كەزەكتەن تىس سايلاۋعا قاتىستى «اق جول» پارتياسىنىڭ ءتوراعاسى پىكىر ءبىلدىردى
«كەشە پرەزيدەنت قاسىم-جومارت توقايەۆ كەزەكتەن تىس سايلاۋ اشىق ءارى ءادىل وتەتىنىنە كەپىلدىك بەردى. سوندىقتان بۇل سايلاۋ تازا وتەتىنىنە سەنىمدىمىز. ورتالىق سايلاۋ كوميسسياسى وسى ناۋقاننىڭ شارتىن ايتۋ كەرەك، ياعني ۇمىتكەرلەردى تىركەۋ جانە باسقا دا مەرزىمدەرى بەلگىلەنگەن سوڭ، ءوزىمىزدىڭ پارتيامىزدىڭ ءتيىستى جۇمىس كەستەسىن قۇرامىز»، - دەدى پەرۋاشەۆ پارلامەنت ءماجىلىسىنىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.
تىلشىلەر «اق جول» پارتياسى اتىنان سايلاۋعا تۇسۋگە كىم لايىقتى ەكەنىن سۇرادى.
«پارتيامىزدا ءبىرقاتار لايىقتى، بەلسەندى ءارى ءبىلىمدى، تاجىريبەلى ازاماتتار بار. سوندىقتان قازىر الدىن الا ۇمىتكەر تۋرالى ايتۋ قيىن بولار. مەن قازىر ءوزىم تۋرالى ەشتەڭە ايتا المايمىن، سەبەبى بۇل شەشىمدى پارتيانىڭ قۇرىلتايى قابىلدايدى»، - دەپۋتات.
سونىمەن قاتار ول مەملەكەت باسشىسىنىڭ وتاندىق تەلەارنالار ارقىلى قازاقستان حالقىنا ارناعان ۇندەۋىنە پىكىر ءبىلدىردى.
«حالىقارالىق تاجىريبەگە سۇيەنسەك، قاسىم- جومارت توقايەۆ سەكىلدى پرەزيدەنتتىك لاۋازىمعا كەلگەن ازاماتتار قىزمەتىن ءتيىستى مەرزىمنىڭ اياعىنا دەيىن اتقارۋعا مۇمكىندىگى بار ەدى. قاسىم-جومارت كەمەل ۇلى كەزەكتەن تىس سايلاۋ وتكىزۋ ارقىلى دەموكراتيالىق كوزقاراسى بار ەكەنىن، دەموكراتيالىق داستۇرلەردى قۇرمەتتەيتىن تاعى ءبىر كورسەتتى. سوندىقتان بۇل شەشىممەن ساناسىپ، ونى قابىلداۋعا ءتيىستىمىز. مەنىڭ ويىمشا، بۇل قوعامعا كورسەتىلگەن قۇرمەت»، - دەدى ا. پەرۋاشەۆ.
ايتا كەتەيىك، كەشە مەملەكەت باسشىسى قاسىم-جومارت توقايەۆ وتاندىق تەلەارنالار ارقىلى قازاقستان حالقىنا ۇندەۋ ارناپ، وندا ەلىمىزدىڭ كونستيتۋتسياسىنا سايكەس قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن 2019-جىلدىڭ 9- ماۋسىمىندا وتكىزۋ تۋرالى شەشىم قابىلداعانىن جاريالاعان بولاتىن.
«قازاقستان - دەموكراتيالىق مەملەكەت. پرەزيدەنت حالىقتىڭ تاڭداۋىمەن سايلانادى. مەن، مەملەكەت باسشىسى رەتىندە سايلاۋدىڭ تازا، اشىق ءارى ءادىل وتۋىنە كەپىلدىك بەرەمىن! بۇل - مەنىڭ بەرىك ۇستانىمىم! الدىمىزدا زور مىندەتتەر تۇر. مەن حالقىمىزعا، ياعني سىزدەرگە سەنەمىن»، - دەگەن ەدى ق. توقايەۆ.
