قازاقستانعا وڭتۇستىك كورەيادان كەلەتىن ازىق- تۇلىككە شەكتەۋ قويىلدى

 نۇر- سۇلتان. قازاقپارات - مونيتورينگ جۇمىسىنىڭ ناتيجەسىندە وڭتۇستىك كورەيادان كەلەتىن ازىق- تۇلىكتىڭ ءتورت تۇرىندە گمو مولشەرىنىڭ كوپ ەكەنى انىقتالدى، دەپ حابارلايدى قازاقپارات ءتىلشىسى.

اتالمىش مونيتورينگتى دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتى اي سايىن جۇرگىزەدى.

«گەنەتيكالىق موديفيكاتسيالانعان وبەكتىلەرگە قاتىستى نۇر- سۇلتان قالاسىنداعى دۇكەندەردە مونيتورينگ جۇرگىزىلدى. ناتيجەسىندە وڭتۇستىك كورەيادان كەلەتىن ازىق- تۇلىكتىڭ ءتورت تۇرىندە - سويا مەن جۇگەرى باعىتىنداعى ونىمدەردە گمو مولشەرىنىڭ كوپ ەكەنى بەلگىلى بولىپ وتىر. اتاپ ايتقاندا، سويا مەن جۇگەرىدە گ م و مولشەرى 2 پايىزدان 100 پايىزعا دەيىنگى ارالىقتا بولعان. نەگىزگى شەك - 0,9 پايىز بولاتىن. ول ونىمدەردىڭ قاتارىنا «كليار» اۋناتىلعان قوسپاسى مەن جىلدام دايىندالاتىن لاپشانىڭ ءۇش ءتۇرى ەندى» ، - دەدى ق ر د س م قوعامدىق دەنساۋلىق ساقتاۋ كوميتەتىنىڭ ءتوراعاسى - باس مەملەكەتتىك سانيتار جانداربەك بەكشين و ك ق- دا وتكەن باسپا ءسوز ءماسليحاتىندا.

ونىڭ ايتۋىنشا، ازىق- تۇلىكتىڭ اتالعان تۇرلەرىن تاسىمالداۋ مەن ساتۋعا قاتىستى ۋاقىتشا سانيتارلىق شارالار قابىلدانعان.

«قازىرگە دەيىن ونىمدەردىڭ اتالعان تۇرلەرىن ساۋدا سورەلەرىنەن تاركىلەۋ جۇمىستارى جۇرگىزىلدى. سونىمەن بىرگە، قازاقستانعا اتالمىش ونىمدەردى تاسىمالداۋشى يمپورتەرلەرمەن كەزدەسۋ وتكىزىلەدى. وڭتۇستىك كورەيا ەلشىلىگىنە نوتا جولداندى» ، - دەيدى بەكشين.

ايتا كەتەيىك، بۇعان دەيىن جانداربەك بەكشين تاۋار قاۋىپسىزدىگىن قامتاماسىز ەتۋ بويىنشا 2019 -جىلدىڭ 1 - توقسانىندا جۇرگىزىلگەن جۇمىس قورىتىندىسىن جاريالاعان بولاتىن.