۋىنا بايلانىستى ءبىرقاتار ناقتى تاپسىرمالار بەردى.