ماۋسىم ايىندا نۇر- سۇلتان - پراگا اۋە رەيسى اشىلادى
اۆياتسيا كوميتەتىنىڭ دەرەگىنە سۇيەنسەك، «نۇر- سۇلتان - پراگا - نۇر- سۇلتان باعىتى بويىنشا جاڭا اۋە مارشرۋتىنىڭ اشىلۋى قارساڭىندا ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ ءتوراعاسى تالعات لاستايەۆتىڭ قازاقستانداعى چەحيا رەسپۋبليكاسىنىڭ ەلشىسى رۋدولف حيكلمەن كەزدەسۋى ءوتتى. كەزدەسۋ بارىسىندا ەكى ەل اراسىنداعى تىكەلەي اۋە رەيستەرىنىڭ اشىلۋ ماسەلەسى تالقىلاندى.
«ازاماتتىق اۆياتسيا كوميتەتى قازاقستاننىڭ حالىقارالىق باعىتتارعا ۇشۋ گەوگرافياسىن كەڭەيتۋ جونىندەگى جۇمىس اياسىندا «SCAT» اۋە كومپانياسىنا نۇر- سۇلتان - پراگا - نۇر- سۇلتان حالىقارالىق اۋە باعىتىنا ۇشۋ سەرتيفيكاتىن بەردى. كومپانيا وسى جىلدىڭ ماۋسىم ايىنان باستاپ، اتالعان باعىتتا اپتاسىنا 2 رەيس جيىلىگىمەن Boeing-737 ۇشاعىندا تۇراقتى رەيستەردى ىسكە قوسۋدى جوسپارلاپ وتىر» ، - دەلىنگەن حابارلامادا.
كوميتەتتىڭ مالىمەتىنشە، اتالعان رەيستىڭ اشىلۋى ەكى ەل اراسىنداعى ساۋدا- ەكونوميكالىق قاتىناستاردى، سونداي- اق ەلىمىزدىڭ ترانزيتتىك الەۋەتى مەن تۋريستىك سالاسىن دامىتۋعا ىقپال ەتەدى.
ودان بولەك، كەزدەسۋدە چەحيادا وندىرىلگەن شاعىن اۆياتسيانىڭ ۇشاقتارىن جەتكىزۋ جانە ەلىمىزدە ۇشقىشتاردى دايىنداۋ ماسەلەلەرى تالقىلاندى.
