قازاقستاندىق كومپانيالار سلوۆاكيادا تەمىر جول سالىپ جاتىر

نۇر-سۇلتان. قازاقپارات - قازاقستاندىق كومپانيالار «KazakhExport» ەكسپورتتىق ساقتاندىرۋ كومپانياسىنىڭ («بايتەرەك» حولدينگىنىڭ ەنشىلەس ۇيىمى) قولداۋىنىڭ ارقاسىندا قۇرىلىس قىزمەتتەرىنىڭ حالىقارالىق دەڭگەيىنە شىقتى.

بۇل تۋرالى «بايتەرەك» ۇلتتىق باسقارۋشى حولدينگى» ا ق باسقارما ءتوراعاسى ايدار ءارىپحانوۆ مالىمدەدى، دەپ حابارلايدى قازاقپارات.

«2018-جىلدان باستاپ KazakhExport قىزمەتتەردىڭ ەكسپورتىن ىنتالاندىرۋ بويىنشا جۇمىستى باستادى. ونىڭ قولداۋىمەن وتاندىق كومپانيالار حالىقارالىق قۇرىلىس قىزمەتتەرى نارىعىنا كىرە باستادى. مىسالى، سلوۆاكيادا تەمىرجول قۇرىلىسى بويىنشا تەندەرگە ءساتتى قاتىسۋدا. وندا جوبالاۋ جۇمىسىن وسكەمەننىڭ «كازگيپروتسۆەتمەت» جوبالاۋ كومپانياسى جۇرگىزىپ جاتىر. 2018-جىلعى جەلتوقساندا قازاقستان دامۋ بانكىنىڭ جانە KazakhExport قولداۋىمەن «AAEngineering» ج ش س وتاندىق كومپانياسى قىرعىزستانداعى ءىرى كەن ورىندارىنىڭ بىرىندە التىن وندىرەتىن زاۋىت سالۋ تۋرالى كەلىسىمشارت جاساستى. كەلىسىمشارت سوماسى 107 ميلليون ا ق ش دوللارىن قۇرايدى»، - دەدى ۇكىمەت وتىرىسىندا سويلەگەن سوزىندە ايدار ءارىپحانوۆ.

ونىڭ ايتۋىنشا، قازىرگى ۋاقىتتا پورتفەلدە 100 ميلليارد تەڭگەدەن استام سوماعا وزبەكستان («بازيس ا» - 78 ميلليارد تەڭگە)، قىرعىزستان («ا ا ە» - 7 ميلليارد تەڭگە)، رەسەي («وماس ينتەگرەيتەر» ج ش س - 7 ميلليارد تەڭگە) سياقتى ەلدەردە بۇرعىلاۋ قوندىرعىلارىن جوبالاۋ، تەحنيكالىق جانە تەحنولوگيالىق سۇيەمەلدەۋ قىزمەتتەر ەكسپورتى بويىنشا جوبالار بار.

بۇگىنگى تاڭدا KazakhExport ەكونوميكانىڭ باسىم سەكتورلارىندا قازاقستاننىڭ بارلىق وڭىرلەرىندە 80 نەن استام كاسىپورىنعا قولداۋ كورسەتەدى. مىسالى، ەگەر 2018-جىلى  90 ميلليارد تەڭگە سوماسىنا قولداۋ كورسەتكەن بولسا، ونىڭ ىشىندە 49 ميلليارد تەڭگە اگروونەركاسىپتىك كەشەن مەن ازىق-تۇلىك ونەركاسىبى كاسىپورىندارىنا تيەسىلى.

2018-جىلدىڭ قورىتىندىسى بويىنشا كاپيتال 43 ميلليارد تەڭگە بولعاندا «KazakhExport» ەكسپورتتىق ساقتاندىرۋ كومپانياسى قولدانىستاعى ساقتاندىرۋ مىندەتتەمەلەرىنىڭ كولەمىن 110 ميلليارد تەڭگەگە دەيىن ۇلعايتتى، بۇل كومپانيانىڭ مەنشىكتى كاپيتالىنان 2,5 ەسە جوعارى. اعىمداعى جىلى كاپيتالداندىرۋ جانە مەملەكەتتىك كەپىلدىكتەر الۋ ەسەبىنەن ساقتاندىرۋ كولەمى ايتارلىقتاي ارتاتىن بولادى.

وسىعان وراي، اعىمداعى جىلى KazakhExport كەمىندە 95 ميلليارد تەڭگە سوماسىنا ساقتاندىرۋدى قامتاماسىز ەتەدى، ءبىرىنشى توقساندا 16 ميلليارد تەڭگەدەن استام سوماعا 15 جوبا بويىنشا وڭ شەشىم قابىلداندى، ونىڭ ىشىندە 11 كاسىپورىن بۇرىن KazakhExport قولداۋىن پايدالانباعان.