قازاقستان ەڭبەكقور ەل بولۋى كەرەك، جايباراقات ءومىردىڭ زامانى كەتتى - ق ر پرەزيدەنتى
قازاقپارات اقوردانىڭ باسپا ءسوز قىزمەتىنە سىلتەمە جاساي وتىرىپ، مەملەكەت باسشىسى قاسىم- جومارت توقايەۆتىڭ وسى كەزدەسۋدە سويلەگەن ءسوزىنىڭ ءماتىنىن جاريالايدى.
قۇرمەتتى ماڭعىستاۋلىقتار!
قادىرلى قاۋىم!
بۇگىن قاسيەتتى ماڭعىستاۋ جەرىنە كەلىپ، وزدەرىڭىزبەن جۇزدەسىپ وتىرعانىما قۋانىشتىمىن!
ماڭعىستاۋ - بار قازاق قادىر تۇتقان باتىر بابالار مەن 362 اۋليەنىڭ مەكەنى. ەلدىڭ كيەسىن ساقتاعان، ۇلتتىق ءداستۇردىڭ وزەگىن جالعاعان ماڭعىستاۋ ءوڭىرى ءارقاشان ەلدىكتىڭ تىرەگى بولدى. سوندىقتان مەن ەل دامۋىنىڭ ماڭىزدى كەزەڭىندە كيەلى ولكەگە ارنايى كەلىپ وتىرمىن.
بارشاڭىز بىلەسىزدەر، ەلباسى تاريحي شەشىم قابىلداپ، قازاقستان وركەندەۋدىڭ جاڭا ساتىسىنا قادام باستى. ءبىز تۇڭعىش پرەزيدەنت ايقىنداپ بەرگەن ستراتەگيالىق ماقسات- مىندەتتەردى جۇزەگە اسىرۋدى ودان ءارى جالعاستىرا بەرەمىز.
وسى جىلدار ىشىندە ەگەمەن ەلىمىزدىڭ ساياسي باسقارۋ جۇيەسى مەن ساباقتاستىق ءداستۇرى بەرىك قالىپتاستى. بۇل باعىتتان اۋىتقىماي، العا جىلجۋ - ءبىزدىڭ الدىمىزدا تۇرعان ماڭىزدى مىندەت.
پرەزيدەنت رەتىندە مەملەكەتتى ودان ءارى دامىتۋ ءۇشىن مەنىڭ ۇستانىمدارىم ايقىن ءارى ناقتى. مەملەكەتشىلدىك پەن ءداستۇر ساباقتاستىعى - ەلىمىزدى وركەندەتۋدىڭ باستى كەپىلى. مەن وسى ۇستانىمدارعا ايرىقشا ءمان بەرەمىن. ونسىز تۇراقتىلىق تا، دامۋ دا بولمايدى. سوندىقتان، قوعام تۇراقتىلىعىن نىعايتا وتىرىپ، ەكونوميكانىڭ قۋاتىن ەسەلەۋ - باستى ماقساتىمىز. بۇل ورايدا، ۇلى دالا دەموكراتياسىنان باستاۋ الاتىن ادىلەتتىلىك پرينسيپى قاتاڭ ساقتالۋى ءتيىس. ونى جوعالتىپ الۋ ادامزات ءۇشىن دە، ۇلت ءۇشىن دە ءوزىن- ءوزى جوعالتۋمەن تەڭ.
دانا حالقىمىز ايتقانداي، «ادىلەت جولى - اۋىر جول».
ءبىراق ءبىز ءۇشىن ودان باسقا جول جوق. ادىلەتتىلىك - اۋقىمى كەڭ ۇعىم. بۇل قۇندىلىق، ەڭ الدىمەن، مەملەكەتتىك ساياساتتا باسشىلىققا الىنۋى قاجەت. زاڭ الدىندا بارلىق ازامات تەڭ قۇقىلى. ءبىزدىڭ ازاماتتارىمىزدىڭ قۇقىقتارى ءارقاشان ەڭ جوعارى قۇندىلىق رەتىندە قابىلدانۋى ءتيىس. قىلمىس جاساعان ازاماتتار لاۋازىمىنا قاراماي زاڭعا سايكەس جازالانۋى كەرەك. الەۋمەتتىك تەڭدىك ساقتالماعان جەردە، ادىلدىك بولمايدى. سوندىقتان، بۇكىل قوعام بولىپ ادىلەتسىزدىكپەن جۇمىلا كۇرەسۋىمىز كەرەك. بۇل - اتا زاڭ تالابىنان تۋىندايتىن جانە مۇلتىكسىز قورعالۋى ءتيىس باستى قۇندىلىقتاردىڭ ءبىرى.
ءبىز قازىر تەحنولوگيانىڭ قارقىندى دامۋ داۋىرىندە ءومىر ءسۇرىپ جاتىرمىز. جاھاندىق باسەكە كۇشەيگەن زاماندا الىستاعىنى الاتىن العىرلىق، قياداعىنى شالاتىن قىراعىلىق كەرەك. سوندىقتان، ءتورتىنشى ونەركاسىپتىك ريەۆوليۋتسيا كەزەڭىندە ەنجارلىققا جول بەرمەۋىمىز قاجەت.
بارعا قاناعات ەتىپ، قول قۋسىرىپ، قاراپ وتىرۋعا بولمايدى. وركەنيەت كوشىنەن قالىپ قويماي، زامان تالابىنا ساي العا جىلجۋىمىز كەرەك. ايتپەسە، تاريح تا، بولاشاق ۇرپاق تا ءبىزدى كەشىرمەيدى. سوندىقتان، جاڭاشىل ۇردىستەرگە جول اشۋ ەلىمىزدىڭ ءوسىپ- وركەندەۋى ءۇشىن اسا ماڭىزدى.
جەرگىلىكتى ءوڭىر باسشىلارى حالىقپەن تىعىز بايلانىس ورناتىپ، قاراپايىم ادامي قارىم- قاتىناس جاساۋعا ەرەكشە ءمان بەرۋى كەرەك. حالىققا اشىق قىزمەت كورسەتۋگە قاجەتتى بارلىق كوممۋنيكاتسيا قۇرالدارىن ءتيىمدى پايدالانۋ قاجەت. بۇل ماسەلەنى تۇركىستانعا بارعان ساپارىمدا جانە وبلىس اكىمدەرىمەن وتكىزگەن جيىندا ايتتىم.
اكىم بولۋ، ەڭ الدىمەن، حالىققا جاقىن بولۋ دەگەن ءسوز! ەڭ باستى مىندەت - ادال قىزمەت ەتىپ، ەلدىڭ سەنىمىنەن شىعا ءبىلۋ! اكىمدەر ەسەپتىك كەزدەسۋلەردە عانا ەمەس، حالىقپەن اپتا سايىن، اي سايىن تۇراقتى جۇزدەسىپ، ەلدى مەكەندەردى تۇگەل ارالاۋى ءتيىس. بارلىق دەڭگەيدەگى جەرگىلىكتى ايماق باسشىلارى تۇرعىنداردى تولعاندىرعان ماسەلەلەردى ۋاقتىلى شەشۋى كەرەك. سوندا عانا بيلىك پەن حالىق اراسىندا سىندارلى ديالوگ ورنايدى.
ەلمەن بايلانىس جاساۋعا كەدەرگى كەلتىرەتىن قۇبىلىستىڭ ءبىرى - سىبايلاس جەمقورلىق. بۇل مەملەكەتتىڭ ورنىقتى دامۋىنا، ۇلتتىق قاۋىپسىزدىككە قاتەر توندىرەدى. جەمقورلىقتىڭ تامىرىنا بالتا شاۋىپ، ونى تۇبەگەيلى جويۋ اسا ماڭىزدى مىندەتكە اينالۋى ءتيىس. ساناسى سەرگەك، ويى تازا وسكەلەڭ ۇرپاق تاربيەسى ءۇشىن بۇل ءىستى جۇزەگە اسىرۋدىڭ ءمانى زور.
جەمقورلىق، بۇل - باتپانداپ كىرەتىن، مىسقالداپ شىعاتىن دەرت. وسىنداي دەرتكە قارسى مىقتى ءدارى قولدانباساق، ودان ارىلۋ مۇمكىن ەمەس. سوندىقتان، ءبىز ءتيىستى ءىس- شارالاردى ودان ءارى جۇزەگە اسىرا بەرەمىز.
ەڭ باستىسى، قوعامدا سىبايلاس جەمقورلىققا تۇبەگەيلى قارسى احۋال قالىپتاستىرۋ. بۇل - وڭاي شارۋا ەمەس. سوندىقتان، ءبارىمىز ەل بولىپ، قوعام بولىپ وسى جۇمىسقا كىرىسۋىمىز كەرەك.
ءبىزدىڭ قوعامىمىزدا جەمقورلىق، اسىرەسە، اۋقىمدى جىمقىرۋشىلىق ناعىز ۇيات نارسە رەتىندە سانالۋى ءتيىس. سىبايلاس جەمقورلىققا جول بەرگەن تۇلعالاردىڭ بارلىعى قاتاڭ تۇردە جازالانادى. الايدا، جەمقورلىققا قارسى كۇرەستى ناۋقانشىلدىققا اينالدىرماۋ قاجەت.
قۇرمەتتى قاۋىم!
وزدەرىڭىز بىلەسىزدەر، ەلباسى 2019 -جىلدى جاستار جىلى دەپ جاريالادى. مەن جاس ۇرپاقتى قولداۋ بولاشاقتى قورعاۋ دەپ بىلەمىن. بيىل «جاستار - ەل تىرەگى» ارناۋلى الەۋمەتتىك جوباسى ىسكە قوسىلدى. جۇمىسپەن، باسپانامەن قامتۋ، ءبىلىم بەرۋ، جاستار كاسىپكەرلىگىن دامىتۋ، جاس عالىمداردى قولداۋ جالعاسا بەرەدى.
ەل ىشىندە، وڭىرلەردە باسەكەگە قابىلەتتى جاستار كوپ. وسىنداي جاستاردى تەك مەريتوكراتيا جولىمەن، ياعني، جاس مامانداردى قابىلەتتەرىنە جانە جەتىستىكتەرىنە قاراي ءوسىرۋدىڭ ارنايى مەملەكەتتىك باعدارلاماسىن ازىرلەيمىز.
بارلىق ايماقتاردا قىزمەتكە قابىلداۋ كەزىندە دارىندى، كوزى اشىق، ءبىلىمدى، وزىق ويلى جاستارعا باسىمدىق بەرىلۋى ءتيىس. ولاردىڭ الەۋمەتتىك ليفت ارقىلى ءوسۋى ساپالى ءبىلىمى مەن كاسىبي قابىلەتتەرىنە تىكەلەي بايلانىستى.
سونىمەن قاتار، تاعى ءبىر ماڭىزدى ماسەلەگە نازار اۋدارامىن. جاستار جىلىندا ناۋقانشىلدىققا، كوزبوياۋشىلىققا جول بەرۋگە بولمايدى! بولىنگەن بيۋدجەت قاراجاتى، شىن مانىندە، پايداسى بار شارالارعا جۇمسالۋى ءتيىس. بۇل ماسەلە مەنىڭ تىكەلەي باقىلاۋىمدا بولادى.
***
بارشاڭىز جاقسى بىلەسىزدەر، قازىر ەلىمىزدە «رۋحاني جاڭعىرۋ» باعدارلاماسى جۇزەگە اسىرىلۋدا. كيەلى مەكەن - ماڭعىستاۋدىڭ كوپتەگەن تاريحي نىساندارى دا وسى جوباعا ەندى. بۇل باعىتتاعى جۇمىستار ءارى قاراي جالعاسا بەرەدى.
تەرەڭ تاريحىمىزدى جانە ءتول ءداستۇرىمىزدى ءبىلۋ - اسىرەسە، جاستار ءۇشىن ماڭىزدى. جاڭعىرۋدى، ەڭ الدىمەن، انا تىلىمىزدەن باستاۋىمىز كەرەك! تۋعان ءتىلدىڭ ماسەلەلەرىن شەشۋمەن، ەڭ الدىمەن، بالاباقشا مەن مەكتەپ ۇستازدارى اينالىسۋى ءتيىس.
مەكتەپتەردە باستى نازاردى قازاق تىلىنە، سونداي- اق ورىس تىلىنە اۋدارۋ قاجەت. سودان كەيىن عانا اعىلشىن ءتىلىن مەڭگەرۋگە بولادى.
قازاق ءتىلىن ەكونوميكا، عىلىم، ءبىلىم، تەحنيكا جانە مەملەكەتتىك باسقارۋ تىلىنە اينالدىرۋ - ەڭ ماڭىزدى مىندەت!
ۇلتتىق سانا ۇلتتىق تىلمەن عانا قالىپتاسادى.
مۇنى ەشقاشان ەستەن شىعارۋعا بولمايدى.
***
تاعى ءبىر ماڭىزدى ماسەلەگە نازار اۋدارامىن.
حالىقتىڭ ءال-اۋقاتىن، الەۋمەتتىك تۇرمىس ساپاسىن ارتتىرۋ - باستى مىندەتىمىز. بۇل باعىتتا مەملەكەت تاراپىنان ۇدايى قولداۋ كورسەتىلىپ جاتقانىن جاقسى بىلەسىزدەر. الايدا، ءبىز بيۋدجەتكە قاتىستى كوزقاراسىمىزدى تۇبەگەيلى وزگەرتۋىمىز قاجەت. مەملەكەت قارجىسىن رەتسىز جۇمساۋ ماسەلەسىن قاتاڭ قاداعالاپ، ىسىراپشىلدىقتىڭ الدىن الۋ كەرەك.
ءبىزدىڭ كەيبىر اكىمدەرىمىز بەن مينيسترلەرىمىز بيۋدجەتكە «تاۋسىلمايتىن قورجىن» رەتىندە قارايدى. بىزدە ءتيىمسىز شىعىندار وتە كوپ. ماسەلەن، مەرەكەلىك شارالاردى ابدەن جاقسى كورەتىن بولدىق. قىمبات اۆتوكولىكتەردى مولىنان ساتىپ الاتىن بولدىق. قىزمەت كابينەتتەرىندە كەرەمەت جوندەۋ جۇمىستارىن جۇرگىزەتىن بولدىق. تاعى باسقا، ايتساق، كوپ. وسىنداي كەلەڭسىزدىككە توسقاۋىل قويامىن. كورپەمىزگە قاراي كوسىلۋ كەرەك.
ءبىز تابىس كوزىن تەك بيۋدجەتتىك شىعىندار ەسەبىنەن ارتتىرۋ مۇمكىن ەمەس ەكەنىن تەرەڭ ءتۇسىنۋىمىز قاجەت. مەملەكەت ادامداردىڭ ەڭبەك ەتىپ، لايىقتى تابىس تابۋىنا جول اشاتىن ءتيىستى شارالار قابىلدايدى. اسىرەسە، الەۋمەتتىك جاعدايى تومەن ازاماتتاردى قورعاۋىنا الادى.
ءبىز مۇقتاجدىق پەن ماسىلدىقتىڭ ارا-جىگىن اجىراتا ءبىلۋىمىز كەرەك. تەك ۇكىمەت تاراپىنان بولىنەتىن جاردەماقىعا قاراپ ءومىر سۇرۋگە بولمايتىنىن ءار ازامات تۇسىنگەنى ءجون. بالالارعا مەملەكەتتەن بولىنەتىن قاراجاتتى سولاردىڭ وزدەرىنە جۇمساۋ قاجەت.
***
قوعامدا جەكە كاسىپپەن اينالىسۋ يدەياسىن ودان ءارى ناسيحاتتاي بەرۋ ماڭىزدى. ادال ەڭبەگىمەن تابىس تاباتىن كاسىپكەر - مەملەكەتتىڭ تىرەگى. ول حالىقتى جۇمىسپەن قامتۋ ارقىلى الەۋمەتتىڭ ءال-اۋقاتىن ارتتىرۋعا ۇلەس قوسادى.
سوندىقتان، شاعىن جانە ورتا بيزنەستى دامىتۋعا بارىنشا قولداۋ كورسەتۋ قاجەت. قىتايدا بيزنەسكە كەدەرگى جاساعاندارعا قىلمىستىق جازا قولدانىلادى.
ءبىر سوزبەن ايتقاندا، رەسمي مەكەمەلەر تاراپىنان ەشقانداي كەدەرگى بولماۋى ءتيىس. تەك قانا جاردەم بەرۋ كەرەك. ال، ءىس جۇزىندە، بىزدە توسقاۋىلدار ءجيى كەزدەسەدى. بۇل تۇستا، «اتامەكەن» ۇلتتىق كاسىپكەرلەر پالاتاسىنا ءۇمىتىمىز زور.
***
بۇگىندە ەلباسىنىڭ ارقاسىندا قازاقستان شەتەل ينۆەستيتسياسىن تارتۋ ءۇشىن قولايلى احۋال قالىپتاستىردى. ينۆەستيتسيا، ەكسپورت جانە يندۋستريالاندىرۋ - ەكونوميكانى دامىتۋدىڭ ماڭىزدى فاكتورلارىنىڭ ءبىرى.
ەلىمىزدىڭ الەۋمەتتىك- ەكونوميكالىق قۋاتىن ارتتىرۋ ءۇشىن ينۆەستيتسيا تارتۋ جۇمىستارىن لايىقتى دەڭگەيدە جۇرگىزۋ كەرەك. ينۆەستيتسيا ءوز- وزىنەن كەلە سالمايدى.
بۇل - تەك شەتەلدىك قانا ەمەس، وتاندىق ينۆەستورلارعا دا قاتىستى ماڭىزدى مىندەت. ۇكىمەت پەن اكىمدەرگە وسى ماسەلەنى جەدەل شەشۋ جونىندە تاپسىرمامدى بەردىم.
سونىمەن قاتار، ينۆەستيسيانى حالىق تۇتىناتىن ناقتى ءونىم ءوندىرۋ ىسىنە باعىتتاۋدىڭ ءمانى زور. ينۆەستيتسيا سالۋعا كەدەرگى كەلتىرەتىن كەز كەلگەن ءتيىستى لاۋازىمدى تۇلعانىڭ جەكە جاۋاپكەرشىلىگى قارالادى. مينيسترلەر مەن اكىمدەردىڭ جۇمىسى ينۆەستيسيا مەن ەكسپورت كولەمىنە قاراي باعالانادى...
ارداقتى اعايىن!
وڭىردەگى تاعى ءبىر ماڭىزدى ماسەلە - جاڭاوزەن قالاسىن دامىتۋ.
بۇگىنگى تاڭدا قالا حالقىنىڭ سانى 151 مىڭنان استى. بۇل كورسەتكىش جىل سايىن 2,2 پايىزعا ارتۋدا. قالا تۇرعىندارىن جۇمىسپەن، باسپانامەن قامتۋ جانە الەۋمەتتىك ينفراقۇرىلىمدى دامىتۋ - نەگىزگى مىندەت. بۇل ماسەلە بويىنشا ۇكىمەت كەشەندى جوسپارىن ازىرلەدى. ونى مىندەتتى تۇردە جۇزەگە اسىرۋ كەرەك.
سونىمەن قاتار، قازىرگى تاڭدا كاسىپكەرلىك پەن ءوندىرىستى ىلگەرىلەتىپ، جاڭا جۇمىس ورىندارىن اشۋ ءۇشىن ناقتى شارالار قابىلداۋ قاجەت. وكىنىشكە قاراي، اتالعان ماسەلەلەر بۇگىنگە دەيىن ءالى دە تولىق شەشىمىن تاپپاي كەلەدى. بۇل كەلەڭسىزدىك حالىقتىڭ الدىندا بيلىكتىڭ ابىرويىنا نۇقسان كەلتىرىپ وتىر.
اقتاۋ قالاسىنا جاڭاوزەننەن كەلگەن ادامداردى جۇمىسپەن، تۇرعىن ۇيمەن جانە جاتاقحانامەن قامتاماسىز ەتۋدى جالعاستىرۋ كەرەك.
وبلىس جاستارى تەك اقتاۋدا عانا ەمەس، ەلىمىزدىڭ باتىسىنداعى كەن ورىندارىندا، مىسالى، تەڭىز مۇناي كەنىشىنە بارىپ، ۆاحتالىق ادىسپەن جۇمىس ىستەۋىنە بولادى. جاڭاوزەندەگى جاستار مەملەكەت ەسەبىنەن تەگىن ماماندىق الۋى كەرەك، ۇسىنىلعان كەز- كەلگەن جۇمىسقا بارۋى قاجەت.
كەلەسى ماسەلە - وڭىردەگى باسشىلىق قىزمەتكە كادرلار تاعايىنداۋ كەزىندە جەرگىلىكتى ماماندارعا باسا نازار اۋدارۋ كەرەك. ۇكىمەتكە بۇل ماسەلە بويىنشا ناقتى تاپسىرما بەرەمىن.
***
قادىرلى الەۋمەت!
حالقىمىزدىڭ رۋحاني دۇنيەسىندە ماڭعىستاۋدىڭ الاتىن ورنى ەرەكشە. كيەلى ولكەدەن شىققان ايتۋلى تۇلعالاردى بارشا حالقىمىز جاقسى بىلەدى.
سولاردىڭ بىرەگەيى - زاڭعار جازۋشى، كورنەكتى مەملەكەت قايراتكەرى، قازاقتىڭ ابىزى ءابىش كەكىلبايەۆ. ول - ەلباسىنىڭ سەنىمدى سەرىكتەرىنىڭ ءبىرى رەتىندە ەگەمەن ەلىمىزدى قۇرۋعا زور ۇلەس قوسقان تۇلعا. ءابىش اعامەن مەن دە تالاي جىل ارىپتەس بولىپ، ەتەنە ارالاسىپ، ەرەكشە سىيلاستىقتا بولدىم.
وزدەرىڭىز جاقسى بىلەسىزدەر، بيىل ءابىش كەكىلبايەۆتىڭ تۋعانىنا 80 جىل تولادى. قازىر ءابىش كەكىلبايەۆ مۋزەيى سالىنىپ جاتىر. اقتاۋدا ارداقتى اعامىزعا ارنالعان ەسكەرتكىش قويىلادى.
وبلىس اكىمىنە قۇرىلىس جۇمىستارىن ساپالى جانە ۋاقتىلى ءبىتىرۋدى تاپسىرامىن.
مەرەيتويدى ءبىز تۇتاس ەل بولىپ، جوعارى دەڭگەيدە اتاپ وتەمىز. مەن ەلوردامىز نۇر- سۇلتان قالاسىندا وتەتىن شاراعا ارنايى ءوزىم قاتىسامىن.
***
ارداقتى اعايىن!
حالقىمىزدا «بەرەكە باسى - بىرلىكتە» دەگەن ماقال بار. ەلباسى حالىقتى تاتۋلىق پەن بىرلىككە شاقىرىپ، قازاقستاندى بۇگىنگى بيىكتەرگە جەتكىزدى. ونىڭ الەمدى مويىنداتقان «ەل بىرلىگى» ساياساتىن جالعاستىرۋ - بارىمىزگە سىن!
بىرلىك بولسا، الىنبايتىن اسۋ جوق! اتامەكەنگە ورالعان وتانداستار ماسەلەسىن قولدان ساياساتقا اينالدىرۋعا بولمايدى.
جاقىندا باسپا سوزگە بەرگەن سۇحباتىمدا «ورالمان» دەگەن سوزبەن كەلىسپەيتىنىمدى ايتتىم. شەتەلدەگى قانداستارىمىزدى ەلگە قايتارۋ ءىسى ەشقاشان نازاردان تىس قالعان ەمەس، كەلەشەكتە دە جالعاسا بەرەدى.
دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ - ءبىزدىڭ قاسيەتتى پارىزىمىز.
وسىنداي تاريحي كەزەڭدە ءبىز، قازاقستان حالقى، جاۋاپكەرشىلىك جۇگىن تەرەڭ سەزىنىپ، العا نىق قادام باسامىز دەپ سەنەمىن!
وسى جيىننان كەيىن شوپان اتا مەن بەكەت اتانىڭ باسىنا بارىپ، بابالاردىڭ ءارۋاعىنا تاعزىم ەتۋدى جوسپارلاپ وتىرمىن.
مەنىڭ ويىمشا، بۇگىن وتە ءتيىمدى، پايدالى پىكىر الماسۋ بولدى. شىن مانىندە، ءبىز ەل بولاشاعى تۋرالى كوزقاراسىمىزدى ءبىلدىرىپ، وي بولىستىك.
بۇل - تەك ماڭعىستاۋ وبلىسىنا عانا ەمەس، بۇكىل ەلىمىزگە قاتىستى كۇردەلى، ماڭىزدى ماسەلەلەر.
راسىندا، الدىمىزدا اۋقىمى كەڭ ماقساتتار مەن ماڭىزدى مىندەتتەر تۇر.
***
قازىرگى الەم باسەكەگە تولى. باسەكەگە لايىقتى ەلدەر عانا تابىسقا قول جەتكىزەدى. سوندىقتان، ءبىز ءبارىمىز ەل بولىپ، جۇرت بولىپ، تاباندى ەڭبەك ەتۋىمىز قاجەت.
جالپى، قازاقستان ەڭبەكقور ەل بولۋى كەرەك. جايباراقات ءومىردىڭ زامانى كەتتى.
ماڭعىستاۋ وبلىسىنا ءۇمىتىم زور. وبلىستىڭ ەكونوميكالىق الەۋەتى وتە كۇشتى. ادامداردىڭ رەسۋرسى مول. وبلىستىڭ سۇرانىستارىن ءبىز مۇقيات قاراپ، شەشىمىن تابامىز.
بارشاڭىزعا، ماڭعىستاۋ وبلىسىنىڭ تۇرعىندارىنا امانشىلىق، باقىت تىلەيمىن.
باق-بەرەكەمىز ارتىپ، ءىسىمىز العا باسا بەرسىن!
نازارلارىڭىزعا راقمەت!
