سوعىس قالاي وركەنيەتتى دامىتتى؟
ادام بالاسى تابيعاتىنان قىسىلتاياڭ كەزدە عانا بارلىق مۇمكىندىگىن ىسكە قوسادى.
ادامزات ءومىرىن جالماپ، ورنى تولماس وپاتتار ورناتقان سوعىستىڭ دا ۇيرەتىپ كەتكەنى كوپ بولدى. كەسكىلەسكەن كۇرەس جىلدارىندا جاسالعان تەحنولوگيالار كۇنى بۇگىنگە دەيىن پايداعا اسىپ كەلەدى.
كوشپەندىلەر ومىرىندەگى ون ەكى سايمان، بەس قارۋ، اتتى ەرتتەپ ءمىنۋ سەكىلدى يگىلىكتەردى بىلاي قويعاندا، ءبىرىنشى دۇنيەجۇزىلىك سوعىس تارتۋ ەتكەن تەحنولوگيالار قاتارى تىپتەن كوپ. ماسەلەن، 1918 -جىلدىڭ قىسىندا بەرلين بالالارىنىڭ بويىندا سۇيەك دەفورماتسياسى بايقالادى. بەلگىسىز دەرتتەن قۇتقارۋدىڭ جالعىز جولى كۆارتس لامپالارى بولىپ شىقتى. وسىلايشا، بۇگىنگە دەيىن قولدانىپ جۇرگەن لامپانى كۋرت گۋلدچينسكي جاساپ شىعارعان. ول اۋرۋشاڭ بالالاردىڭ جۇزدەرىندەگى سولعىندىقتى ۋلتراكۇلگىن ساۋلەلەرىنىڭ جەتىسپەۋىمەن ءتۇسىندىرىپ، لامپامەن ەمدەۋگە كىرىسكەن ەكەن.
بۇگىندە ىڭعايلى قاپتامادا جاسالعان قالتاشايدى I- دجس كەزىندە «شاي بومباسى» دەپ اتاعان. اسكەر قۇرامىنداعىلارعا شايدى بۇل تاسىلمەن تاسىمالداۋ يدەياسى Teekanne اتتى نەمىس كومپانياسىنا تيەسىلى. قازىرگى اۆتوموبيلدىڭ العاشقى ۇلگىلەرى دە وسى سوعىس قاجەتتىلىگىنەن تۋعان. قازىر ايەلدەر قاۋىمىنىڭ ەرمەگىنە اينالعان پلاستيكالىق حيرۋرگيا سوعىس جىلدارىنىڭ سارقىتى. سەبەبى، ۇرىس دالاسىندا ءتۇرلى دەنە جانە بەت جاراقاتىن العان اسكەريلەر مەديتسينانىڭ وسى تۇرىنە جۇگىنۋگە ءماجبۇر بولعان. 16 -عاسىرداعى شۆەد پەن نەمىس سوعىسى كەزىندە تۇزدىڭ قۇنى التىنمەن پاراپار ەدى. تۇز تاپشىلىعىنان اسكەريلەرگە جونەلتىلەتىن بالىقتار ءبۇلىنىپ كەتكەن.
ءبىراق وسى ولقىلىقتىڭ ارقاسىندا كونسەرۆىلەنگەن بالىقتار ومىرگە كەلدى. Gillette كومپانياسىڭ دا العاشقى ۇستارا ونىمدەرىن اعىلشىن اسكەرلەرى تۇتىنعان ەدى. كەز كەلگەن اس ۇيدەن تابىلاتىن قىسقا تولقىندى پەش العاشىندا اسكەري ماقساتتا قولدانىلعان.
ماگنەترون اپپاراتى ارقىلى قىسقا تولقىنداردى قابىلداپ قالالاردى بومبالاۋ ىسكە اسقان ەكەن. 1945 -جىلى پەرسي سپەنسەر بۇنداي تولقىننىڭ كومەگىمەن تاماق جىلىتۋعا بولاتىنىن بايقاۋسىزدا ءبىلىپ قالىپ، 1954 -جىلدان باستاپ بۇل اس ءۇي جابدىعى رەتىندە ساتىلىمعا شىقتى. قازىرگى دەربەس كومپيۋتەردىڭ ارعى اتاسى ENIAC اعىلشىن اسكەرلەرىنىڭ جەكە زەرتتەۋ قۇرالى رەتىندە قۇراستىرىلسا، الەكساندروم فلەمينگ ويلاپ تاپقان انتيبيوتيكتەر ەكىنشى دۇنيەجۇزىلىك سوعىس كەزىندە سىناقتان ءوتتى.
ەڭ قىزىعى، قازىر ءسىز قولدانىپ وتىرعان ينتەرنەتتىڭ ءوزى سوعىس پايداسى ءۇشىن ويلاپ تابىلدى. جالپى، ادامزات بالاسى قاۋىپ سەزىنگەندە ميىنىڭ قابىلەتى ارتىپ كەتەتىن بولۋى كەرەك. ايتپەگەندە، بەيبىت كۇننىڭ يگىلىكتەرى بۇدان دا كوپ بولۋشى ەدى.
