داۋرەن ابايەۆ: جاستار ساناسىنا جات اعىمدارعا قارسى مىقتى يممۋنيتەت قالىپتاستىرۋ ماڭىزدى

None
None
نۇر-سۇلتان. قازاقپارات - جاستاردىڭ ساناسىنا جات اعىمدارعا قارسى مىقتى يممۋنيتەت قالىپتاستىرۋ ماڭىزدى.

بۇل تۋرالى بۇگىن ەلوردادا ءوتىپ جاتقان «رۋحاني جىبەك جولى. يسلام جانە جاستار: قازىرگى زامانعى سىن-قاتەرلەر» تاقىرىبىنداعى IV حالىقارالىق ءدىني-عىلىمي كونفەرەنسيادا ق ر اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«ءبىز جاس ۇرپاقتىڭ دۇنيەتانىمىن دۇرىس قالىپتاستىرۋىمىز كەرەك. قازىرگى جاستار ءوز پىكىرلەرىن اشىق ايتا الادى. ولار باسەكەگە قابىلەتتى، بىلىمگە قۇشتار. ەڭ باستىسى ولاردىڭ ساناسىنا جات اعىمدارعا قارسى مىقتى يممۋنيتەت قالىپتاستىرۋ ماڭىزدى. ءبىز باي مادەنيەتىمىز، ەرەكشە سالتتارىمىز، ايرىقشا تاريحىمىز بار مەملەكەتتەرمىز. سوندىقتان فاناتيزمگە، ءدىني كونسەرۆاتيزمگە، دالەلسىز قاعيدالارعا بەرىلىپ كەتپەي، تۋرا جولدان تايماي، ءدىندى دۇرىس قىرىنان ناسيحاتتاي ءبىلۋىمىز كەرەك دەپ ويلايمىن»، - دەدى مينيستر.

ونىڭ اتاپ وتۋىنشە، ءدىني دامۋدىڭ قازاقستاندىق مودەلى مەيىرىمدىلىك، ادامگەرشىلىك، بەيبىتشىلىك سياقتى قۇندىلىقتاردان قۇرالادى.

«ەلوردامىزدا ەلباسىنىڭ باستاماسىمەن الەمدىك جانە ءداستۇرلى دىندەر كوشباسشىلارى سەزىنىڭ وتكىزىلىپ تۇرۋى دا وسىنىڭ ايعاعى بولسا كەرەك. قازاقستان ۇلى دالانىڭ رۋحاني مۇرالارى داستۇرىمىزبەن ساباقتاسىپ كەتكەن يسلام قاعيدالارىن قۇرمەتتەيدى. الايدا زايىرلى، كوپ ۇلتتى مەملەكەتتەرگە ءتان، وزگە نانىم-سەنىم وكىلدەرىنىڭ دە تاڭداۋىنا شەكتەۋ قويمايدى. كوپكونفەسسيالى ءارتۇرلى ۇلت وكىلدەرى تاتۋ-ءتاتتى عۇمىر كەشىپ وتىرعان قوعامدا بىرلىك پەن بەيبىتشىلىكتى ساقتاۋ ءبىرىنشى كەزەكتەگى ماسەلە. سوندىقتان دا بۇل قاعيدادان تايمايمىز»، - دەدى د. ابايەۆ.

ايتا كەتەيىك، كونفەرەنسيا جۇمىسىنا ەۋرازيا جانە ۇلى جىبەك جولى ەلدەرىنىڭ باس مۇفتيلەرى، ءدىن قايراتكەرلەرى، ءدىني سالاداعى مەملەكەتتىك ورگانداردىڭ باسشىلارى، لاۋازىمدى تۇلعالار، زيالى قاۋىم وكىلدەرى، جالپى 300 گە جۋىق دەلەگات قاتىسىپ وتىر. جاستار جىلى اياسىندا ءوتىپ جاتقان كونفەرەنتسيانىڭ ماقساتى - وسكەلەڭ ۇرپاقتى دەسترۋكتيۆتى اعىمنىڭ ىقپالىنان ساقتاندىرۋ، ولارعا دۇرىس ءدىني اقپارات جەتكىزۋ، ەكسترەميزم مەن تەرروريزمنىڭ الدىن الۋ ءۇشىن ەۋرازيا مەن ورتالىق ازيا ەلدەرى ءدىن قايراتكەرلەرىنىڭ كۇشىن بىرىكتىرۋ، تاجىريبە الماسۋ، «رۋحاني جاڭعىرۋ» يدەياسىن ناسيحاتتاۋ.

 

سوڭعى جاڭالىقتار